WACHILI 5 - Bibilia Kui Mdedie fo Kimochi

Kiimbo kya Debora

¹ Mkonu-fo, Debora na Baraka mana o Abinoamu, wakaimba kiimbo ki:-

² “Wasongoru walekuloṟa isongoya Waisraeli, wandu walekuwuta kui ikunda lyawo, Anenyi Mndumii-Ruwa.

³ “Adanyienyi, nyo wamangi, Dehenyi madu, nyo wanene! Njechiimbia Mndumii-Ruwa, Ruwa o Israeli.

⁴ “Iyo Mndumii-Ruwa, kiheri ulewuka Seiri, kiheri kulesoka fumvunyi lya Edomu, oruka lulededema, ngina iletonyitsa mṟinga ee da, mapuchi hakalekia mvuo.

⁵ Mafumvu haledihina oshangunyi lopfo, Mndumii-Ruwa, ee da, fumvu lya Sinai oshangunyi lopfo Mndumii-Ruwa, Ruwa o Israeli.

⁶ “Kiidima kya mkonu ya Shamgari, mana o Anathi, kiheri kya Yaeli, oṟoṟio luletsitsa iida orukenyi, wandu wa kyaṟo waleida mkonyi.

⁷ Kulewada-se wademi-pfo waletsitsa kiidi kya Israeli, mṟasa kiheri njilecha inyi Debora inyi njii mae o Israeli.

⁸ Walekusambuṟia maruwa mahenu, kukawada shida kiidi kya oruka Kyaindi kulewono msa awode oshu ang'u ngawo kiidi kya wandu shiku makumi hana (40,000) wa Israeli-pfo.

⁹ Njiṟumisha wasongoru wa Israeli walehoṟokia shida. Walekuwuta wawenyi ko ikunda lyawo. Anenyi Mndumii-Ruwa!

¹⁰ “Onguonyi, nyo wedooya nzoi njiili, Nyo mokedamia kundu kuale, masulia ha wuhuru, nyo mokechumia, njienyi onguonyi mbonyi ii.

¹¹ Imbenyi muelewetse waaria wa shiimbo, kundu kuwode maṟungu ha mṟinga onguonyi wuwinzi wo Mndumii-Ruwa, wuwinzi wo wademi wake kiidi kya Israeli. Nlyondi wandu wa Mndumii-Ruwa walesoka mongonyi.

¹² “Kure, kure, Debora Kure, kure, uimmbe kiimbo! Kure, Baraka mana o Abinoamu, noduo wapfungo wapfo.

¹³ Wandu wa mbahanyi walesoka, wandu wa Mndumii-Ruwa walehenda imkapanyia ko ulya awode pfinya.

¹⁴ “Wuka Efraimu walesokia pichinyi, Wakaosha wana wa mayawo, wandu wa Benyamini, wuka Makiri walesoka wandu wa mbahanyi, kuwuka Zabloni wanene wawo.

¹⁵ Wanene wa Isakari wakaoshana na Debora, Wandu wa Isakari, wahendeli ko Baraka, Wakamwosha wedicha mṟasa pichinyi. Kyaindi kiidi kya shishari sha mbai kuwewode ikapa kawi kufoi.

¹⁶ Kitewe walekaa mfiṟihenyi? Iadanyia machondi heana? Kiidi kya shishari sha Rubeni kuwewode ikapa kawi kufoi.

¹⁷ Kishari kya Gileadi kiledeo molyolya fo Yordani, kishari kya Dani nkitewe muledeo merikebuni uki? Kishari lya Asheri kilekaa olele wambaṟa ya ipalyipalyi, oo mbai ya ipalyipalyi kokyo.

¹⁸ Wandu wa Zabloni nyi wandu walereka moo yawo kiidi kya opfu ma wandu wa Naftali walereka moo yawo kiidi kya madema hakuirie.

¹⁹ “Ipfo Taanaki, mbai ya soka tsa Megido, wamangi walecha, wakakapana, wamangi wa Kaanani walekapana indi walewada ma shindo sha fesa-pfo.

²⁰ Nyenyeri tsa ruwehu tsiwewei shidenyi, tsileosha njia tsawo, tsikakapana na Sisera.

²¹ Mfu fo meda Kishoni fulewaduo kuleshe, ee da, mfu fung'anyi fo meda Kishoni, wanza ohendo lo pfinya, iyo mrima foko!

²² “Mbahachu tsa frasi tsilechuma chuma mtiṟi ikaichio.

²³ Malaika o Mndumii-Ruwa nahamba adi, “Sesenyi mṟi fo Merosi Sesenyi wenyi mṟi kopfinya, kipfa walalecha itarama Mndumii-Ruwa.

²⁴ “Nawikio ona kota waka wose Yadi, mka o Heberi, mkeni. Ee da, nambikie ona kota waka wose wekekaa mahemenyi.

²⁵ Sisera nalemterewa mṟinga, nao kamnenga maruwa; kamwendie mafuda ha msika, Kitelenyi kya wuitori.

²⁶ Ko owoko lumu nalewada, kyatso kya ihema, na owoko lo kulyo kiria kya Waaria, nalepaṟa Sisera mdo, kafunja na ipaṟapaṟa kyanda kyake.

²⁷ Sisera nalekulema, kaoloka; kalaa sau mademenyi hake, ilyi alekulema nalyo aleoloka kapfa.”

²⁸ “Mae o Sisera kaambuya aitsa meso itiṟishenyi kaimehia ipfo shiwangowangonyi kaicho mawawio. Kitewe igari lyake lyikeleo nki? Kitewe kulaichio mtiṟi fo magari hake?

²⁹ Waka wenyi wulaanyi wakamhaluo; kawuyo nyi moo ko ikyo walemhaluo:

³⁰ “Kofia wakeri ishiha na ihawana shiwade shidenyi, mana o waka umu ang'u wawi ko orio mbahanyi; Nguwo ya sufu njiṟehe, na mshe iwi njichope kipfa kya nzingo yako!

³¹ “Ee Mndumii-Ruwa, wasaramae wakituwa wapfo wose! Kyaindi mbuya tsafo wawe cha mnengeṟi, kiheri fodo na ngela yafo ing'anyi!” Na oruka lukawada ofoṟo maka makumi hana (40).