WAEBRANIA 1 - Bibilia Kui Mdedie fo Kimochi

Ruwa adeda kwi Mana Oke

¹ Mbaṟi tsiweipfo tsifoi na njia natso Ruwa alemdeda na waku wadu kui waikimbi walya.

² Ili lyefurumia lya suku tsi alededa naso kui Mana, chu alembika mokyoṟya echioṟa shose. Nao nyio alembika nao na mandi halya.

³ Nyio ngela ya wuitoṟi woke na otambahalukio lo orie loke akamadie shose kui dedo lya pfinya yake; ili alemaa iwikaho kidaso kyeoloṟa mondu fo manyamaṟo kakudamiṟa owokonyi lo kulyo lo mng'ano ipfo huye.

Wunene wo Mana o Ruwa

⁴ Finya alewa moidya nayo wasu walya waele isumhanye rina aledumbuyo kui kyoṟa ling'anye hawo.

⁵ Kyamba nyi o ku o wasu walya waele alehenda imbia ma indi ke, “Iyo ui manoko, nyi inu ngamekufee.” Na lingi ke; “Inyi njechimbia Wande nao echinjiwiia Mana.”

⁶ Na iliindi aitsa ichu oke o wee ipfo mkambonyi fo wuyana ahambie, “Na wasu wa Ruwa wapfirie ndi oshangunyi loke wose.”

⁷ Kya wasu walya nyi ahambie, “Atana wasu wake mkuma na waṟundi wake awatana olewo lo modo.”

⁸ Indi kya Mana nyi kii-le, “Loṟika lopfo, hoi Ruwa, luikaa maheri halunganyi, na msenge fo wuhoṟotsu mfo msenge fo wumangi wopfo.

⁹ Ulekunda wuhoṟotsu kowesuo wumbafu. Nkyo kimarete Ruwa alekushimbuo, nyio Ruwa opfo kakushimbuo na mafuda hekapyo ngoru tsiidye waodoya wapfo.”

¹⁰ Lingi ke, “Hoi Mndumii, mandi ha mawokyonyi nyi iyo ulemwaala wanda ii, na maruwehu halya hai mawike nyi mawoko hapfo.

¹¹ Ho hechisia, indi iyo ochikaa. Hechikuo hose cha nguwo ii nṟae.

¹² Na cha nguwo ya ikonya ochihaoṟowya. Nyi hechilachika fana. Kya indi iyo ui ulya ulya na maka yapfo yechisenedapfo.”

¹³ Nyi alembie o ku o wasu walya waele ke, “Kudamiṟye owokonyi loko lo kulyo itane ngalaṟa wakituwa wapfo shi ya madende hapfo?”

¹⁴ Chi wai mumuyo yaṟunda wose iii-mme yeekyana na walya wai wateṟie okiio kyoṟa kyawo?