WAEBRANIA 3 - Bibilia Kui Mdedie fo Kimochi

¹ Nkyo kimaduma nyo wanawawama waele mui waodoya wa ndaho ya kiruwehu, ringenyi mdume ulya na mkohanyi ang'anyi luimhamba nyio Yesu.

² O awei mhendeli mohendelya ichu mombika-ho kimu chando Mose awei o ipfo mba yake yose.

³ Nao aambikie wuitoṟi kota Mose kimu cha ili mowika mba awode wunene kota mba iya.

⁴ Kyamba orio mba yekewiko nyi mndu indi mowika shose nyio Ruwa.

⁵ Na Mose nyi awei mhendeli o ipfo mba ya ichu, kawa mtarami moṟingishia shilya shiwerie ihambo.

⁶ Indi Kristo nyi Mana sumuhana na mba ii yake. Mba ii yake nyiso, kokoya lokaa luṟamkie luikuwada tsee na iṟumisha owedo lulya itane lochiawutsio.

Isia moo lya wandu wa Ruwa

⁷ Kihendekye chando Mumuyo Mwele ahambie, “Ili moicho inu ṟu lyake.

⁸ Ma mulaumiṟe ngoo tsanu cha ili mandi ha mapusenyi mkonu fulya fo kihesho fo ipfo olelenyi.

⁹ Hondo waku wo wanu walenjihesha kui kiseengo.

¹⁰ Nawo walemewona mawuto hako maka makumi haana. Nkyo kimaduma njilelulia rika lyo lyose ngahamba, Suku tsose wakeri tangatanga na ngoo tsawo. Indi njia tso tsako wo watsiichipfo.

¹¹ Kyo kilenenga njilelya nyamu kui rina lyako, ke walashike yangya hawode olele loko.”

¹² Kuṟisenyi wanawawama, kulawone mndu ai kiidi kyanu menyi ngoo njiporu ilaidikye, nayo yechilekana na Ruwa menyi moo.

¹³ Kya indi ke kuikimbyanenyi orio mkonu mandi haihambo inu hose, kundu ipfo konu kulaumiṟyo mndu mrima echilembo nyi wunyamaṟi.

¹⁴ Kyamba so lomba wenyi-kita na Kristo lukakaa lochikuwada tsee na kiwanja kilya handu luwoke itane maawutsyonyi.

¹⁵ Ili kohambo, Ili moicho inu ṟu lyake ma mulaumiṟe ngoo tsanu cha ili mandi ha mapusenyi.

¹⁶ Nyi wa ku weadanya wakapusa? Chi iwa walewuka ipfo Misiri wakadao nyi Mose wose?

¹⁷ Nyi wa ku alewa mowalulia maka makumi haana? Chi iwa wawenyamaṟie, na shiwungo shawo shikalekana ipfo kundo kuwode sehusa?

¹⁸ Nyi wa ku alewalia nyamu kehamba, walashike yangya hawode olele loke? Chi iwa walelema iidikya?

¹⁹ Natso na lowona walalekuidimya yangya-ho kipfa kya wulemi wulya.