WAEBRANIA 13 - Bibilia Kui Mdedie fo Kimochi

¹ Kaenyi mochikundana na wanawawama.

² Mulahadime iambya wahenu na kanyi konu. Kyamba ili kuweipfo wewika wadi nyi waleambya wasu waele ma walawichi.

³ Muwe mochikumbuo walya wai wapfunge cha ili mompfungo hamu nawo, muwekumbuo waiwature muwode mbihu chawo.

⁴ Wasangi wo wasanze wali wumu wuhendelyo nyi wose na kisima kyawo kilahendesutso. Kyamba wamelumelu na waṟuhui nyio Ruwa echiwaanduya.

⁵ Mbuka yanu ilafane wueehi, kilya kyanu kii-ho kyo kimshikye. Kyamba o amonyi awehambie, “Njechikuda manya-lepfo, njechiwuta macha ipfo kofo ma indipfo.”

⁶ Nkyo kyalukarisha luihamba, “Ruwa oko nao Mndumii, njechiowuo kindopfo Mndu o wandu anjiidima ki?”

⁷ Kaenyi mochikumbuo wasongoru wanu iwo walembia idedo lya Ruwa. Muwe mochikapya mainukyo ha ohendo lowo meso mukuwaakishye wuidiki iwu.

⁸ Yesu kristo awei adi wukowu ai adi na inu echikaa adi mlungana.

⁹ Mulahende patsyo nyi mapfundo maliwe hai ha kihenu. Kyamba kilya kii kicha kyechiwanza ngoo nyi wutonga chi chonga; tso tsiweendie walya wawekekurohya natso mbuchapfo.

¹⁰ So luwode rasio, kyayo walya waisingya hema lilya wawode momu folya kilya kii-hopfo.

¹¹ Kyamba nyama tsa mando halya, samu yaho yekeendo nyi mkohanyi mnene ipfo hando halya haele yeoloṟa wunyamaṟi, tso tsahenda ikoṟo ora lo kya nja lo otiṟiwe lulya.

¹² Nkyo kitewe na Yesu alewawiṟo ora lo nja lo kichumi kya mṟi fulya kundu nailishe mkambo foke kui samu yake.

¹³ Hondo lukuwutie tewe so luwuke otiṟiwenyi lulya lusangane nao nja iya lochikudika na wusutsu wulya awei-mwendie o.

¹⁴ Kyamba lulawode iya mṟi fokukaya-ho, kya indi nyi lukeri iwingya fulya fungi fochikuwiia-ho.

¹⁵ Lutsinde lochidambikya Ruwa odambiko lo mwano fochiwa lui nao fui momu-hu yechiichika rina lyake.

¹⁶ Indi mulahadime ilekia na ihawya wengi, kyamba njodambiko tsa mbaṟi ii tsichihiṟye Ruwa.

¹⁷ Muhendelye wasongoru wanu na iwahoya, kyamba wo walaa chowe wechiwinya mrima yanu wai wandu warie ihenda weso kyayo, kundu wahendehaluo-ho wawodo n sia walawone wechisumukya. Kikamba kido kiwemfurunjikia.

¹⁸ Ke luterewyenyi-ng'u-wo. Kyamba so lukusirie ke ngo tsadu tsa mrimenyi tsii nhoṟotsu loitika ihendekya wose kui wusumhanyi.

¹⁹ Kyanjiitika kawi njimtutumye iwuta iki nyi kundu njihede iwihiṟo konu owinyi.

Kiterewo

²⁰ Indi Ruwa ai menyi-ofoṟo nyi aletambachuo mlisi o machondi ipfo ko wapfu ichu ang'anyi kuisamu yewika-ho owiko lo mlungana, Mndumii odu Yesu.

²¹ Ruwa chu namsumbe pfinya ya orio kii kicha kyose muwe mowuta shilya akundi. Nao nyio ai-msanze nanyo echiwa mowuta kilya kichihianyi nao kikawa kui Yesu Kristo. Nyio nawe mowikyo mng'ano maheri hose halunganyi. Amenyi.

Madedo ha ifurumia

²² Indi ngamtutuma nyo wana wa wama ke ambyenyi necha idedo li lya wuikimbi, kyamba njilemṟehya nyo njido ngamdumbuo owinyi.

²³ Manyenyi ke manowama odu Timoteo amelekio; kokoya acha owinyi njishike iwonana nanyo njirianyi nao.

²⁴ Munjiiṟikiṟye wasongoru wanu wose na waele wose. Walya wai ipfo Italia wamudikye shiṟikiṟo shawo.

²⁵ Wutonga wukae nanyo mose.