WACHILI 18 - Bibilia Kui Mdedie fo Kimochi

Mika na kishari kya Dani

¹ Mfiri fo kuwewode mangi kiidi kya Israeli pfo. Nahong'u kishari kya Dani kiwewalia handu hawo wawenyi wakae ho, kipfa mṟasa kiheri kyo, wawemehawio handu hawo na kyoṟa kyawo kiidi kya shishari sha Israeli pfo.

² Ko ikyo wandu wa Dani wakasambuṟa kiidi kyawo wandu ngarama wakawaduma kuwuka ipfo Eshtaoli na Sora, wakawawawasa wahende iṟisaṟisa oruka. Kyasia wandu wo wakashika kiidi kya oruka lo mafumvu ha Efraimu kanyi ko Mika wakahenda ikaa mbenyi ya Mika.

³ Wai kulya kanyi ko Mika wakamanya ṟu lya manake ulya Mlawi. Wakamhalukia na imbesa, “Nyiu akuendie na kunu? Nyi iṟunda lyiki uwodie iya?”

⁴ Nao kahaluo, “Mika awodanyi na inyi nanjiinengie iṟunda na inyi ngaidikia iṟunda lyewa mkohanyi oke.”

⁵ Nawo wakambia, “Hoi keluwesie ko Mndumii-Ruwa kokoya luiṟimiṟa kiidi kya kyaṟo kyadu.”

⁶ Mkohanyi ulya kawawia, “Hendenyi na ofoṟo. Mndumii-Ruwa naringa kyaṟo kyanu.”

⁷ Kyasia wandu wo watanu wakakure wakahenda Laishi. Walewona wandu wekekaa pfo, na chandu wekekaa ko ofoṟo cha wandu walya wa Sidoni. Wawei wandu wahoo walasaṟie kindo ma wahuṟi kindo pfo ma kya oruka lowo. Wawei kuleshe na wandu wa Sidoni, ma wawewode kita kyose na wandu wengi pfo.

⁸ Kyasia walokitala-wo walewuya ko wana wa mayawo ipfo Sora na Eshtaoli nawo wakawawesa, “Moluendie mbonyi njiki?”

⁹ Nawo wakahamba, “Kurenyi luhende ikapa oruka lo. Lomewona oruka lo, na lohi nyi oruka luwiri. Ngesa, mochikaa iya tupu mulechiṟunda kindo kyose? Mulakeleo ihenda iwada oruka lo.

¹⁰ Mukashikapfo mochikoya wandu walawode makusaṟo hose wai olelenyi. Nyi oruka lung'anyi luwuṟie kindo kyose-pfo na Ruwa naiwikie mawokonyi hadu.”

¹¹ Kyasia, wandu mahana haṟandaṟu (600) wa oshari lo Dani wawode shisha sha shida, wakakure wuka Sora na Eshtaoli,

¹² wakahenda iwika kiṟaṟo kyawo ipfo Kiriath-yearimu kiidi kya oruka lo Yuda. Nkyo kitewe handu ho ora lo kiukanyi lo Kiriath-yearimu kukalaho Mahane-dani mṟasa inu.

¹³ Wokia o wakahalukia ko Mika.

¹⁴ Wandu walya watanu walehenda iṟisa oruka lulya lo Laishi wakawia wana wa mayawo, “Ngesa na muichi ke kiidi kya mba tsi imuho iwode ruwa lisalaṟe? Kyasia, kusaṟenyi chandu mochiwika.”

¹⁵ Kyasia, wandu walya weṟisa wakahenda kanyi ko Mika, wakaida na mba wakawesa mbonyi tsa manake ulya Mlawi.

¹⁶ Mandi na ho, wandu walya mahana haṟandaṟu (600) wa oshari lo Dani wawehoṟoki o mongonyi fo mba wawode shisha shawo sha shida.

¹⁷ Wandu walya watanu walehenda iṟisa oruka wakaida na mba, wakaduo ruwa lilya lyesalaṟa na kikoti na sanamu ya wuindi. Mandi ho mkohanyi ulya nawehoṟoki mongonyi kimu na wandu walya mahana haṟandaṟu (600) wawode shisha. Kyasia, kekiwona wandu walya weṟisa,

¹⁸ wameida na mmbenyi ya Mika wakaduo sanamu iya yepacha, na soṟo ya makusaṟo, na ruwa ulya mosalaṟa, kawawesa, “Nkiki muiwuta?”

¹⁹ Nawo wakambia, “Tsia sau, kulatambaṟuo dumbu lyapfo, oshana naso, uwe mkohanyi odu cha ndeadu. A iyo nowona kuda? Ngesa na kechiidimika kuwade mkohanyi o mndu umu ang'u mkohanyi o kishari kimu kya Waisraeli?”

²⁰ Mkohanyi kachihio mnu kaduo sanamu iya yepacha na ruwa ulya mosalaṟa kaoshana nao.

²¹ Kyasia, wakawooka kyaṟo kyawo, wawasongoye nyi wana wawo na shiuma na masaa hawo.

²² Washikie kuleshe na mba ya Mika, wandu waweṟasanyi na Mika wakalaho, wakaosha wandu wa oshari lo Dani wakawahoya.

²³ Kiidima wakafahiya, na wandu wa Dani wakahaluka wakawesa Mika, “Nkiki kikuwode itane ocha ikuosha hamu na kituru-ki kya wandu?”

²⁴ Mika kahamba, “Nyo nyi muleduo maruwa hako njilehasungusia, mukaweduo na mkohanyi oko, mukanjida wulya mochiidima injiwesa njiwode kitewe kiki?”

²⁵ Wandu wa oshari lo Dani wakambia, “Nanga oda kifahiyo kyapfo, koda ulatsia, wandu wadu wengi wechikusaṟikia wawode nyashi, na iyo nochidetsa moo fopfo na wandu wapfo.”

²⁶ Mika kekiwona wamrohia, kahaluka kawuya na kanyi, na wandu wa oshari lo Dani wakahenda kowo.

²⁷ Na wandu wo wa oshari lo Dani wakaduo shindo shilya Mika aweshisungusie, wakaweduo na mkohanyi ulya awekempfuṟukanyia. Kyasia, wakahenda ikapa Laishi wakawaha wenyi oruka lo wandu wawekekaa pfo ko wuhooya kulawode makusaṟo ha wukiwa, wakarumatsa mṟi fo.

²⁸ Mṟi fo fuwewode mowaashuo pfo kipfa wawei haleshe na mṟi fo Sidoni, ma wawewode mbuya na wandu wengi pfo. Mṟi fuwei kundu ko pichi lya Beth-rohobu. Wandu wa oshari lo Dani wakafuwika wuhya wakakaapfo.

²⁹ Waleilacha rina lya mṟi fo, wakafulaha nyi Dani, lyioshe rina lya wasahuye owo awei mana o Israeli. Indi mṟi fo rina lya mbooko nyiwe Laishi.

³⁰ Wandu wa oshari lo Dani wakahoṟotsa sanamu iya yepacha, na Yonathani, mana o Gershomu, mana o Mose, kawa mkohanyi owo. Wa oshari loke nawo da wawei wakohanyi wa oshari lo Dani mṟasa wenyi oruka lo wakadao osamiṟonyi.

³¹ Kiheri kyose wandu wa mba ya Mndumii-Ruwa iwei ipfo Shilo, wandu wa oshari lo Dani wawekeindia sanamu yepacha iya iwenjisungusie nyi Mika.