WACHILI 21 - Bibilia Kui Mdedie fo Kimochi

Ioṟase lya kishari kya Benyamini

¹ Waisraeli wawelyiie nyamu ipfo Mispa ke kuwode manya mndu echilekia mana oke o kika naaliko nyi manake o kishari kya Benyamini pfo.

² Kyasia, wakahenda mṟasa Betheli wakakaa oshangunyi lo Mndumii-Ruwa mṟasa kyukanyi. Wakafihiṟa na ṟu lying'anyi waichuo wukiwa.

³ Wakahamba, “Hoi Mndumii-Ruwa, Ruwa o Israeli kitewe kindo ki kyalukoya itane lochilio nyi kishari kimu kiidi kya Israeli?”

⁴ Ili lya ngama wandu walekure kilawo wakasungusia rasio, wakalekia mwano yemaya modonyi na mwano ya ofoṟo.

⁵ Kiidima wakawesana, “Ngesa kiidi kya njoshari tsose tsa wana wa Israeli kuwode alaleshika chilenyi iya ya Mndumii-Ruwa? Wawelyiiye nyamu ke icho oose eda alashika chilenyi nechiwoho.”

⁶ Indi Waisraeli wakaichio wukiwa wana wa mayawo wa kishari kya Benyamini wakahamba, “Inu oshari lumu lo Israeli losaramaya.”

⁷ Wulalu lochiwika kuda kundu luwawonyie waka wawo?

⁸ Wakunda imanya kokoya kuwewode kisiṟi kitutu kya kishari kya Israeli kilalehenda chilenyi oshangunyi lo Mndumii-Ruwa ipfo Mispa. Wakamanya ke kuwode mndu oose kuwuka Yabesh-gileadi alecha na chilenyi-pfo.

⁹ Waisraeli wekitalo ipfo Mispa kuwode mndu oose o Yabesh-gileadi aleshikapfo pfo.

¹⁰ Ko ikyo mamiingi fo Israeli fukadika wandu wake shiku ikumi na shiwi (12,000) wai ngohoda mnu nakamu na iwatutuma, “Hendenyi muwahe wandu wa Yabesh-gileadi, waka na wana

¹¹ mochiwaha wasoṟo wose na waka wose walai wakeha.”

¹² Kyasia wakakooya kiidi kya wenyi ya Yabesh-Gileadi wana wa kika mahana hana (400) walawemelae na mndu msoṟo oose. Wakawaduma kiṟaṟonyi ipfo Shilo orukenyi lo Kaanani.

¹³ Nahong'u mamiingi fose fukadiko ndumi ya ofoṟo ko wandu wa kishari kya Benyamini iwo wawei iṟaṟehu lya Rimoni.

¹⁴ Wasoṟo wo wa kishari kya Benyamini wakawuuya wodoyawo matika halya halya. Kyasia wakainengo waka walya walekiṟo ipfo Yabesh-gileadi. Indi waka wo walewashikapfo.

¹⁵ Waisraeli wakawaichio wukiwa kishari kya Benyamini kipfa Mndumii-Ruwa naletewa kuwade mṟasa kiidi kya Israeli.

¹⁶ Nahong'u wameku wa mamiingi fose wakahamba, “Wulalu lochiwika kuda luwonyie wasoṟo wa waka kipfa walya wa kishari kya Benyamini walesaramaya?

¹⁷ Na kikaki wasoṟo-wa waletsuhaa wa Benyamini wainengo waka kundu wapfumbutse oshari, kundu luladetse kishari kyose kiidi kya Israeli.

¹⁸ Indi lochiidima iwuta wana wadu wa kika wawe waka wawopfo, kipfa lulemalya nyamu ke kuwode momu fowuta wana wa kika wadu konupfo - ichu mowuta ado naseso.”

¹⁹ Kyasia, wakakumbuo mkonu mnene fo Mndumii-Ruwa fuwekewutika ipfo Shilo, mṟi fui ora lo mtsudu lo Betheli, Mtandaṟenyi fuwukie Betheli wohenda Shekemu, fuwei kufui.

²⁰ Ko ikyo wakawawasa wasoṟo walya wa kishari kya Benyamini, “Hendenyi muowe wolaaya ipfo mademenyi ha msabibu.”

²¹ Mlae Chowe . Wana wa kika wa Shilo ili wechicha na nja itema kiheri ya mfuho, wukenyi ipfo msabibunyi na orio mndu nawade mana o waka umu nawe mka oke. Nahong'u muwuye orukenyi lo Benyamini.

²² Wandeawo ang'u wasacha wawo wakacha iluwesawesa kyawo lochiwawia, “So nyi lomuterewa musaṟie wandu wa Benyamini na iwada waduo waka wo, kipfa lulewawada kiidi kya shida ya Yabesh-gileadi. Na chandu nyo muwenyi mulaleluinenga wana wanu wa kika, mochianduyo-pfo.”

²³ Wasoṟo walya wa kishari kya Benyamini wakawuta wado, orio umu kakusambuṟia mana o waka kiidi kya wanawawaka walewuka nja wakatema ipfo Shilo na imduo kawa mka oke. Kiidima wakawuya na handu hawo, wakawika wuhya mṟi yawo na ikaapfo.

²⁴ Kiheri na ikyo Waisraeli wakakure, orio umu kawuya na handu hake na kishari kyake na mba yake. Orio mndu kahenda handu halya alehawio.

²⁵ Maheri ho kuwewode mangi kiidi kya Israeli pfo. Orio mndu nalewuta kindo kyose alewona kikeri kicha.