WACHILI 8 - Bibilia Kui Mdedie fo Kimochi

Wamidiani walemo kichikichi

¹ Wandu wa kishari kya Efraimu wakawesa Gideoni, “Nki ili uleluwutia kudi? Kitewe ulalulahe lilya ulehenda ikapana na Wamidiani?” Wawodo nyi nyashi.

² Kyaindi Gideoni kawahaluo, “Shindo njilewuta inyi chi kindo-pfo koṟinganyisha na shilya mulewuta nyo. Kindo wandu wa Efraimu walesanyia numa ya shilimu nyi shishicha kota shilimu sha wandu wako wa Abiezeri.

³ Ruwa nalewika mawokonyi hanu wanene wa Midiani, Orebu na Zeebu. Ngesa inyi njiwutie ki kiṟinganyisho nanyo?” Gideoni kekimaa ideda ado nyashi yawo ikahuo.

⁴ Gideoni na wodoe mahana haṟaṟu (300) wakashika Yordani, wakaambada. Ma chandu waweleheli wakawehenda iwingia wakituwa wawo.

⁵ Kyasia, kawia wandu wa Sukothi, “Hoi keinenga wodoya wa wako mkate kipfa waleheli mnu na inyi nawo njiengeṟa ihenda ishiha wamangi Zeba na Salmuna wa Midiani.”

⁶ Kyaindi wasongoru wa Sukothi wakammbesa, “Kitewe lumuinenge mkate nanyo mulamewinge Zeba na Salmuna nki?”

⁷ Gideoni kawahaluo, “Nnecha da, indi Mndumii-Ruwa ili mandi echiwika Zeba na Salmuna mawokonyi hako, njechiranduo randuo mbihu yanu na msha na mbeche tsa nuka.”

⁸ Kawuka pfo kahendia wandu wa Penueli, katerewa ado-ado. Wandu wa Penueli wakahaluo cha wandu walya wa Sukothi.

⁹ Gideoni kawawia, “Ngawuya na ofoṟo njechicha iwunduo mnaṟa-fu.”

¹⁰ Zeba na Salmina wawekeri ipfo Karkoni hamu na wandu wa mbahanyi shiku ikumi na shitanu (15,000) nyiwo tupu waletsuhaa kiidi kya wandu walya wa mbahanyi wa ora lo ngamenyi, kipfa wodoyawo shiku ihana na makumi hawi (120,000) walewoho.

¹¹ Gideoni kaosha njia ya ora lo kiukanyi ii ora lo ngamenyi lo Noba na Yogbeha kakapa wandu wa mbahanyi walawekuteseheṟie.

¹² Wamangi wa Midiani, Zeba na Salmuna walekusheṟuo wakadicha, kyaindi Gideoni kawawingia, kawawada wandu walya wa mbahanyi wakawado nyi wuowu wung'anyi.

¹³ Kiidima, Gideoni, mana o Yoashi, kawuya awuka shidenyi kaida ora lo msaṟi lo Heresi.

¹⁴ Kawada manake umu o Sukothi kammbesa mbonyi. Manake ulya kamṟehia marina ha wasongoru na wameku wa wandu wa Sukothi, itala lyawo lishikie wandu makumi mfungade na mfungade (77).

¹⁵ Gideoni kawuya ko wandu wa Sukothi kawawia, “Chi mukumburie chandu mulenjiruma mochihamba, ‘Kitewe lumuinenge mkate nki wandu wapfo waweleheli mnu nanyo mulamewinge Zeba na Salmuna?’ Kyasiang'u wulalu, Zeba na Salmuna aiwa.”

¹⁶ Kyasia, kaduo wameku wa Sukothi kawalosha echiwaranduo mbihu yawo na msha na mbeche.

¹⁷ Na wudo kawunduo mnaṟa fo Penueli na iwaha wenyi mṟi wose.

¹⁸ Kiidima kawesa Zeba na Salmina, “Wandu walya mulewaha ipfo Tabori wawei wada?” Wakahaluo, “Wawefananyi na iyo, walewono cha wana wa Mangi.”

¹⁹ Nao kawawia, “Iwo nyi wawei wana-wa-wama oko monjifee. So Ruwa ai na moo, kokoya mulalewawaha ma inyi njiwechimuwaha-pfo.”

²⁰ Kiidima kawia Yetheri, mana oke mmbee, “Hoṟoka nowawahe.” Kyaindi Yetheri kaowuo isomuo oshu loke kipfa nawei manake.

²¹ Zeba na Salmuna wakahamba, “Luwahe iyo kumonyi, kipfa iṟunda lyi nyi lya mndu ashitsie.” Gideoni kawawaha o amonyi kaduo shishela shilya shiwei nzingonyi ko ngamia tsawo.

²² Nahong'u Waisraeli wakawia Gideoni, “Iyo na uwe mnene odu, na numa yapfo wa oshari lopfo, kipfa omelukiṟa lukawuka ko Wamidiani.”

²³ Gideoni kawawia, “Inyi njechiwa mnene onu ma mana oko echiwa mnene onu-pfo. Mndumii-Ruwa nyio echiwa mnene onu.”

²⁴ Kiidima kawawia, “Njikundi imuterewa kindo kimu, ngaterewa orio umu nanjiinenge shilukuta shilya mulewada shidenyi.” Wamidiani walya kipfa nyi wawei Waishmaeli, waleṟaa shilukuta sha sahabu.

²⁵ Wandu wakamhaluo, “Nyi lochikuinenga ko msiha fo ikunda.” Wakaala nguwo na orio umu kakumba-ho shilukuta shilya shilewado shidenyi.

²⁶ Wulemeri wo shilukuta sho uwekundi wamuinenge shiwewode kilo makumi hawi (20). Ngoseṟa ya isho naleweambia rachi tsa madu, maṟao ha sambarao hekeṟao nyi wamangi wa Midiani na mshe iwei nzingonyi tsa ngamia tsawo.

²⁷ Gideoni kasungusia nasho kiringa kipeeta kakiwika kiidi kya mṟi fo Ofra. Waisraeli wose wakehenda-pfo ikiindia ko mbonyi tsa waṟuhui. Kiringa kipeeta-ki kikawa mdeho ko Gideoni na oshari loke.

²⁸ Kyasia Wamidiani wakalemo kichikichi walaoweshe-se Waisraeli, na oruka lo Israeli lukawada ofoṟo ko maka makumi hana (40).

Opfu lo Gideoni

²⁹ Gideoni, ichu elaho Yerubaali, mana o Yoashi kawuya na kanyi koke.

³⁰ Gideoni nawewode wana wa kisoṟo makumi mfungade (70), kipfa nawealikie waka wafoi.

³¹ Nawewode mka mtutu ipfo Shekemu kamfeeye mana umu o kisoṟo kamlaha Abimeleki.

³² Gideoni mana o Yoashi kapfa awode maka ifoi, kaṟiko kipfunyi kya Yoashi, ndeye, mṟinyi fo Ofra ya Waabiezeri.

³³ Gideoni amepfa Waisraeli wakawuuya maruwa ha Baali na ihaindia. Wakawika Baal-berithi nawe ruwa owo.

³⁴ Waisraeli wakahadima Mndumii-Ruwa, Ruwa owo, alewakiṟa na wakituwa wawo wawewatengetie njora tsose.

³⁵ Kake, walewutia wa oshari lo Yerubaali ichu elaho Gideoni mecha-pfo ma chandu alewuta mecha kiidi kya Israeli.