WACHILI 7 - Bibilia Kui Mdedie fo Kimochi

Gideoni awinga Wamidiani

¹ Yerubaali, ichu ekelaho nyi Gideoni hamu na wandu wose, wawei nao walekure kilawo, wakahenda ikaa pichinyi kufui na soka ya Harodi, na handu Wamidiani wawei nyi ora lo mtsudu kowo pichinyi kufui na fumvu lya More.

² Mndumii-Ruwa kawia Gideoni, “Wandu wa ui nawo nyi wafoi mnu nakamu koko inyi iwika Wamidiani mawokonyi hanu, Waisraeli walache ikushela oshangunyi loko na ihamba nyi walekukiṟa kui pfinya tsawo wawenyi.

³ Wulalu laha wandu wose uwawie ke, orio mndu ose ai mwowu ang'u ekededema nawuye na kanyi koke.” Nahong'u Gedioni kahesha wandu-wo, na wandu shiku makumi hawi na shiwi (22,000) wakawuya na kanyi wakatsuhaa wandu shiku ikumi (10,000).

⁴ Mndumii-Ruwa kawia Gideoni, “Ma kudo wandu-wo wafoi mnu, wulalu waduo medenyi na inyi njechiwaheshiapfo. Mndu oose njechikuwia, ‘Ichu nechihenda na iyo, icho nahende na iyo. Indi mndu oose njechikuwia echihenda na iyo pfo, icho nalahende na iyo.’”

⁵ Kyasia Gideoni kaduo wandu medenyi na Mndumii-Ruwa kambia, “Wandu wechikomba mṟinga cha kite, nochiwaletsana na walya wechipfira ndi wanyo mṟinga.”

⁶ Wandu walenyo mṟinga wodahia na mawoko hawo na ikomba cha kite waweshikie mahana haṟaṟu (300). Indi wengi wose waletsuhaa walepfira ndi wakanyo mṟinga.

⁷ Mndumii-Ruwa kawia Gideoni, “Ke wandu wo mahana haṟaṟu (300) walenyo mṟinga cha kite njechikiṟa Waisraeli na iwika Wamidiani mawokonyi hawo. Indi walya wengi wose wawuye na kanyi kowo.”

⁸ Kyasia, Gideoni kaduo shelya sha walya wawehenda na tarumbeta, kawasama wakuhendie kowo. Indi katsuhaa na wandu walya mahana haṟaṟu (300). Wandu na Midiani wawei pichinyi ora lo seri lowo.

⁹ Kio kilya, Mndumii-Ruwa kawia Gideoni, “Henda usokie kiidi kyawo kipfa njiwawikie mawokonyi hapfo.

¹⁰ Indi kokoya noowuo, henda kimu na mṟundi opfo Pura.

¹¹ Ipfo nochiicho kindo wadeda, na iyo nochiwada pfinya tsehenda iwakapa.” Kyasia, Gideoni kahenda na mṟundi oke Pura mṟasa handu ha waringi wa kamba lya kiṟaṟo kya Wamidiani.

¹² Wamidiani, Wameleki na wandu wose wa ora lo ngamenyi walelaa pichinyi cha nzihe, na ngamia tsawo tsilechiwa italo, tsifoi cha msanga fo wambaṟa lya ipalyipalyi.

¹³ Gideoni kekishika, kaicho mndu umu kechiongoya odoe ndodo yake. “Njilelodia ndodo. Njilewona mkate fo shayiri fochipiṟimka itane kiṟaṟonyi lya Wamidiani fukakapa ihema itane lyapfuluka huye kukahalukia wanda. Ihema lyikalaa wanda.”

¹⁴ Odoye kamhaluo, “Ikyo kyaṟingishia na pata ke oshu lo Mwisiraeli ulya Gideoni mana o Yoashi sa Mndumii-Ruwa amewika mawokonyi hake Wamediani handu hamu na ichekeṟo lyose.”

¹⁵ Gideoni kekiicho mbonyi tso na mdambuye fo ndodo iya, kaindia Ruwa. Kiidima kawuya na kiṟaṟonyi kya Waisraeli, kahamba, “Kurenyi luhende, kipfa Mndumii-Ruwa amewika wandu wa mbahanyi wa Wamidiani mawokonyi hadu.”

¹⁶ Kyasia, kahawa wandu walya mahana haṟaṟu (300) machekeṟo haṟaṟu, kawainenga maranda na shitosho shiwode shimunyi.

¹⁷ Kawawia, “Munjiambuye na iwuta chandu njechiwuta kiheri njechishika kiṟaṟonyi.

¹⁸ Kiheri njechikapa maranda, inyi kimu na ichekeṟo lyako, nanyo kapenyi maranda iwuka njora tsose na ideda ko ṟu ling'anyi, ‘Kipfa kya Mndumii-Ruwa na kipfa kya Gideoni!’”

¹⁹ Kokishika kio mahelehele, Gideoni na chekeṟo lyake lya wandu ihana limu (100) kudi ametikiria kiṟaṟo kya Wamidiani mawookionyi ha kamba lya kiidi kiheri wamemaa iilachana waringi waletikiria kiṟaṟonyi lya wakituwa. Wakakapa ombe na ifunja shitosho shilya wawei nasho.

²⁰ Makamba hose haṟaṟu handu hamu wakakapa maranda hawo na ifunja shitosho shawo. Mawoko hawo ha kumoso hawewode shimunyi na mawoko ha kulyo maranda na ihakapa wechihamba ko maṟu hang'anyi, “Oshu kipfa kya Mndumii-Ruwa na kipfa kya Gideoni!”

²¹ Wakahoṟoka orio mndu handu hake itengeta kiṟaṟo. Itoṟito lyose lya wakituwa wakarahanyika ipfo na ifpo wechifahiya.

²² Wandu wa Gideoni kiheri walekapa maranda hawo mahana haṟaṟu (300), Mndumii-Ruwa katewa Wamidiani wawoke iwahana wenyi na wenyi ipfo kiṟaṟonyi, waletsuhaa walekusheṟuo wakadicha mṟasa Serera wohenda Beth-shita, itane mṟasenyi fo Abel-Mehola kufui na Tabathi.

²³ Waisreli na kishari kya Naftali, Asheri na Manase, wakalaho wose wakawingia Wamidiani.

²⁴ Gideoni kaduma wandu kose kiidi kya oruka lo mafumvu ha Efraimu nawawie. “Sokenyi luhende ikoyana na Wamidiani na iwatirimisha ko iwada shimeda na meda fo Yordani mṟasa Beth-bara.” Kyasia, wasoṟo wose wa Efraimu wakacha wakawada meda fo Yordani mṟasa Beth-bara.

²⁵ Wakaduo wapfungo wasongoru wawi wa Midiani, nawo nyi Orebu na Zeebu. Wakawaha Orebu kiidi kya iṟaṟa lya Orebu, na Zeebu wakambahia onandenyi lo Zeebu wechiwingia Wamidiani. Wakaendie Gideoni mdo ya Orebu na Zeebu, ora lo kawi lo Yordani.