WAEBRANIA 11 - Bibilia Kui Mdedie fo Kimochi

¹ Wuidiki nyii wukeri ikuwada na shilya shiiedyo, wo nyiwo mhomoye fohomoya shindo shilawono.

² Na walya wa mboko ili wawei nawo wukeri wudi nyihondo walekuwutya-ho ihenda iwikyo kiṟingishyo.

³ Nyi wuidiki woluenenga imanya ke wuyana wu wometano nyi idedo lya Ruwa, na kilya kiwono chi ipfo handu heambuya kipaṟikyepfo.

⁴ Nyi wuidiki wuleenenga Abeli adambikye Ruwa kidaso kichihianyi nao kota kya Kain, kashika ihenda iṟingishyo ke nyi ai mndu asumhana kimaduma kyawo. Kiṟingishyo ki nyi Ruwa aweṟingishye kikuwode na njodambiko tsake. Nawo (wuidiki wo) womenenga aideda-se mandi alemshikahenda ipfa.

⁵ Nyi wuidiki wuleenenga Enoki ametakuwo alawona opfu. Nyi alekiwonose ma handopfo kipfa nyi Ruwa alemtakuo. Kyamba mandi itakuo lilya lilandehenda iwa kashika iwikyo kiṟinghishyo ke nyi awechihianyi na Ruwa.

⁶ Indi kundo kulawode wuidiki koidima ichihianapfo. Kyamba kiwaṟi mndu motikirya Ruwa nawe mwidiki moidikya ke o aiho na walya waimpfula nyi echiwasumba.

⁷ Nyi wuidiki wuleenenga Noe amepeesuyo shindo shilawendewoneka kawa mwikimbe esungusia sanduku lilya ling'anyi liwe kyekiṟa wa mba yake kawewonya na mweke fowo wuyana wu owingo kaweioṟa wusumhanyi wuoshanyi na wuidiki.

⁸ Nyi wuidiki wukaenenga Abrahamu ilindi amshikahenda ilaho aleleshyaho madu kesamya hando hawei hateṟie hembia kyoṟa, kahenda isama kulawode aweichi handu halya heshika-ho.

⁹ Nyi wuidiki wukaenenga alekapa pata ipfo sangenyi lya kiteṟyo kilya cha ili liwei lihenu kahenda ilaa mahemenyi. Na Isaki na Yakobo na wudo wawerianyi nao iduo kyoṟa kya kiteṟyo kilya kilya.

¹⁰ Kyamba aweiwedya mṟi fulya mikare fushike iwiko kiwanje-hu kya maho ha ngina, mtsanyi ofo nao Ruwa mofusungusia.

¹¹ Nyi wuidiki nawo wukaenenga Sara alewada pfinya yeembeṟa mbeu amekuo wuku wulakiwona-se katana moteṟya kiteṟyo kilya mokusirio.

¹² Nkyo kimaduma ko ichu umu kuwepaṟikye luwa lifoi cha nyenyeri tsa ngine-hu na cha mbuṟusanga fo ohambehu lo nduwa ya wuyana fulawa italo, nao alepfa kui ifee.

¹³ Iwa wose walemhenda wekaa na wuidiki ma walawekudaya shiteṟyo shilya, indi waleshiwona shikeri kundo ko isonguo wakashiindya wekuhambya na pata ke wakeri wahenu, wandu wekuidya-ho tupu ipfo teri-hu-ii.

¹⁴ Kyamba iwa waideda wadi nyi wamanyishye ke nyi kiku kyawo waikipfula.

¹⁵ Kima wawekumbuo-ho kilya walekisama naa wawewode mwaanya foiwuya napfo.

¹⁶ Indi wulalu nyi kilya kicha kota walekikuleshya, nakyo nyi kya ruwehu. Nkyo kimaduma Ruwa alawepfia sonu isendo Ruwa owo, kyamba nyi alewawikya mṟi.

¹⁷ Nyi wuidiki wukaenenga Abrahamu aleshika idasa Isaki ilindi aweihesho kadambikya-ho ichu oke kimumu mfi. Nao nyi awei mteṟye shiteṟyo shilya.

¹⁸ Nyio amewio; ke nyi Isaki echiwa msendo fo mbeu yapfo.

¹⁹ Nao nyio kahamba ke Ruwa ai na pfinya yeṟutsa mndu na ipfo wapfunyi. Nakyo kyamnenga alembihiṟyo nawe mfano.

²⁰ Nyi wuidiki wukaenenga isaki alewikya Yakobo na Esau ona kawasendya shindo shewoneka.

²¹ Nyi wuidiki wukaenenga Yakobo ilindi aweihenda ipfa alewikya orio ose o wana wa Yosefu ona keindya akulemye mdo-hu fo ndichi yake.

²² Nyi wuidiki wukaenenga Yosefu ipfo mainukyonyi hake alehenda ikumbuo kya isama lya wana wa Israeli kawawasya kya mafuo hake.

²³ Nyi wuidiki wukaenenga Mose kafeo kaṟiko nyi wafee wake meri iṟaṟu kipfa nyi walewona kimana kiwewode lole, nkyo kiletewa walaweowuo iwawaso lilya lya mangi.

²⁴ Nyi wuidiki wukaenenga Mose ili amtoṟika kaleha isendo mana o mpfu o Farao.

²⁵ Kasambuṟa ihenda ituro hamu na mkambo fo Ruwa, kyo kiwemchihiṟye kota ikaa na seko tsa oweṟe tsiwukye wunyamaṟinyi.

²⁶ Nyi alehamba isutso kimaduma kya Kristo lyo liende wusuṟi kota shisa sha Wamisiri, kyamba nyi aleringa wuṟundi wulya.

²⁷ Nyi wuidiki wukaenenga aleda Misiri alechiowuo rihima ya mangi kyamba alekukarisha na ichu alawono cha ili ambonyi.

²⁸ Nyi wuidiki wukaenenga alewika Pasaka (nyi mwidio fulya) na yoola lilya lya samu, kundu mkombetsi ulya nalahende ipaya wawee wawo.

²⁹ Nyi wuidiki wukaenenga waleambadya ipalyipalyi lya king'aring'ari cha ili nyi kundu kuhadutsu mpfondo Wamisiri, ilindi walehesha iwika chawo, walekuwutya-ho ihenda imeṟo.

³⁰ Nyi wuidiki wukaenenga njomombo tsa Yeriko tsilewunduka tsiwei mtengetie mfiri mfungade.

³¹ Nyi wuidiki wukaenenga Rahabu mka ulya o njia alawesanzo irumatso kimu na walemeshi walya kipfa nyi aleambya wa lokitala walya kui ofoṟo.

³² Na iki njihambe-se kingi ngesa? Kyamba nyi saa tsiwenjiwuṟye tsehamba sha Gedeon na Barakia na Samson na Yefita na Dawidi na Samueli na waikimbi walya.

³³ Wonyiwo walelaṟa maumangi kui wuidiki wakaende wusumhanyi, wakashika ikoya shilya shileteṟyo wakapfunga madumbu ha miso.

³⁴ Wakaṟumisha modo furie pfinya ing'anyi wakaturuchuka madumbu ha oshu wakahomoyo pfinya ili wawei wufafenyi, wakawa wawahanyi ipfo shidenyi, wakadichiṟa siṟi tsa mesa.

³⁵ Waka wakaambya wawo walepfa wamshika iṟuka, indi womi wengi wakahenda ifunjo-funjo mafuo walaweleshya ndalai iya mawoko kundu washike ikoya iṟuka lingi lii icha.

³⁶ Indi wengi wakawonyo italwo na ikapo na shiteecho wesanzyo ihenda ipfungo na ikumbo kipfungyonyi.

³⁷ Wakakumbyo maho, wakaitso wudenyi wakapaṟopaṟo, wakapfa wewooho na oshu, wakaṟahaṟaha waṟee masaṟa ha machondi na ha mburu, wawei wandu wadee, wapotse, warohye.

³⁸ Nyiwo wuyana wu wulawewasumhanye. Wawekeṟahaṟaha weowa ko olele na ipfo mafumvunyi na ipfo njopangenyi na mṟeshenyi ya wanda ii.

³⁹ Na iwo wose ma ili waleṟingishyo wadi kui wuidiki wulya ma walemkudaya kilya kiwei-kiteṟyepfo.

⁴⁰ Kipfa kilya Ruwa alesonguo iluwonya kiwe kicha kota, ke walashike yawutsyo chila hamu naso.