WACHILI 9 - Bibilia Kui Mdedie fo Kimochi

Abimeleki

¹ Abimeleki, mana o Gideoni kahenda ko wanawamae na wana wose wa oshari lo mae ipfo Shekemu, kawawia,

² “Dedenyi iya iya oshangunyi lo wandu wa iya Shekemu wose. Kiha kicha-cha-ho konu, ngesa wana wose makumi mfungade (70) wa kisoṟo wa Yerubaali wawaitoṟie ang'u nyi mana umu? Kumbuo ke inyi nyi samu yanu.”

³ Wana-wa-mae waichuo mbonyi-tso wakatsiedia ipfo Shekemu kose handu hake o, na wandu wose wa Shekemu wakadumbuo ke mwosha kipfa nawei mana o mayawo.

⁴ Wakamnenga kiheo kya rupia makumi mfungade (70) tsa fesa tsiwei mmbenyi ya Baal-berithi katsihaluo tsehuṟa wandu wa mtoolo na wandu wai masembo kundu wamwoshe.

⁵ Kaoshana nawo wakahenda Ofra ko ndeye oke na ipfo kawaha wana wamae wose makumi mfungade (70) huye ya iho limu. Kyaindi Yothamu, mana mtutu o Yerubabeli nalekia, kipfa naleowa.

⁶ Wandu wose wa oruka lo Shekemu na Beth-milo wakawada chila hafui na mnaṟa fo ipfo Shekemu, wakahaluo Abimeleki nawe mangi owo.

⁷ Yothamu kekiicho mbonyi i, kahenda ihoṟoka fumvuhu lya Gerizimu, kadeda na ṟu lying'anyi, “Njiadanyienyi, nyo wandu wa Shekemu kokoya mukundi Ruwa namuadanyienyi nyo.

⁸ Mkonu fumu mashidi halekure ihenda ishiha mangi. Nahong'u hakawia msinepfu, ‘Wa mangi huyadu!’

⁹ Kyaindi msinepfu fukahaluo, ‘Mukusaṟie kulako njechiidima ida iṟunda lyako lya mafuda hako hamalange mnu na hawode wahuru mnu hamakunde nyi maruwa na wandu njihende ikulisa wukiwa wo iitoṟia mashidi?’

¹⁰ Kiidima mashidi hakawia mkuyu, ‘Ncho iyo nowe mangi huyadu.’

¹¹ Kyaindi mkuyu fukahaluo na ihamba, ‘Ngesa nukusaṟie njechiidima ida iṟunda lyako lyewika ndunda tsako njicha tseloda njihende ikulisa wukiwa wo iitoṟia mashidi?’

¹² Kiidima mashidi hakawia msabibu, ‘Ncho iyo nowe mangi huyadu.’

¹³ Msabibu fukahaluo na ihamba, ‘Ngesa mokusaṟa njechiidima ida iṟunda lyako lyewuta mvinyo fokechihiṟa maruwa na wandu njihende ikulisa wukiwa wo iitoṟia mashidi?’

¹⁴ Lyefurumiaho, mashidi hose hakahendia ikidi lya msha lyifananyi na meera hakafuwia, ‘Ncho iyo nowe mangi huyadu.’

¹⁵ Ikidi lilya lya msha lyikahaluo, ‘Kokoya na lohi mokunda injilanga njiwe mangi, nchonyi mukae wanda ya maṟishe hako. Indi kokoya mulakundi iwuta wudo, modo fuwuke kiidi kya msha yako fumukoṟe itane forumatsa meresi ya Lebanoni.’”

¹⁶ Yotamu kaengeṟa ihamba, “A wulalu mulehaluo Abimeleki nawe mangi na makusaṟo mecha na wuhendelyi daa? Ngesa, na mulewutia Yerubabeli mecha kimu na oshari loke chandu kiwesumhanyi na mawuto hake?

¹⁷ Kake, ndeako nyi alereka moo foke kechimukapanyia na iwakiṟa muwuke ko Wamidiani!

¹⁸ Indi inu mopufukia oshari lo maaleaho na iwaha wana makumi mfungade (70) huye ya iho limu, kiidima mukahaluo Abimeleki mana o kisinga kya wande, nawe mangi o Washekemu, kimarete tupu nyi mndu o kishari kyanu.

¹⁹ Na wulalu, kui iindia Yerubaali na oshari loke, kyakusia chihiyonyi hamu na Abimeleki, nao nachihiyo kimu nanyo.

²⁰ Kyaindi kokoya chi wudo-pfo, modo fuwuke ko Abimeleki furumatse wandu wose wa Shekemu na Beth-milo na Abimeleki fuwemrumatsa.”

²¹ Kyasia Yothamu kasheṟuka kadichia Beeri kakaapfo kipfa naweowoe Abimeleki mano mae.

²² Abimeleki naleitoṟia huya Israeli maka iṟaṟu (3).

²³ Mndumii-Ruwa kadika mumuyo fo wukituwa kiidi kya Abimeleki na wandu wa Shekemu, nawo wakamleha.

²⁴ Nyi wudo wandu wa Shekemu walehoṟoyo kimu na Abimeleki mana o wamayawo kipfa kya wunesi wulya walewutia wana walya makumi mfungade (70) wa Yerubaali. Ngapo i ya wuwahi ilewakooya kipfa Abimileki nalewaha kechitaramana na wandu wa Shekemu.

²⁵ Wandu wa Shekemu wakakuṟeheṟa iamtsa shida wawute Abimeleki wumanginyi wokia shitonyohu sha fumvu. Wandu wo wakasoka wandu masaa hawo hose waledapfo. Abimeleki kawio mbonyi tso.

²⁶ Mkonu fumu Gaali, mana o Ebedi, hamu na wana wamae kahenda kakaa Shekemu. Wandu wa Shekemu wakamwambia wakamuidikia.

²⁷ Wakakure wakahenda mademenyi hawo ha msabibu, wakahaa ndunda tsa msabibu wakatsifindika kiidima wakatsikama wakasungusia mvinyo wakawika mfuho. Wakaanga mbenyi ya ruwa owo wakalya na inyo; kiidima wakaruma Abimeleki.

²⁸ Gaali mana o Ebedi kahamba, “Abimeleki nyiu? So iya Shekemu nyi wandu wa mbaṟi njiki itane loṟundia Abimeleki? Gideoni na Zebuli hamu na wanene wawo walesingia Hamori ndeye o Shekemu, wulalu kitewe so lusingie Abimeleki nki?

²⁹ Kima wandu wa wawei wanda yako njiwechiwuta Abimeleki kidinyi kya wuitoṟi. Njiwechiwia Abimeleki, ‘Engeṟa wandu wapfo wa shida, ncho lukoyane shidenyi.’”

³⁰ Zebuluni, mnene o mṟi kekiicho madedo ha Gaali mana o Ebedi nalepfuluko nyashi.

³¹ Kadikia Abimeleki ndumi ipfo Torma kehamba, “Gaali mana o Ebedi, kimu na wana wa mae waida na mṟi fo Shekemu wakatewa wandu wakulehe.

³² Kyasia, wuya iyo na wandu ui nawo kiheri kya kio, ulaaye ipfo mademenyi kufui na mṟi.

³³ Ilyi mandi mnengeṟi fochiwoka ido ngamenyi, usokie mṟi ko ngapano Gaali na wandu wake wakacha ikumbuhana na iyo uwawutie chandu kiwaṟi.”

³⁴ Abimeleki kakure na wandu wake awei nawo kashika Shekemu kiheri kya kio. Nalehawa wandu wake machekeṟo hana na ilaaya ipfo kufui na mṟi.

³⁵ Gaali, mana o Ebedi, kawuka na nja na ihoṟoka ipfo kichuminyi kya mṟi, kiheri nakyo Abimeleki na wandu wake wakawuka handu halya wawelaaya.

³⁶ Kiheri Gaali alembona kawia Zebuli, “Ambuya wandu wasoka wawuka shitoṟomosonyi sha fumvu. Zebuli kambia, ‘Iyo nyi uwonyi shiṟinje sha mafumvu kohamba kulako nyi wandu.’”

³⁷ Gaali kahamba se, “Ambuya wandu wasoka makidi hawi ha oruka na ichekeṟo lyingi lyicha ora lo mwaloni fo walasha.”

³⁸ Naalyo Zebuli kambia, “Ikudosa lyapfo nku lyahenda wulalu?” Chi iyo ulehamba, “Abimeleki nyiu? Kitewe lumsingie nki? Wulalu nyi wandu ulewamina; hendang'u ukapane nawo.”

³⁹ Gaali kakure kechisongoya wandu wa Shekemu na ikapana na Abimeleki.

⁴⁰ Gaali kalemo kadicha, na Abimeleki kamlatia. Wandu wafoi wakamamiṟo na ioloka njienyi mṟasa kichuminyi kya mṟi.

⁴¹ Abimeleki kakaa Aruina na Zebuli kafuna Gaali na wana wa mae wawuke mṟinyi fo.

⁴² Mkonu fuleosha, Abimeleki kaambia ndumi ke wandu wa Shekemu wawuka mṟinyi wakahenda mademenyi.

⁴³ Kaduo wandu wake kawahawa machekeṟo hana, kundu wahende ilaaya mademenyi. Kekiwona wandu wawuka mṟinyi, kawuka handu aweowie kawawaha.

⁴⁴ Abimeleki na ichekeṟo lyake wakahenda wedicha ihenda iringa kichumi kya mṟi. Machekeṟo halya hawi hakakapa walya wawelaaya mademenyi na iwawaha.

⁴⁵ Abimeleki kakapana na wenyi mṟi fo Shekemu, kawada mṟi fo kawaha wandu wose waweipfo. Kakoṟa mṟi fo na modo na ifuwikia monyo otiṟiwenyi

⁴⁶ Wandu wose wawei kiidi kya mnaṟa fo Shekemu wekiicho mbonyitso wakadichia ko mba ya ruwa elaho nyi El-berithi.

⁴⁷ Abimeleki kawio ke wandu wose wawei mnaṟenyi fo Shekemu wakusanzie handu hamu.

⁴⁸ Abimeleki na wandu wake wakahenda fumvuhu lya Salmoni, kaduo isoka kamanya iṟamba lya ikidi kalihekia kosohu lyake. Kiidima kawia wawei nao wakiṟaṟo ke wawute chandu o alewuta.

⁴⁹ Orio umu kamanya iṟamba cha lilya lya Abimeleki. Wakaduo maṟamba na ihahetsa mawandenyi ha otiṟiwa, wakahaatsa modo, fukakoṟa otiṟiwa lulya; wandu wose wasoṟo na waka washikie kiku kimu (1,000) wawei mnaṟenyi fo Shekemu wakapfa.

⁵⁰ Numa Abimeleki kahenda Thebesi, kafutengetia kafuwada.

⁵¹ Indi kuwewode mnaṟa mwikare makidi hawi ha mṟi. Kyasia wenyi wa mṟi fo womi na waka wakadichiapfo wakakushingia mba. Wakado itane washika mbehu fo mnaṟa fo.

⁵² Abimeleki kashika o mnaṟenyi na ifukapa, kyasia kashika kufui na mongo fo mnaṟa nafukoṟe.

⁵³ Mndu mka umu kakumba iseo lya huye, likapaṟa mdo fo Abimeleki.

⁵⁴ Naalyo Abimeleki kalaha manake oke ekeduo shisha shake kambia, “Somuo oshu lopfo nonjiwahe, wandu walache ihamba ke njilewoho nyi mdu mka.” Manake ulya kasomuo oshu loke, kamtocha kambaha.

⁵⁵ Waisraeli wekiwona ke Abimeleki amepfa, wakakure wakahenda orio umu kanyi koke.

⁵⁶ Nyi wudo Ruwa alehoṟuo Abimeleki kipfa kya deko lyake ko ndeye chandu alewaha wana wamae makumi mfungade (70).

⁵⁷ Kake Ruwa nalewetewa wandu wa Shekemu wahoṟuyo kipfa kya wuwicho wowo walewuuta. Ko ikyo oseso lo Yothamu mana o Yerubaali lukawakoya.