WACHILI 20 - Bibilia Kui Mdedie fo Kimochi

Waisraeli wakuteseheṟa ikapana shida

¹ Wandu wose wa Israeli, wokia Dani itane Beer-sheba, hamu na wandu wa oruka lo Gileadi, oshari lose walekusanzia ipfo Mispa, oshangunyi lo Mndumii-Ruwa.

² Wasongoru wose wa njoshari tsa Israeli wakacha na ipfo chilenyi ya wandu wose wa Ruwa. Wose, wawesanganyi wandu wa shida wa madende wawode shisha shiku mahana hana (400,000).

³ Wandu wa kishari kya Benyamini wakaicho mbonyi ke wandu walya wengi wa Israeli wa kusanzie ipfo Mispa. Kyasia, Waisraeli wakawesa msoṟo ulya Mlawi “Luongoye, wuwicho-wu wulewutika kuda?”

⁴ Na Mlawi ulya kahaluo kahamba, “Inyi na isuria lyako, luleshika mṟinyi fo Gibea, mṟi fo kishari kya Benyamini kundu lulae-pfo kio.

⁵ Kyaindi wandu wa mṟi fo Gibea wakacha kio wakatengeta mba iya luwelee pfo. Wawerie injiwaha, wakawutia isuria lyako mkao mbicho wakalaa nao itane apfa.

⁶ Ngaduo mnying'a foke ngamdumbuo-dumbuo shiteno na ishiduo ko shishari shose sha Israeli, kipfa walewuta kindo kiwicho kya wusutsu kiidi kya Israeli.

⁷ Lanye Waisraeli, chilenyi muwike mwanduye fonu.”

⁸ Wandu wose kui mhie fumu, wakahoṟoka na ihamba, “Kuwode umu odu echiwuya ihemenyi lyake ang'u mbenyi yake pfo.

⁹ Ni wudi lochiwuta kirianyi na Gibea. Lochikapa kuṟu-kuhya chandu lochiwaṟinjawia.

¹⁰ Lochisambuṟa wandu ikumi (10) kiidi kya orio wandu ihana limu (100) lya Israeli, wandu ihana limu (100) kiidi kya wandu kiku kimu (1,000), wandu kiku kimu (1,000) kiidi kya wandu shiku ikumi (10,000). Iṟunda lyawo nyi iendie wodoyawo kando iwo wehoṟuo mṟi fo Gibea kiidi kya oruka lo Benyamini ko mbutie fu fo ngafu na wutondo wu walewuta kiidi kya Israeli.”

¹¹ Ko ikyo wasoṟo wose wa Israeli wakasanza na mrima fumu ikapana na mṟi fo Gibea.

¹² Wandu wa shishari sha Israeli wakaduma ndumi mṟasa orio handu ko kishari kya Benyamini, wehamba, “Ngesa nyi wuwicho wuki wulechea ipfo konu?

¹³ Wulalu luinengenyi wandu wo wawicho wawuṟie sonu wa Gibea kundu luwawahe na isanja wukiwa kiidi kya Israeli.” Kyaindi wandu wa oshari lo Benyamini waleadanyia wana wa mayawo wa Israeli pfo.

¹⁴ Kyasia wakakusanza ipfo Gibea wawuka orio mṟi fowo, kundu wakapane na Israeli.

¹⁵ Wandu wa oshari lo Benyamini wakakusanza wawuka mṟinyi yawo mamiingi fo wandu shiku makumi hawi na shiṟandaṟu (26,000) wa shida, na wandu wengi wa Gibea wakasanza wandu mahana mfungade wasambuṟe (700).

¹⁶ Kiidi kya wandu wo mahana mfungade (700) kuwewode wandu mahana mfungade (700) wawekeṟunda na kumoso, orio umu nawekeidima ikumba iho kaṟunga ochui alechiluasha.

¹⁷ Waisraeli, da kishari kya Benyamini wawesanzie wandu shiku mahana hana (400,000) weidima iwada shisha. Wose wawei wandu wa shida.

¹⁸ Waisraeli wakahenda Betheli iwesa ko Ruwa, kundu wamanye kishari kechisonguo ihenda ikapana na wandu wa Benyamini. Mndumii-Ruwa kahamba kishari kya Yuda kiwoke.

¹⁹ Kyasia, Waisraeli wakahenda ngamenyi wakawika kiṟaṟo kyawo hafui na mṟi fo Gibea.

²⁰ Waisraeli wakahenda ikapana na wandu wa kishari kya Benyamini kufui na Gibea.

²¹ Wandu wa kishari kya Benyamini wakawuka nja ya mṟi fo Gibea wakakapana na Waisraeli, wakawaombotsa wanda mkonu-fo wandu wa Israeli shiku makumi hawi na shiwi (22,000).

²² Indi Waisraeli wakakuwanza na ikusaya kya shida handu halya walekusaya lya kuwoka.

²³ Kyasia Waisraeli wakado huye, wakafihiṟia Mndumii-Ruwa mṟasa kyukanyi. Kiidima wakaterewa mbonyi ko Mndumii-Ruwa. “Ngesa luhendese ikapana na wodoyadu wa kishari kya Benyamini?” Mndumii-Ruwa kawahaluo, “Hendenyi ikapana nawo.”

²⁴ Mfiri fu fo kawi Waisraeli wakasembelia ikapana na wandu wa kishari kya Benyamini.

²⁵ Mfiri fo wandu wa kishari kya Benyamini wakawuka Gibea na ikapana na Israeli, wakaolotsa wanda Waisraeli shiku ikumi na nyanya (18,000).

²⁶ Wandu wose wa mbahanyi wa Israeli wakahenda Betheli. Walekaa oshangunyi lo Mndumii-Ruwa wechifihiṟa na ikuotoya mṟasa kyukanyi. Wakawutia Mndumii-Ruwa mwano yemaya modonyi na mwano ya ofoṟo.

²⁷ Waisraeli wakaterewa Ruwa nawainenge oloho. Kiheri kyo isanduku lya mkundana lya Mndumii-Ruwa liwei ipfo Betheli.

²⁸ Finehasi mana o Eliezeri, mana o Aroni nawewode iṟunda lyeṟundia oshangunyi lo Mndumi Ruwa. Waisraeli wakawesa Mndumii-Ruwa, “Ngesa luhende-se ngapanonyi lukapane na wana wa mayadu, wandu wa oshari lo Benyameni?” Mndumii-Ruwa kawawia, “Hendenyi, ngama njechiwawika mawokonyi hanu.”

²⁹ Nahong'u Waisraeli wakawika wandu handu ha maowionyi itengeta mṟi fo Gibea.

³⁰ Waisraeli wakahenda ikapana na wandu wa kishari kya Benyameni kiidi kya mkonu fo kaṟaṟu. Wakakaa kusonguo ko mṟi fo Gibea cha kuwoka.

³¹ Wandu wa kishari kya Benyameni wekiwuka mṟinyi iwoka ikapana na Israeli, wakalanga iwuka nja ya mṟi. Kikawa chandu walewuta kuwoka wakawaha wandu maata mṟasa omongo lunene luhendie Betheli na Gibea, mṟasa nuka. Wakawaha Waisraeli washikie wandu makumi haṟaṟu (30).

³² Wandu wa kishari kya Benyameni wakakusaṟa, “Lowakapa cha kiheri kingi.” Indi Waisraeli wakahamba “Luwakuruo lochidicha itane wawuka mṟinyi mṟasa washika omongo lung'anyi.”

³³ Wandu wa Israeli wakacha wakakuṟeheṟa ipfo Baal-Tamari. Wodoya wawo waweowie wakacha owinyi ora lo kyukanyi lo mṟi fo Gibea.

³⁴ Wandu wa mbahanyi wasambuṟe kiidi kya shishari sha Israeli wakaafukia oshangunyi lo mṟi fo Gibea. Shida ya mkonu-fo ikawa njiwawo. Kyaindi wandu wa Benyamini waweichi ke isaramaya lyawo lyiwei hafui pfo.

³⁵ Mndumii-Ruwa kawinga wandu wa kishari kya Benyameni oshangunyi lo Israeli. Waisraeli wakawaha wandu shiku makumihawi na shitanu na ihana limu (25,100). Iwo wose walewoho nyi wandu wa mbahanyi wawewode wuaria wokapana na shisha.

³⁶ Nahong'u wandu wa oshari lo Benyameni wakawa ke wawingo. Waisraeli wakawuya numa wekuloṟa ke wadicha wandu wa kishari kya Benyameni, kipfa wawekusirie wodoyawo iwo wawewaṟikie wolaaya mṟi fo Gibea.

³⁷ Walya wawewaowishe wakacha owinyi wakasaṟikia mṟi fo Gibea na wakawaha wandu ko oshu.

³⁸ Waweidikianyi na wandu wengi wa Israeli ko kichano kimu. Iidikiana lyawo liwei lilya wawei maowionyi wakamewona mtsu fung'anyi fuwuka mṟinyi

³⁹ naho, wasaṟikie mṟi fo. Kiheri kyo wandu wa Benyamini wawemewaha wandu makumi haṟaṟu wakawiana, “Lowakapa cha kuwoka.”

⁴⁰ Kyaindi kichano kilya kya ngo ya mtsu kekiwono kulya mṟinyi, kishari kya Benyamini wekiwona wakaṟihiyo wekiwona mṟi fowo furumara kui modo.

⁴¹ Nalyo Waisraeli wakahaluka na wandu wa kishari kya Benyameni wakawado nyi wuowu wung'anyi kipfa walewona isaramaya lyawo lyashika kufui.

⁴² Ko ikyo wakahaluka, wakadicha Waisraeli wohenda kya nuka ya msanga, ma kudo shida ikawawa ikakoya wai makidi hawi ha machekeṟo hawi ha Waisraeli, na maskari walewuka mṟi mnene wakawarumatsa.

⁴³ Waisraeli wakatengetia na iwaringichia wakawaosha wokia Noha mṟasa ora lo ngamenyi lo Gibea mṟinyi wakawaha wandu sa wafoi.

⁴⁴ Mkonu fo wandu shiku ikumi na nyanya (18,000) wa kishari kya Benyamini hamu na waringi wawo walewoho.

⁴⁵ Wandu wengi wa kishari kya Benyamini wakahaluka wakadicha woambuya kya nuka ya msanga mṟasa iṟaṟa lya Rimoni. Na wandu wengi shiku shitanu (5,000) walewohiyo mtandaṟenyi wechidicha. Waisraeli waleengeṟa iwaosha kui owawo lo lohi wandu wa kishari kya Benyamini mṟasa mṟinyi fo Gidomu wakawaha wandu shiku shiwi (2,000).

⁴⁶ Itala lya wandu wose wa kishari kya Benyamini walewoho mkonufo waweshikie wandu shiku makumi hawi na shitanu (25,000), wandu wa mbahanyi wekapana na shisha.

⁴⁷ Kyaindi wasoṟo mahana haṟandaṟu (600) wa kishari kya Benyamini walesheṟuka na idichia nuka ya msanga itane iṟaṟa lya Rimoni, wakakaa pfo meri ina (4).

⁴⁸ Wandu wa Israeli wakahalukia wandu wengi wa kishari kya Benyamini wakawawaha wose: wasoṟo, waka, wana na shiuma. Na mṟi iya waleikoya-pfo wakairumatsa na modo.