WACHILI 4 - Bibilia Kui Mdedie fo Kimochi

Debora, Baraka na Yaeli

¹ Ehudi amepfa, Waisraeli wakawewuta-se mawicho oshangunyi lo Mndumii-Ruwa.

² Mndumii-Ruwa kawadambika mawokonyi ha Yabini mangi o Wakaanani, awekekaa Hazori. Mnene o wandu wa mbahanyi, nyi Sisera o kikunyi kya Haosheth-hagoimu.

³ Mangi Yabini nawewode magari ha shida ha menya mahana kenda (900) kalisa Waisraeli wukiwa wo maka makumi hawi (20), nawo wakafihiṟia Mndumii-Ruwa nawatarame.

⁴ Mandi-ho kuwewode mwikimbi mka elaho nyi Debora, mka o Lapidothi awei mchili o Waisraeli mandi-ho.

⁵ Debora nawewode mwichiwie fodamia wanda ya mtende folaho nyi mtende fo Debora, fuwei makidi hawi ha mṟi fo Rama na mṟi fo Betheli orukenyi lo mafumvu ha Efraimu. Wandu wa Israeli wakamchea kundu nawadumbuye mbonyi tso.

⁶ Mkonu fumu kalaha Baraka mana o Abinoamu o Kadeshi orukenyi lo Naftali. Kechicha kambia, “Mndumii-Ruwa, Ruwa o Israeli, nakuwia adi, ‘Henda usanyie wandu wapfo fumvuhu lya Tabori, nosambuṟe wandu shiku ikumi (10,000) kiidi kya shishari sha Naftali na Zabloni.

⁷ Inyi njechisuwia Sisera, mnene o wandu wa mbahanyi o Yabni, nache na mbahanyi tsa shida na magari hake ikapana na iyo medenyi fo Kishoni, na imbika mawokonyi hapfo.’”

⁸ Baraka kawia Debora, “Kokoya nochihendesana na inyi njechihenda. Kyaindi kulahendesane na inyi njechihendapfo.”

⁹ Debora kamhaluo, “Nnecha njechihenda na iyo; kyaindi Mndumii-Ruwa nechiwika Sisera mawokonyi ha isuria na iyo ochiwona kiṟumi kyose pfo.” Kyasia Debora kaoshana na Baraka ihenda Kedeshi.

¹⁰ Baraka kalaha shishari sha Naftali na Zabloni ipfo Kedeshi, wandu shiku ikumi (10,000) wakamwosha. Debora kahenda nao.

¹¹ Mandi-ho, Heberi, Mkeni, nawelekanyi na Wakeni wodoye wa kipaṟika kya Hobabu ndeye o mka o Mose. Nawewikie ihema lyake kuleshe kiidi kya mwaloni fo Sa-anawimu, hafui na Kedeshi.

¹² Sisera kechiicho mbonyi ke Baraka mana o Abinoamu nahenda fumvunyi lya Tabori,

¹³ kasanyia ichekeṟo lyake lyose na magari hake ha menya mahana kenda (900), kakure Harosheth-hapoimu, kahenda medenyi fo Kishoni.

¹⁴ Debora kawia Baraka, “Kure! Inu nyi mkonu fulya Mndumii-Ruwa echidambika Sisera mawokonyi hapfo. Mndumii-Ruwa nechihenda kusonguo kopfo.” Kyasia, Baraka kasoka awuka fumvuhu lya Tabosi kechisongoya wandu wake shiku ikumi (10,000).

¹⁵ Baraka kakapana, na Mndumii-Ruwa kadichiṟa Sisera na ichekeṟo itorito lyake lyose oshangunyi lo Baraka kui oshu. Sisera kawuka igarinyi lyake kadicha na madende.

¹⁶ Baraka kaosha ichekeṟo-lyo na magari mṟasa Harosheth-hagoimu kawaha wandu wose wa shida wa Sisera ko oshu; nalaashuke-ho ma umu.

¹⁷ Kyaindi Sisera kadicha na madende mṟasa ihemenyi lya Yaeli, mka o Heberi, mkeni. Nalewuta ado kipfa kuwewode ofoṟo kiidi kya mangi Yabini o Hazori na kishari kya Heberi.

¹⁸ Yaeli kakure ihenda iambia Sisera, kambia, “Mndumii, kuchee na koko, manya kulaowuo.” Kaida na ihemenyi, kamshikia na isulia.

¹⁹ Sisera kawia Yaeli, “Ngaterewa mṟinga njinyo kipfa njimwaangari mnu.” Kamnenga maruwa handu ha mṟinga, kiidima kamshikia-se.

²⁰ Sisera kambia, “Hoṟoka oo mongonyi fo ihema. Mndu oose kacha ikuwesa kokooya kuwode mndu oose ungi, mbie kuwodepfo.”

²¹ Kyaindi Yaeli, mka o Heberi, kaduo kyatso kya ihema na kiria, kamhendia wo owelyia kakapia kyatso kilya kya ihema o kyamunyi kikaṟuhukia ora lo kawi itane terinyi, kipfa nawelee piu kipfa kya ilehela. Kyasia, Sisera kapfia oo oo.

²² Kiheri Baraka awei iosha Sisera nambone, Yaeli kawuka nja ihenda imwambia kambia, “Ncho njikuloṟe icho uimshiha.” Baraka kaida na ihemenyi lya Yaeli kakooya Sisera wanda, apfie na kyatso kilya kya ihema kii kyamunyi kyake.

²³ Nyi wudong'u Ruwa kainenga Waisraeli wuwinzi ko mangi Yabini o Kaanani.

²⁴ Waisraeli wakaengeṟa iwingia Yabini mangi o Wakaanani mṟasa wakamrumatsa.