WACHILI 2 - Bibilia Kui Mdedie fo Kimochi

Malaika o Mndumii kulya Bokimu

¹ Malaika o Mndumii-Ruwa kakure Gilgali, kahenda Bokimu, kawia Waisraeli, “Njilemuwuta orukenyi lo Misri ngamuende na iya orukenyi sa njiweteṟie waku wanu kui ilya nyamu. Njilehamba ke njechifunja mkundana foko nanyo mantapfo.

² Kyanu nyo njilemututuma ke mulawike mkundano na wandu wa orukalu na rasio tsawo mochitsifunjafunja. Kyaindi nyo muleindia iwawaso lyakopfo. Nki ili mulewuta kiwungi?

³ Ko ikyo wulalu ngahamba: Njechifunase wandu wa orukalupfo indi wechimutuura, na maruwaho hawo ha wongo hechimuwiia mdeho.”

⁴ Malaika ulya o Mndumii-Ruwa kyekiwawia wandu wose wa Waisraeli madedoha; wakakoṟoṟoma wechifihira.

⁵ Wakadumbuya rina handu halya nyi Bokimu. Wakawikiaho Mndumii-Ruwa kidaso.

Opfu lo Yoshua

⁶ Kyasia Yoshua kyekisama Waisraeli, orio mndu kakuhendia handu hake awemhawie nahachilie.

⁷ Waisraeli waleṟundia Mndumii-Ruwa mfiri yose ya moo fo Yoshua, na numa ya opfu loke mandi hose ha wameku walya wawetsuhaeho walya walewona mawuto hang'anyi Mndumii-Ruwa alewutia Waisraeli.

⁸ Na Yoshua mana o Nuni, mṟundi o Mndumii-Ruwa, kapfa awode maka ihana limu na ikumi (110).

⁹ Wakamṟika handu hake alehawio kioṟa kyake ipfo Timnath-heresi, orukenyi lo mafumvu ha Efraimu mtsudu fo fumvu lya Gaashi.

¹⁰ Nalyo wandu wose wa kishari kyake walepfa. Kukaituma rika lingi numa yawo, sa walaweichi Mndumii-Ruwa manya mawuto alewutia Waisraeli.

Waisraeli walekana na Mndumii-Ruwa

¹¹ Kyasia, Waisraeli walewuta mawicho oshangunyi lo Mndumii-Ruwa wakaindia Mabaali.

¹² Wakalekana na Mndumii-Ruwa, Ruwa o waku wawo, alewawuta orukenyi lo Misri; wakaosha maruwa hengi maruwa haweindio nyi wandu wekekaa kufui nawo. Wawekearamia maruwaho wakasukiṟa mnu Mndumii-Ruwa.

¹³ Waleda Mndumii-Ruwa wakaṟundia Mabaali na Maashtarothi.

¹⁴ Naho nyashi ya Mndumii-Ruwa ikado kipfa kya Waisraeli nao kada wasoki waduo masaa hawo. Nalewadambikia wakituwa wawo wakawaṟingichia walaidime ikuwuta mawokonyi ha wakituwawo.

¹⁵ Orio mandi wamehenda shidenyi, owoko lo Mndumii-Ruwa lukakaa kihadi nawo, mawicho hakawahoya chandu awemewalyiia nyamu. Nawo wakakaa fowenyi tsing'anyi.

¹⁶ Nlyondi Mndumii-Ruwa alewainenga wasongoru sa walewaashuo mawokonyi ha wandu walya waleduo masaa halya hawo.

¹⁷ Ma kudo, Waisraeli waleadanyiana na wasongoru wawopfo, kyamba walewuta uṟuhui na maruwa hengi; na ihaaramia. Waleda owinyi ndifo tsilya wakuwawo waletsiida wakaindia mawawaso ha Mndumii-Ruwa; kyaindi wo waletsiosha wadopfo.

¹⁸ Orio kiheri Mndumii-Ruwa amewadikia mchili, Mndumii-Ruwa nawekekaa na msongurucho; kawaashuo mawokonyi ha wakituwa wawo kiheri kyose kya moo fo msongorucho. Mndumii-Ruwa nalewaichio wukiwa mandi aleicho kieṟeṟo kyawo kya matuuro na mbaka walewutio.

¹⁹ Kyaindi orio mandi msonguru alepfa, walewuya mchumie iya yawo ya kacha, wakawuta mavicho kota waku wawo. Waleosha maruwa hengi, wakahaṟundia na ihaaramia, manya waleda mawuto hawo na orikiki lowopfo.

²⁰ Ko ikyo nyashi ya Mndumii-Ruwa ikado kipfa kya Waisraeli nao kahamba, “Kipfa kya wandu wa wametehia mkundano foko njilewika na waku wawo, wakaleha iindia ṟu lyako,

²¹ njechifuna-se mkambo-fu fo wandu wo Yoshua alewatsuhaṟa kiheri alepfa-pfo.

²² Mkambo-fo nyi njechihesha nafo Waisraeli njiwone kokooya wechiwuya ora lo ohendo loko cha wasahuyawo ang'u ote.”

²³ Kyasia, ma alewafuna oweṟe lumu-pfo, ma aleinenga Yoshua wuwinzi kiidi kya mkamboyo-pfo.