WACHILI 3 - Bibilia Kui Mdedie fo Kimochi

Wandu wamkambo wadeo kulya orukenyi

¹ Mndumii-Ruwa naleda mkambo ifoi kiidi kya Waisraeli kundu iwaheshe kipfa Waisraeli wo wawemekapane shida yose orukenyi lo Kaananyi pfo,

² (nalewuta ado kundu nainenge wandu wa oshari lo wuaria wo shida kipfa wawemewone shida-pfo).

³ Wanene watanu wa Wafilisti, Wakaanani wose, Wasidonyi na Wahevi walesamia mafumvuhu ha Lebanoni kuwuka fumvu lya Baal-Lermonyi mṟasa ishika Hamathi.

⁴ Mndumii-Ruwa nawekuṟeheṟie iwada wandu-wo naheshe Waisraeli, nawone kokoya wechiindia mawawaso hake awewawasie waku wawo kui iidia ko Mose.

⁵ Kyasia, Waisraeli walekaa kimu na Wakaanani, Wahiti, Waamori, Waperizi, Wahivi na Wayebusi.

⁶ Wakaalyika na ialyikia wana wawo wandu-wa wa mkambo njihenu na iindia maruwa hawo.

Othnieli

⁷ Waisraeli wakawuta wunyamaṟi oshangunyi lo Mndumii-Ruwa; wakahadima Mndumii-Ruwa, Ruwa owo wakaindia Mabaali na Maashera.

⁸ Kyasia, nyashi ya Mndumii-Ruwa ikaakia Waisraeli, kawadambika mawokonyi ha Kushan-rishathaimu mangi o Mesopotamia nawo wakamṟundia maka nyanya (8).

⁹ Waisraeli wakafuhia Mndumii-Ruwa nao kawadikia mndu mowakiṟa elaho Othinieli mana o Kenazi, manawo o Kalebi.

¹⁰ Kyasia, mumuyo fo Mndumii-Ruwa fukachea Othinieli, nao kawa mchili o Waisraeli. Othinieli kahenda shidenyi nao Mndumii-Ruwa kadambika Kushan-rishathaimu mangi o Mesopotamia mawokonyi hake.

¹¹ Nalyo oruka lukawada ofoṟo maka makumi hana (40). Kyasia Othinieli mana o Kenazi kapfa.

Ehudi

¹² Waisraeli wakawuta-se wunyamaṟi oshangunyi lo Mndumii-Ruwa. Mndumii-Ruwa kainenga pfinya Mangi Egloni o Moabu nakape Waisraeli, kipfa walewuta wunyamaṟi oshangunyi lo Mndumii-Ruwa.

¹³ Egloni kasanyia Waamori na Waamaleki, kahenda ikapana na Waisraeli kawawinga. Kawada mṟi fo Makangachi, nyi fo Yeriko.

¹⁴ Waisraeli wakaṟundia Egloni mangi o Moabu, handu ha maka ikumi na nyanya (18).

¹⁵ Kyaindi Waisraeli wakafuhia Mndumii-Ruwa, nao kawadikia mowakiṟa, ai Ehudi awei owoko lo kumoso, mana o Gera o oshari lo Benyamini. Waisraeli walemduma naduo shindo sha nnga ko Egloni mangi o Moabu.

¹⁶ Ehudi katsana oshu lo mmbeha kuwi, wuleshe wolo nyi sentimita (50). Kalupfungia kitsinyi kyake ora lo kulyo kalushikia na maṟao hake.

¹⁷ Kiidima kadaaya Egloni shindo shilya sha nnga. Egloni nyi awei mndu mlandari mnu.

¹⁸ Ehudi kekimarisa iwuta shindo shilya sha nnga, kawia wandu walya wawekudikie wahende.

¹⁹ Kyaindi oo kekishika handu hawode sanamu tsa maho hamapache kufui na Gilgali, kawuuya Egloni kahamba, “Njiwode kidedo kya kiṟika kopfo iyo mangi. “Mangi kawawasa waṟundi wake watsie sau, nawo wakahenda nja.”

²⁰ Nao Ehudi kasemmbelia alya handu awekeri kiidi kya kiṟiha kyake kiwode mmbeo o kyanja, kambia, “Njiwode mbonyi yapfo iwukie ko Ruwa.” Mangi kakure kiidinyi kyake kahoṟoka.

²¹ Ehudi kasoṟomuo oshu loke ko owoko loke lo kumoso luwei owaenyi lo kulyo, kamfoṟoha nalo ndewunyi yake.

²² Oshu lulya lukaida itane kiidi kewada, onga lukashikia oshu lulya kipfa Ehudi alelusoṟomuo-ho-pfo kipfa luweambadie kya nduma.

²³ Kiidima Ehudi kawuka na nja amemaa ishinga mongo ya kiṟiha-kyo kui opfunguo.

²⁴ Ehudi kekihenda, waṟundi wa mangi wakawuya. Wekiwona mongo yose ya kiṟiha injishinge, wakakusaṟa kofia nalehenda ipucha mada ipfo mba.

²⁵ Wakaweda mnu wakawooka ikusaṟa nyi kiki. Wekiwona alaṟuhuo mongo, wakaduo opfunguo wakaṟuhuo mongo. Wakawona mangi yawo ahoie wanda, nao napfiie.

²⁶ Kiheri wawei iweda, Ehudi nalesheṟuka kaida kundu kuwode sanamu tsa maho kahenda Seira.

²⁷ Kekishika-pfo kakapa ombe kiidi kya oruka lo mafumvu ha Efraimu, na Waisraeli wakasoka kimu nao wawuka mafumvunyi nao kawasongoya.

²⁸ Kawawia, “Njioshenyi kipfa Mndumii-Ruwa amewika wakituwa wanu Wamoabu mawokonyi hadu.” Wakamwosha itane kiambadio kya Yordani na ikiwada wakakiwuta mawokonyi ha Wamoabu, wakashingia mndu ose nalaide.

²⁹ Mkonu-fo wakawaha Wamoabu washikie shiku ikumi (10,000), wandu wose wenyi oru na pfinya, kuwode manya umu alekia-pfo.

³⁰ Mkonu naafo Waisraeli wakawinga Wamoabu. Oruka lukawada ofoṟo handu ha maka makumi nyanya (80).

Shamgari

³¹ Numa ya Ehudi mana Anati, Shamgari kawada handu hake. Nao kawaha Wafilisti mahana haṟandaṟu (600) kui olio lolisa mbe. Nao da, nalewekiṟa Waisraeli.