WACHILI 19 - Bibilia Kui Mdedie fo Kimochi

Mlawi na isuria lyake

¹ Mandi ho kuwewode mangi kiidi kya Israeli pfo, kuwewode Mlawi mlyiwe awekeri cha mhenu kiidi kya oruka lo mafumvu ha Efraimu. Mndu cho nawewode isuria lyake awuka Bethlehemu oruka lo Yuda.

² Kyaindi isuria kasuo Mlawi-cho kalekana nao kawuya na ko ndeye Bethlehemu kakaapfo meri iina.

³ Mkonu fumu kahenda imshiha; nawekuṟeheṟie ideda nao madedo maoloru na imbihiṟa na kanyi koke. Msoṟo cho nalehenda arianyi na mṟundi oke o kisoṟo hamu na nzoi tsiwi. Kyasia isuria ulya kamiitsa na mba ko ndeye, ndeye o mka kekimbona kamwambia na sia.

⁴ Ndeye o mka kambutia sha wucha, kakaa pfo mfiri iṟaṟu; Mlawi cho na mṟundi oke wakalya, wakanyo, wakalaa pfo.

⁵ Mfiri fo kana, wakalawa ngamenyi, wakakuteseheṟa ihenda; kyaindi ndeye o mka ulya kambia, “Kuwoka lya kelya kitutu nowade pfinya, kiidima nokuhendie.”

⁶ Kyasia, wandu wo wawi wakakaa wakalya, wakanyo kimu. Nahong'u ndeye o mka kambia, “Hoi kulaterewo laa iya nochihiyo.”

⁷ Mndu ulya kahoṟoka akundi ihenda ndeye o mka kamnengia kishingo ke natirime nao katirima.

⁸ Mfiri fo katanu mndu cho kakure ngamenyi akundi ihenda. Indi ndeye o mka ulya kambia, “Kuwoka lya uwade pfinya, weda mṟasa kurie, kiidima ukure.” Kyasia, wose wakalaa.

⁹ Kyasia, Mlawi na mṟundi mka na mṟundi oke msoṟo wakakure wahende, ndeye o mka cho wekikure wahende ndeye o mka cho kawia Mlewicho, “Hoṟoka kipfa mfiri fomsia na kio kyamecha. Laa iya na ichihiyo. Ngama otuko nochikure na iwoka kyaṟo kyapfo kewuya na kanyi.”

¹⁰ Kyaindi mndu cho naleleha ilaa pfo kio kilya. Kyasia, kakure kahenda kashika kufui na mṟi fo Yebusi nyi fo Yerusalemu. Nawerianyi na nzoi tsilya tsake tsiwi tsiwenjiteseheṟe, hamu na isuria ulya.

¹¹ Wekiafukia kufui mṟinyi fo Yebusi, mkonu fuwemekelia, naho mṟundi oke kambia, “Wulalu nyi nanga luide na mṟinyi fu fo Wayebusi lukae pfo kio ki.”

¹² Mndumii oke kambia, “Lochiidima ihaluka na iida kiidi kya mṟi fo wahenu walai Waisraeli pfo. Luwade kyaṟo mṟasa Gibea.

¹³ Luhende lutikirie ora lolaa ipfo Gibea ang'u Rama.”

¹⁴ Kyasia, wakawada kyaṟo mṟasa mnengeṟi fukaolokia wakeri kufui na mṟi fo Gibea fui mṟi fo kishari kya Benyameni.

¹⁵ Wakaida na mṟinyi waidime ilaa pfo kio. Wekiida na mṟinyi wakahenda ikaa handu ha patenyi osehu lo mṟi kipfa kulawewode handu ma mndu alewawia ncho na koko.

¹⁶ Waipfo wado kukacha mndu mmeku umu awuka demenyi koke. Mmeku chu nawei oruka lo mafumvu ha Efraimu na nawekekaa ipfo Gibea cha mhenu. Wenyi wa mṟi fo Gibea wawei wa oshari lo Benyameni.

¹⁷ Mmeku cho kekiambuo kawona mokyaṟo cho ai ipfo patenyi, kambesa, “Nyiku owuka na nyi ku uihenda?”

¹⁸ Nao kamhaluo, “Lowuka Benyameni oruka lo Yuda na lukeri ihenda ora sa luleshe lo mafumvu ha Efraimu. Nyipfo njekekaa na wulalu njiwuya njiwuka kyaṟo ipfo Bethlehemu kiidi kya Yuda njiwuya na kanyi; kuwode mndu aluambia iya pfo.

¹⁹ Indi so shisinga shapfo luwode maṟa na kando ka nzoi tsadu. Kake kuwode mkate na mvinyo; isho shinjishikie inyi, na mṟundi mkachu na mṟundi chu oko. Luwurie kindo kyose pfo.”

²⁰ Mmeku cho kambia “Ofoṟo lukae nanyo. Njechimuinenga shose mukundi. Indi mulakae kunu patenyi.”

²¹ Ko ikyo kawaitsa na mba koke kainenga nzoi kando. Wakyaṟo wa wakasamba madende hawo; wakalya na inyo.

²² Kiheri waweichihio, wasoṟo walawode sonu na chile njicha wa mṟi fo wakacha itengetia mba yo na ikapa kapa mongo. Wakawia mmeku cho menyi mba. “Wuta msoṟo ulya alacha na kofo lukae nao.”

²³ Kyaindi mmeku cho awode mba kacha na nja, kawawia, “Chi wudopfo wana wa wama; ngaterewa mulawute wutondo wu wuwicho.

²⁴ Njiwode mana oko mkeha na ngoseṟa kuwode mṟundi mka o mhenu oko. Njineengenyi momu njimuinenge ipfo nja, muwaduo na iwawutia chasa mulangie; indi mndu chu mulambutie mbonyi tsa wutondo.”

²⁵ Indi wasoṟo wo walamwadanyie. Ko ikyo Mlawi ulya kawuta mṟundi ulya oke nja. Nawo wakamduo wakambutia sha ngafu kio taṟaṟaa mṟasa ngamenyi. Kufui na makunda ikya wakamda kakuhendia.

²⁶ Ngamenyi mndu mka ulya kacha mṟasa mongonyi fo mba iya iwewode msoṟo ulya oke, kaho wanda oo mongonyi kakaa ho mṟasa kukokya piu.

²⁷ Msoṟo ulya o mndu mka ulya kechikure ngamenyi kaṟuhuo mongo ya mba kawuka na nja kundu nahende na kyaṟo kyake. Cha ilyi kawona mṟundi mka ulya alee wanda mongonyi mawoko hake hakawada shiwangowango sha mongo.

²⁸ Kambia, “Hoṟoka luhende.” Kyaindi o nalahaluo kindo. Kamduo kamhekia huya nzoi yake kamduo mṟasa kanyi koke.

²⁹ Kekishika kanyi koke kaduo oshu kadumbuo dumbuo mka-mṟundi ulya shiteno ikumi na shiwi. Kiidima kaduo shiteno sho njora tsose tsa Israeli.

³⁰ Walya wose walewona mbonyi ii wakahamba, “Mbonyi cha ii ilemewutike ma iwoneka kunu kiidi kya Israeli wokia wawuka Misri mṟasa inu-pfo. Lukausaṟe kyalo na ihaluyana na iwika mdumbuye.”