WACHILI 17 - Bibilia Kui Mdedie fo Kimochi

Sanamu tsa Mika

¹ Kuwewode mndu umu awekekaa kiidi kya mafumvu ha Efraimu, rina lyake nyi Mika.

² Mfiri fumu kawia mae oke, “Shipeṟengu shilya sha fesa kiku kimu na ihana limu (1,100) uleiwio, na iyo kosesa ulya alekuiwia na inyi njilekuicho, nyi inyi njishiwode.” Nyi inyi njileshiduo. “Mae oke kahamba, “Mndumii-Ruwa nakuwikie ona mana oko.”

³ Mika kawihiṟia mae oke fesa kiku kimu na ihana limu (1,100). Mae kahamba, “Kundu oseso lulya njilesesa lulakukoye le, fesa yo njechiidambika ko Mndumii-Ruwa kundu isungusie sanamu yepacha na yesalaṟa. Wulalu njikuwihiṟia fesa tsilya.”

⁴ Mika kawihiṟia mae fesa iya, mae kawutaho fesa mahana hawi (200) kainenga mnganya o fesa katsana ho sanamu yepacha na isalaṟa. Sanamu yo kaiwika kanyi ko Mika.

⁵ Mndu cho Mika nawei handu hake heterewia. Kasungusia kisipau kya mkohanyi na sanamu, kiidima kahaluo mana oke umu nawe mkohanyi oke.

⁶ Maheri ho kuwewode mangi kiidi kya Israeli-pfo. Orio mndu nalewuta kindo kyose alewona kikeri kicha.

⁷ Maheri ho kuwewode manake umu Mlewi mṟinyi fo Bethlehemu orukenyi lo Yuda.

⁸ Manake cho kakure Bethlehemu orukenyi lo Yuda kahenda ishiha handu hengi hekaa. Ai kyaṟonyi kashika kanyi ko Mika kiidi kya mafumvu ha Efraimu.

⁹ Mika kambesa, “Nyiku uwukie?” Nao kamhaluo, “Inyi nyi Mlawi njiwukie mṟi fo Bethlehemu orukenyi lo Yuda. Njechikaa handu hose njechiwona mwanya cha Mlawi.”

¹⁰ Mika kambia, “Kaa kimu nainyi uwe cha wande na mkohanyi oko. Njechikutaa fesa (10) orio maka na maṟao na shindo shingi uhuṟi.”

¹¹ Naaho Mlawi ulya kaida na mba kaidikia kakaapfo kawa cha umu o wana wa Mika.

¹² Nao Mika kahaluo manake cho Mlawi mkohanyi oke ipfo kanyi koke.

¹³ Kiidima kahamba, “Wulalu njiichi ke Mndumii-Ruwa nechinjitarama kipfa njiwode manake chu Mlawi cha mkohanyi oko.”