WACHILI 12 - Bibilia Kui Mdedie fo Kimochi

Kiloyo kya Yeftha na kishari kya Efraimu

¹ Wandu wa kishari kya Efraimu walekusanza, wakaambada meda fo Yordani wakashika Zafoni. Numa wakawia Yeftha, “Kitewe nyi kiki ulalelulaha luhende kimu na iyo ikapana na Waamoni? Wulalu lochikoṟa mba yapfo na iyo kumonyi uipfo.”

² Yeftha kawawia, “Inyi hamu na wandu wako kuwewode kituwa king'anyi na Waamoni. Njilemuterewa muche injitarama kyaindi mulakunde icha njikiṟa.

³ Njekiwona mokunda icha pfo, ngahenda, njiwodo nyi madima, ikapana na Waamoni, nao Mndumii-Ruwa kawawika mawokonyi hako. Kitewe nki wulalu mocha ikapana na inyi?”

⁴ Kyasia, Yeftha kasanyia wandu wose wa Gileadi, kakapana na wandu wa Efraimu. Wandu wa Gileadi wakawinga wandu wa Efraimu. Waefraimu wa nyiwo wawekehamba, “Nyo wandu wa Gileadi nyi wadichi wa oshari lo Efraimu mulewuka kiidi kya oshari lo Efraimu mukahenda oshari lo Manase.”

⁵ Kyasia, wandu wakawada shiambada meda fo Yordani kundu washinge njia ya wandu wa Efraimu. Orio mandi komecha mdichi katerewa iida pfo, wandu wa Gileadi walembesa, “Ngesa iyo nyi Mwefraimu?” Kokoya ahamba, “Ote,”

⁶ walembia, “Kyasia hamba na dumbu lyapfo Shibdethi,” indi oo nekehamba, “Sibolethi,” kipfa aidima ihamba kisumuhanyi pfo. Naho walembada, wakambahia ipfo shiambadionyi sha meda fo Yordani. Wandu shiku makumi hana na shiwi (42,000) wa Efraimu waledetsa moo maheri ho.

⁷ Yeftha nawei mchili kiidi kya Israeli maka iṟandaṟu (6). Kiidima kapfa, kaṟiko ipfo Gileadi mṟinyi foke.

Ibzani, Eloni na Abdoni

⁸ Yeftha amepfa, Ibzani kawuka Bethlehemu kawa mchili o Waisraeli.

⁹ Nawewode wana wa kisoṟo makumi haṟaṟu (30) na wa kika makumi haṟaṟu (30). Wana wa kika kalekia waaliko nja ya kishari kyake, na iwa kisoṟo kawaalikia wana wa kika nja ya kishari kyake; makumi haṟaṟu (30) Ibzani kawa mchili o Israeli maka mfungade (7).

¹⁰ Kapfa, kaṟiko mṟinyi fo Bethlehemu.

¹¹ Ibzani amepfa, Eloni o kishari kya Zebuluni, kawa mchili o Israeli ko maka ikumi (10).

¹² Nao kapfa kaṟiko mṟinyi Aiyaloni kiidi kya oruka lo kishari kya Zebuluni.

¹³ Eloni amepfa, Abdoni mana o Hileli wuka Piathoni kawa mchili o Israeli.

¹⁴ Nawewode wana wa kisoṟo makumi hana (40) na wachuku makumi haṟaṟu (30) wawekedoya nzoi makumi mfungade (70). Nawei mchili o Israeli maka nyanya (8).

¹⁵ Nahong'u Abdoni kapfa kaṟiko mṟinyi fo Pirathoni kiidi kya oruka lo Efraimu kiidi kya kyahu kya fumvu lya Waamaleki.