WACHILI 14 - Bibilia Kui Mdedie fo Kimochi

Mawuto ha kuwoka ha wukahari wo Samsoni

¹ Mkonu fumu nalesoka kahenda Timna kawona pfo mana o kika Mfilisti.

² Kekiwuya na kanyi kawia wafee wake, “Ngawona mana umu o kika Mfilisti ipfo Timna. Njialikienyi mana chu o kika.”

³ Indi wafee wake wakambia, “Ngesa, kuwode mana o kika ose kiidi kya wana wa mayo ang'u kiidi kya wandu wadu itane ohenda ko Wafilisti wo walawadine?” Indi Samsoni kawia ndeye, “Njialikienyi mana chu o kika kipfa nanjichihiṟie mnu.”

⁴ Wafee wake walemanya ke nyi wudi Mndumii-Ruwa aweachikie keendie Wafilisti mtsitsionyi kipfa maheri ho Wafilisti waweikolonyie Waisraeli.

⁵ Samsoni na wafee wake wakakure wahende Timna, wekishika mademenyi ha msabibu, kukacha mwiso fukapoṟohoṟia Samsoni.

⁶ Oweṟe mumuyo fo Mndumii-Ruwa fukaanga Samsoni ko pfinya, karanduo mwiso fulya cha mndu airanduo kidahina kya mburu. Samsoni alewia wafee wake ikyo kilewutika pfo.

⁷ Kiidima kasoka kadeda na mana chu o kika; na mana chu kamchihiṟa mnu.

⁸ Komeidaho mfiri njiangu kahenda se Timna naduo mana chu o kika. Akeri kyaṟoni kahalukia mbai kawona mnying'a fulya fo mwiso ate kuwode pfo njuki na wuki.

⁹ Kyasia, kaweha wuki wulya ko mawoko hake kahenda kechilya. Kechiwuya na ko wafee wake, kawainenga wuki kitutu. Indi alewawia kundu aleende ke nyi kiidi kya mnying'a fo mwiso pfo.

¹⁰ Ndeye kahenda kulya kanyi ko mana ulya o kika, Samsoni kasungusia mfuho, chandu wanake wawekewuta maheri ho.

¹¹ Wafilisti wekiwona Samsoni wakamdikia wanake makumi haṟaṟu (30) wakae nao.

¹² Samsoni kawawia, “Inyi njechihamba oṟaayo loko kokooya mochiidima injiwia kiidi kya mfiri mfungade ya mfuho fu fo walyi, njechimuinga maṟao makumi haṟaṟu (30) ha mkonu mnene.

¹³ Indi mukalemo injiwia kyahamba ki, nyo mochinjiinenga maṟao makumi haṟaṟu (30) ha kitani na maṟao makumi haṟaṟu ha mkonu mnene.”

¹⁴ Nawo wakambia, “Hamba oṟaayo lopfo luwuicho.” Samsoni kawawia, “Ko molya kukawuka kelya, Ko mopfinya, mlodo.” Komeidaho mfiri iṟaṟu wanake wo waleidima itambahaluo oraayo lo pfo.

¹⁵ Mfiri fo mfungade wakawia mka o Samsoni, “Lemba lemba mii naluwie mdambuye fo oṟaayo lo, shila wudo lochikukoṟia mba iyo na mba ya ndeyo. Ngesa, mulelulaha kundu mulusoke masaa hadu?”

¹⁶ Mka o Samsoni kahendia Samsoni kechifuha kambia, “Nyi kya lohi nunjisuo, unjikundi manta-pfo. Nolewia wandu wako oṟaayo ma ulekunda injiwia lohamba ki pfo.” Samsoni kamhaluo, “Inyi njilemewie wafee wako pfo. Wulalu njechiidima ikuwia njida iyo?”

¹⁷ Kyaindi kaengeṟa ifihiṟa irio mfiri ikashika mfiri mfungade ya mfuho fo walyi. Mfiri fo mfungade Samsoni kawia mka otambahaluo lo oṟayo lulya kipfa nalemtumuo orio mkonu. Mka oke kahenda owinyi kawia wandu wake.

¹⁸ Mfiri fo mfungade mnengeṟi fulameolokia wakawia Samsoni, “Nyi kiki kekeloda kota wuki? Nyiu awode pfinya kota mwiso?” Samsoni kawahaluo, “Kokoya mulaletambahana na taho yako muwechiidima itambahaluo oṟayo lu loko pfo.”

¹⁹ Naalyo mumuyo fo Mndumii-Ruwa fukachea Samsoni ko pfinya ing'anyi, kahenda mṟinyi fo Ashkeloni, kawaha wandu makumi haṟaṟu (30), numa kaduo maṟao ha mkonu mnene kainenga walya waledambuo oṟayo lulya. Kiidima kahenda ko wafee wake aichuo nyashi.

²⁰ Nahong'u wakaalikia mana ulya o kika ko manake umu awei mkaṟa o Samsoni walyinyi.