WAEBRANIA 12 - Bibilia Kui Mdedie fo Kimochi

¹ Nkyo kimaduma naso ili lui na ipuchi lya waṟingishi lilutengetie lidi luleṟye wanda orio wulami na wunyamaṟi wu wokiṟa iluoṟowya owinyi, lochiengeṟa ihenda ira ngapano iii njiwawasye yadu lukuhode-ho necha.

² Lochifunya Yesu meso ichu ai mboki na moawutsi o wuidiki wu. O handu ha sia iwei mbiike oshangunyi loke kahenda ikuwada na msalaba nalaṟise wusutsu kashika ikudamiṟa ora lo kulyo lo loṟikehu lo wusuṟi wo Ruwa.

³ Keringenyi-ng'u wo ichu alekukarishia wulemi wulya wo wanyamaṟi walya wolemana nao amonyi, kundu mulahende ilemo, mrima yanu ilalolome.

⁴ Ipfo ngapanonyi yelehana na wunyamaṟi mulemekuhode itane moewa samupfo.

⁵ Nanyo mulemaa ihadima wukarishi wulya, ipfondo modedyo mui wana, “Manoko, ma kulamine ihenda itsano nyi Mndumii. Ma kulalolome ili odedyo nyio.

⁶ Kyamba ichu Mndumii amkundi nyi ekemtsana. Kechikapa orio mana aimwambya.”

⁷ Kutirisienyi mochitsano. Ruwa aimkumbuhananya-ho mui wana. Kyamba nyi mana uhya wande alaimtsana?

⁸ Alewo kokoya mulahenda itsano wutsanyi wuwei kita kya wose nyi mukeri wenyi pari mulai wana.

⁹ Kyasia ili luwewode wande yadu wa kui nyama wechilutsana lukawewahoya chi kiluwaṟi mnu kya ngoseṟa luhende ikulaṟya Wande chu ai menyi mamumuyo lukuwutie-ho iwonyo moo?

¹⁰ Kyamba wo walelutsana kiheri kyangu wutsanyi wurianyi na mhie yawo, indi o ailutsana awode kitewe kilya kicha kyeluwonya kita nao kya wuele woke.

¹¹ Oweṟe lu orio wutsanyi wuiho wufanyi siapfo, kya indi nyi wukiwa, ili lya numa-le woenenga iwa waiwatoṟishe nyiwo wusumuhanyi wuwikye-ho ofoṟo.

Shiloshyo na shitutumo

¹² Nkyo kimwenenge muhende ikarisha mawoko halya hai-masotse owaa na ndi tsilya mulakae marehe.

¹³ Mutanye madende hanu osenge luhoṟotsu, kundu kilya kiirichahia kilarendemke, indi kikunde henda chia.

¹⁴ Wingyenyi hamu na wose ikaa na ofoṟo na wuilisho, kipfa kulaipfo echiwona Mndumii alai mwilishe.

¹⁵ Muwe mochiambuya mnu, kundu kulawoneke-ho echiwuka wutongehu wo Ruwa, manya kulaalukye-ho mri fuipusa fochirohya fuweshika ifanyitsa wafoi.

¹⁶ Kulakae-pfo ai mndu o melumelu ang'u mndu mtaicho cha Esau alekumba wuwee woke kya kilayo kimu.

¹⁷ Kyamba muichi ke nyi ili lya numa alewuya ilanga iduo ona lulya kyoṟa kyake kashika ileho. Kyamba alawekoya kundo mdo fomelacho ma kawekipfula echitonyitsya machenyeṟe.

¹⁸ Kyamba nyo mulaweshika itikiria hando hepaya kuwei na modo foaaka na nruwe na meema na otanu.

¹⁹ Na irunduma lya ombe na ṟu lya modeda, kyalyo weliicho waleterewa ke, Ma walakihendewio dedo.

²⁰ Kyamba walaweidimana na iwawaso liwe lyehamba, “Ma indo liwe likakuwasha na fumvu li lyechikumbyo maho lipfe.”

²¹ Ma Mose kahamba, Ngawuko m madima njidedema. Kilya kilewonyo-ho nyi wudo kiweioweshye.

²² Kya indi nyo momshika itikiria fumvu lya Sioni na mṟi fo Ruwa menyi moo, nyifo Yerusalemu ya kiruwehu na matorito ha wasu waele halawa italo.

²³ Na renge na siṟi ya wawee waiwaṟehie ipfo ruwehu na Ruwa moanduya wandu wose na mumuyo ya wasumhanyi walya wai-waawutsie.

²⁴ Na Yesu moende owiko lulya luhya na samu iya ya maolya ikeri ideda kuichyo kota iya ya Abeli.

²⁵ Keringenyi-ng'u-wo mulawone mochilekana na ichu ai-pfo modeda. Kyamba kokoya walya walaweikia wechilehana na ichu modeda kyake ipfo sangenyi, nyi hanga kawi so, kokoya lokumbya ichu mhongo aideda akeri ruwehu.

²⁶ Nyio ṟu lyake lilemdedemesha wanda ii mandi halya, indi wulalu amemanyisha kehamba, “Nyi limu-se njechidihinyisha lingi chi wanda ii tupupfo, indi na ipfo ruwehu.”

²⁷ Idedo ili; limu-se lingi, lyahamba necha ke shilya shii shidedemeshe shehenda ilachika cha kipfa shiwei-shiwumbe, kundu kukae-pfo shilawa idedemesho.

²⁸ Nakyo kienenge so ili luiambya wumangi wulechiteshuka luwike-pfo mwaano lochipfuṟukanya nafo Ruwa kyemchihiṟa luwodo nyi wuindi na wuowu.

²⁹ Kyamba Ruwa odu ai modo fuilya fochimaa.