WAEBRANIA 10 - Bibilia Kui Mdedie fo Kimochi

¹ Kyamba wuwawaso wusongoṟye kiṟishe kya mecha hawerie icha wulaweende fana ya matendo. Na shidaso shilya shimu wekeshiende maka yose shilunganyi sho shaidima ishitsa wadambiki kikunyi ma indipfo.

² Chila wudo chi shiwesia yendo kipfa wadambiki walawekitautau kya manyamaṟo kya indi wawei waharamishe na limu?

³ Kya wulalu nyisho shiwatamuṟye manyamaṟo maka na maka.

⁴ Kyamba samu ya chau na ya oṟo ilai na pfinya yewuta-ho manyamaṟo.

⁵ Nkyo kimaduma o ilindi achee wuyana ahambie, “Iyo uwekundi ma kidaso ma odambikopfo. Indi nyi mbihu ulefunjitanya.

⁶ Shiaalo shikoṟe na shidaso sheoloṟa wunyamaṟi shiwekuchihiṟyepfo.

⁷ Nkyo kyannenga ngahamba, Ambuya ngacha; ipfo kitapunyi kilya kinene nyi ku-kuṟehye kyako ke njiwe njiwute kyama kyapfo, hoi Ruwa.”

⁸ Hando heasa ideda nyi ahambye, Uwekundi ma shidaso ma njodambiko ma shiialo shikoṟe ma shidaso sheoloṟa wunyamaṟipfo ma shiwekuchihiṟyepfo, ishi shekedambikyo kui wuwawaso wulya.

⁹ Kashika oo kahamba, Ambuya, ngacha njiwe njewuta kyama kyapfo. Kawuta-ho lya kuwoka kundu nailikishye-ho lilya lya kawi.

¹⁰ Kui kyama ki luiwailishe na limu likawa na odambiko lo mbihu fo Yesu Kristo.

¹¹ Na orio mkohanyi ekehoṟoka-ho mkonu kawa mowika wuindi echidambikya-ho shidaso shilya shimu kafoi na kafoi, nasho shilai na pfinya yewutaho wunyamaṟi.

¹² Indi ichu alemdambika kidaso kimu mfi kiwewa kimaduma kya manyamaṟo kikae-ho mlungana kakudamiṟa owokonyi lo kulyo lo Ruwa.

¹³ Kaitsa-ho mweke fo iweda itane wakituwa wake washika ilaṟo shi ya madende hake.

¹⁴ Kyamba iwa weilisha nyi alewashitsa kikunyi kui odambiko lumu mfi lochikaa mlungana.

¹⁵ Indi na Mumuyo Mwele aluṟingishie adi; kyamba ili amaa ihamba.

¹⁶ “Ilo nyilo owiko njechiwawikya mkonu iya iya yamsia”, nyi Mndumii ahambie, “Njechihomoya njowawaso tsako ipfo ngoon tsawo, na iṟehya njechitsiṟehya ipfo mhienyi yawo.

¹⁷ Na manyamaṟo hawo na njotahachi tsawo sho njechishitamuo-sepfo.”

¹⁸ Kya indi ipfo kundo sho shii shihoṟye mpfondo kukiwode-se odambiko lo kimaduma kya wunyamaṟipfo.

Lukae hafui na Ruwa

¹⁹ Kyasia wanawawama, lui na wutumbe kui samu ya Yesu wo kihendesha na ipfo kundo kwenyi wuele.

²⁰ Nyi yo njia ameluipfunguya ikeri njihya iwode moo iitsye kiṟikishyenyi kilya nyinyitso nyama tsake.

²¹ Ili lui ludi na mkohanyi ang'anyi ai mbawasie kanyi ka Ruwa.

²² Luhendetikiria-ho luwode ngoo nlalutsu lui na welu ya mwidikye lui-waolye ngo tsa mrima tsilakikae makufaṟe lui-wasanje mbihu na mṟinga mharami.

²³ Lutsinde lochiṟi ngishya kilya luiweda ma lulalemo, kyamba mokiteṟya nyio m mhendeli.

²⁴ Na lukae lochiringana luwenyi na wenyi luhende yaaka kui makundano na mawuto mecha.

²⁵ Lulalembeṟye shisanzyo shadu chando waliwe waichiwie, kya indi lulahane naho. Luitike iwuta ludi ili luwonyi ke mkonu fulya fulya fuitikiria icha.

²⁶ Kyamba kokoya so ili lomma ipfunguyo kilya kii lohi lokedekyo hando luwonyi kochitsuhase kidaso kingi kyewuta-ho wunyamaṟipfo.

²⁷ Shila yambya mndumbuye iya ioweshye na modo fulya foaka pala fochilya walemeshi walya.

²⁸ Mndu afunja wuwawaso wo Mose koka wangochi wai-ho wawi ang'u waṟaṟu wewikya mndumbuye pfinya nyi ashikahenda iwoho alawa iichio wukiwa.

²⁹ Chi mochihamba, A nyi wuda wo ngoseṟa wudeheli wuwe wochihoya ichu achuma-chuma Mana chu o Ruwa ekitana samu ya owiko lulya ya mpurya, nyi yo ametano nayo mwele kawa motaluo mumuyo moende wutonga.

³⁰ Kyamba luichi ichu ahambie, “Idehelya mndu lyankoya inyi, nyio inyi njechitaa kiṟache.” Kukawehambo lingi, “Mndumii echidedya mkambo foke.”

³¹ Nyi koweshye munu yolokya mawokonyi ha Ruwa menyi moo.

³² Wuyenyi ikumbuo mkonu iya mulekutirisia ngapanonyi njumu ya mawawyo.

³³ Ili limu muwei walahe patehu mochipiṟo na ituro, ili lingi muwedaṟanyi na walya waweiwutyo wado.

³⁴ Kyamba nanyo muleichio wapfunge walya wukiwa, na iliindi mulesoko masaa hanu nyi mulekukarishya muwekaa na sia, kipfa muweichi ke nyi muwode mkae fungi fui mcha fochikaa.

³⁵ Ma mulawone mokumba wutumbe wu wonu wanda wui na wuṟundi wung'anyi wudi.

³⁶ Nyi muwuṟie ikaa na mrima msanze kundu muhende iduo kilya kii kiteṟye mukamaa iwuta kilya Ruwa akundi.

³⁷ Kyamba oweṟe luipfo sa lutung'tu. Mocha echicha alechikeleo.

³⁸ “Na mosumhana oko echiwada moo fuṟukye wuidikinyi. Indi kokoya awuya numa mrima foko fochihio kyakepfo.”

³⁹ Indi so lulai wandu wewuya numa lochihenda ideka, kya indi lui waidiki lochiletsa-ho mrima.