WAEBRANIA 4 - Bibilia Kui Mdedie fo Kimochi

¹ Iki kiluhoye fowa tseowuo kundu kulawone ipfo konu kuwoneke-pfo echiasha yanga lilya, ili indi kiteṟyo kilya kyekuangya ipfo kundo kuwode olele loke kii-kideye-se.

² Kyamba naso luiwaongoye ndumi ya sia chawo. Indi idedo lilya waleliicho lilewaekya kindopfo kipfa yadanya lyawo lilawelungyo mwidikye.

³ Kyamba yanga loangya ipfo hando kuwode olele kokoya lomeidikya, kisumhanye kilya ahambie, “Njilelya nyamu kui rina lyako, ke Walashike yangya hawode olele loko.” Na lya heri mawiko halemba iwiko hamu na kiwanja kya wuyana.

⁴ Kipfa kuwode hando Ruwa ahambie, “Kya mkonu fo mfungade mawiko hake hose.”

⁵ Na iya kiwungi ke, Walashike yangya hawode olele loko.

⁶ Ikyo kimanyishye ke kodeo maanya fo wandu wechikuangya-ho indi walya walesonguo yongoyo ndumi ya sia wo walawekuangya-ho kitewe nyi wulemi wulya.

⁷ Nkyo kyanenga ateseheṟa lingi mkonu kui inu echideda kui Dawidi maheri hamsia mengi chando kulesonguo ihamba, “Ili moicho inu ṟu lyake, ma mulaumiṟe ngoo tsanu.”

⁸ Kyamba kima Yosua alembaangishia olelenylulya awechideda-se kiheri kya numa kya mkonu fungipfo.

⁹ Kikuwukye-ho kehamba ke kwipfo-se maanya foonyonya fumtsuhaṟye mkambo fo Ruwa.

¹⁰ Kyamba moangya ipfo kundu kuwode olele loke nyio aonyonya kya mawuto hake chando Ruwa aleonyonya kya halya hai hake.

¹¹ Nakyo kiluitike luwinye ikuangya ipfo hando kuwode olele lulya, kundu ma kulakae-ho echihutso nyi kitewe kya wulemi wulya.

¹² Kipfa dedo lya Ruwa lirie moo lii na pfinya lii liohi kota orio oshu lulie kuwi, lii soka itana lyapaṟa mrima na mumuyo na mawungo na moongo liileelia mahio na macha hakeri ngoonyi.

¹³ Ma kuipfo kindo kii kiwike kiwode kundo kulawono odatsinyi lokepfo; indi shii kitaṟe shii shialie na pata mesonyi hake shose. Nyio amonyi luimhamba.

Yesu ai mkohanyi ang'anyi

¹⁴ Kyasia ili lui na mkohanyi ang'anyi ichu alekuidya maruwehu halya nyio Yesu Mana chu o Ruwa lukuwade na imhamba.

¹⁵ Kipfa lulawode mkohanyi mnene alawechiidima iluichio wukiwa kya wufafa wodu indi ai mheshe kui shindo shose awehianyi naso wuta-pfo wunyamaṟi.

¹⁶ Ikyo kiluenenge luitikirie kidembo kilya kya wutonga lui na wutumbe, kundu luambye-ho osaṟio luweshika ikoya-pfo wutonga woluendie ngaya yetambachuo liwe lya heri.