WAEBRANIA 2 - Bibilia Kui Mdedie fo Kimochi

¹ Nkyo kyaluitika kya ngoseṟa ke luchunguṟie shilya lomeicho kundu lulahende yeeko ma indi.

² Kyamba kokoya idedo lilya liwee-lidede nyi wasu liwewangi lido na orio wutahachi na orio wulehi wo okuchu wuleambya wudeheli wowo wuhoṟotsu.

³ Nyi wuda lochituruchukia-ho so ili loilaala okiio lung'anyi ludi? Nalo kimaenyi kyalo nyi ipfo kundo luleongoyo nyi Mndumii lukaweluwanzio so nyi walya walemwicho.

⁴ Luwerianyi na kiṟingishyo kii kiwike nyi Ruwa kui shichano na maṟiho na pfinya tsa mbaṟi tsifoi na mahawio ha Mumuyo Mwele shisumhanye mkundie foke.

Mnene o Okiṟo

⁵ Kyamba mkambo fo wuyana ifu lodeda kyafo ke nyi icha fui chi alefuwika shi ya wasu walyapfo.

⁶ Kya indi kwipfo kundo mndu mliwe aleṟingishia ahambye, “Mndu nyi o ki ili uimkumbuo. Ang'u mana o mndu ili uimwambuya?

⁷ Omemnyiṟya wasu kheri kyangu. Komruwa mdohu foke wuitoṟi na kiichiko.

⁸ Kombika shose shi ya madende hake.” Kyamba imbikya shose shi yake lyo lyahamba ke kutolyo-ho ma kimu kilawewikyo shi yakepfo. Indi wulalu lulandewona shilya shose shii-shiwike shi yake.

⁹ Indi ichu awemnyiṟye wasu kiheri kyangu lumbonyi nyio Yesu ai mruwie mdohu foke wuitoṟi na kiichiko kimaduma kya mawawio ha opfu, ili esonja opfu akaya-ho wose kui wutonga wo Ruwa.

¹⁰ Kyamba ichu awikye shose shiwe shake awewikye shose kui pfinya yake nyio kiwemsumhanye ili arie iduo wana wafoi wuitoṟinyi naitse msongoru o okiio lowo kiawutsyonyi kui mawawyo.

¹¹ Kyamba ichu mwilishi na iwa weilisha wapaṟikye ko ichu wose. Nkyo kimarete alapfia sonu yewalaha wanawawama.

¹² Ili ahambie, “Njechiongoya wanawawama wako rina lyapfo. Njechikuimbya makiidi hawi ha siṟi.”

¹³ Na lingi, “Inyi njechiwa mokusirya na iyo.” Na lingi, “Ambuya, lui-ho so na wana wa, Ruwa alenjienenga.”

¹⁴ Cha kipfa ili wana wakuwode na samu na nyama, na wudo alekuwada natso kimu nawo kundu nawute wuitoṟinyi kui opfu ichu aitoṟie opfu, nyio mkumbi ulya.

¹⁵ Na iletsa naletse iwa wawedekie wusingenyi kui wuowu woowuo opfu kiheri wawei na moo kyose.

¹⁶ Alewo chi wasu waele awawinyiepfo, kya indi nyi mbeu ya Abrahamu nyiyo aiwinyie.

¹⁷ Kipfa kya iki kiwembaṟi ifanana na wanawawama kui shindo shose kundu nawe mowaichio wukiwa nawewiia na Ruwa mkohanyi ang'anyi sa mhendeli mowonya manyamaṟo ha mkambo mhoṟie.

¹⁸ Kyamba ipfo kundo alekurohya adi amonyi echihesho, nyi hondo aidima yekya walya waihesho.