WACHILI 13 - Bibilia Kui Mdedie fo Kimochi

Ifeo lya Samsoni

¹ Waisraeli walewewuta mawicho oshangunyi lo Mndumii-Ruwa, nao kawaleka waitoṟio nyi Wafilisti ko maka makumi hana (40).

² Kuwewode mndu umu ipfo Sora, o kishari kya Dani, rina lyake nyi Manoa. Mka oke nawei mhumba.

³ Mfiri fumu, malaika o Mndumii-Ruwa kawonekia mka cho, kambia, “Iyo nyi mhumba, ulawode wana. Indi nochikapika nofee mana o kisoṟo.

⁴ Ko ikyo ukuṟise, ulanyo mvinyo ma kindo kenanza, kulalye kindo kifanyi ngafu.

⁵ Kipfa nochifee mana o kisoṟo. Njui tsa mana cho tsechiodo manyale pfo, kipfa nyi nai mshimbuo o Ruwa wokia ifeo lyake. Nao nyi echiletsa Waisraeli mawokonyi ha Wafilisti.”

⁶ Mndu mka cho kahenda kawia mii oke, “Mndu o Ruwa fana yake iwei cha malaika o Ruwa nalenjichea. Njilembesa kundu awukie ma alenjiwia rina lyake pfo.

⁷ Indi nalenjiwia ke njechikapika njifee mana o kisoṟo. Kanjiwawasa njilanyo mvinyo ma kindo kenanza ma ilya kindo kifanyi ngafu, kipfa manacho nechiwa mshimbuo ko Ruwa wokia ifeo lyake mṟasa ipfa lyake.”

⁸ Nahong'u Manoa katerewa Mndumii-Ruwa, kechihamba, “Ngakuterewa hoi Mndumii-Ruwa, udume-se mndu ulya opfo ulemduma kundu nache ilulosha mbonyi tsiwaṟi iwutia mana cho ilyi mandi echifeo.”

⁹ Mndumii-Ruwa kaicho kiterewo kya Manoa, na malaika ulya o Ruwa kahendia se isuria ulya adamie mdeminyi. Indi mii oke o Manoa awei nao pfo.

¹⁰ Mndu mka ulya kadicha owinyi, kawia mii oke, “Ambuya mndu ulya alenjichea mfiri fulya nanjichea se.”

¹¹ Manoa kaoshana na mka oke mṟasa alya ko mndu cho, kambesa “Ngesa nyi iyo kulededa na isuria chu?” Mndu ulya kamhaluo, “Nyi inyi.”

¹² Kiidima Manoa kahamba, “Wulalu madedo hapfo ili hechihoya nyi mbonyi nyiki lochiosha kipfa kya mana - cho? Nyi iki lochiwuta kipfa kyake?”

¹³ Malaika o Mndumii-Ruwa kawia Manoa, “Mka opfo nawaṟi nawade shose njilehamba:

¹⁴ Nalasonje kilimu kya msabibu, ma nalanyo mvinyo ma kindo kenanza ma ilya kindo kifanyi ngafu. Shose njilembawasa nashioshe.”

¹⁵ Manoa kawia malaika cho o Mndumii-Ruwa, “Hoi ulaterewo, kekutirimie kitutu njikuṟeheṟie wudahina.”

¹⁶ Malaika ulya o Mndumii-Ruwa kawia Manoa, “Ma mukanjiitika njikae iya njechilya kelya kyanu pfo. Kyaindi kokunda, ṟeheṟa mwano fomaya modonyi, uinenge Mndumii-Ruwa.” Manoa alemanya ke icho nyi malaika o Mndumii-Ruwa pfo.

¹⁷ Kyasia, Manoa kawia malaika cho o Mndumii-Ruwa, “Luwie rina lyapfo kundu lukuindie kiheri madedo hapfo hechishika.”

¹⁸ Malaika o Mndumii-Ruwa kamhaluo, “Nki ili ukundi imanya rina lyako, kipfa rina lyako lyiṟihishie?”

¹⁹ Nahong'u Manoa kaṟeheṟa kidahina kilya na kiano, kashiwika huya iho lya iṟaṟa nainenge Mndumii-Ruwa mowuta maṟiho.

²⁰ Kiheri nakyo Manoa na mka wechiambuya olewo lo modo lochido huye ruwehu wuka alya kitaṟenyi kedasia, wakawona malaika ulya ai kiidi kya olewo lulya kedo huye kahenda ruwehu. Nalyo Manoa na mka wakaarama wanda wakaadapfuma Ruwa.

²¹ Manoa kamanya ke icho nawei malaika o Mndumii-Ruwa. Malaika nalakiwonekiese Manoa na mka.

²² Kyasia, Manoa kawia mka oke, “Na kikaki luipfa, kipfa lowona Ruwa.”

²³ Indi mka kambia, “Kokoya Mndumii-Ruwa nawekundi iluwaha awechiambia mwano iya yadu yemaya modonyi hamu na mso pfo, ma awechiluloṟa mbonyi tsi ma iludea mawawaso pfo.”

²⁴ Kyasia, mka o Manoa kafee mana o kisoṟo, Manoa kamdumbuya rina nyi Samsoni. Mana cho kang'ana na Mndumii-Ruwa kambikia ona.

²⁵ Mumuyo fo Mndumii-Ruwa fukawoka imkaya kakaa ipfo Mahane-dani, kiidi kya Sora na Eshtaoli.