WACHILI 11 - Bibilia Kui Mdedie fo Kimochi

¹ Ipfo Gileadi kuwewode-pfo mndu mbahanyi mkari mnu elaho nyi Yeftha, mana o isuria umu mmeluki na ndeye nelaho Gileadi.

² Gileadi nawewode wana wengi se ko mka o walyi. Kiheri wana wo waleng'ana, wakafuna Yeftha nakure kulya kanyi, wakambia, “Iyo kikusumuhanyi uwone kyoṟa kunu ko wande odu pfo, kipfa iyo nyi mana o mka ungi.”

³ Kyasia, Yeftha kadicha wanawamae kahenda ikukaya orukenyi lo Tobu. Wandu walawode wuṟango wakakusanza nao wakaoshana nao kiidi kya shaaṟo shake sha ngapano.

⁴ Komeidaho kiheri kiangu Waamoni wakacha ikapana na Waisraeli.

⁵ Shida yekiwanga na iwawa mnu, wameku wa Gileadi wakahenda ionduo Yeftha wuka Tobu,

⁶ wakambia, “Ncho ulusongoye kiidi kya shida shi shadu na Waamoni.”

⁷ Kyaindi Yeftha kawia wameku-wo wa Gileadi, “Ngesa, chi nyo mulenjisuo mukanjifuna njiwuke oshangunyi lo ndeanu ai wande oko? Nkilyi muinjichea kiheri ki kya ngatara.”

⁸ Wameku wo wa Gileadi wakambia, “Ee da, nkyo kyainenga luche luhendesane kundu lukapane na Waamoni, na iyo nochiwa msongoru odu na o wandu wose wa Gileadi.”

⁹ Yeftha kahaluo wameku wo wa Gileadi, “Kokoya monjiwihiṟa na kanyi njikapane na Waamoni nduma Mndumii-Ruwa nawawike mawokonyi hako, inyi njechiwa msongoru onu.”

¹⁰ Wameku walya wa Gileadi wakawia Yeftha, “Mndumii-Ruwa nechiwa mongochi odu. Kya lohi lochiwuta chandu ohamba.”

¹¹ Yeftha kaoshana na wameku walya wa Gileadi, wandu wakamhaluo msongoru owo. Yeftha kahamba makusaṟo hake ipfo Mispa sumuhana na Mndumii-Ruwa.

¹² Yeftha kadika ndumi ko mangi o Amoni kambia, “Nyi kituwa kiki uwode naso itane ocha ilupufukia?”

¹³ Mangi o Amoni kawia iwo waledumo kewahaluo, “Waisraeli lilyamandi walewuka Misri waleduo oruka loko wokia meda fo Arnoni mṟasa meda Yaboki na meda fo Yordani. Wulalu wihiṟa oruka lo ko ofoṟo.”

¹⁴ Yeftha kadika se ndumi ko mangi o Amoni

¹⁵ wambie handu hake, “Waisraeli waleduo oruka lo Amoni pfo.

¹⁶ Indi Waisraeli lilya walewuka Misri, waleida oruka lo msanga mṟasa ipalyipalyi lya Shamu itane Kadeshi.

¹⁷ Waisraeli wakadika ndumi ko mangi ya Edomu wechimterewa momu fokuidia kiidi kya oruka loke, kyaindi mangi ya Edomu kaleha. Koikyo Waisraeli wakadeo Kadeshi.

¹⁸ Kiidima wakaira kyaṟo wakaida nuka ya msanga watengeta oruka lo Edomu na Moabu mṟasa waleshika ora lo ngamenyi lo Moabu, wakawika kiṟaṟo maambatsana na meda fo Arnoni. Ma waleida kiidi kya Moabu pfo. Meda fo Arnoni nyi wefo mṟasa fo Moabu.

¹⁹ Kyasia Waisraeli wakaduma ndumi ko mangi Sihoni o Waamori ipfo Heshboni wakamterewa nawainenge momu foida kiidi kya oruka loke wahende orukenyi lowo.

²⁰ Kyaindi Sihoni nalawainenge momu foida kiidi kya oruka loke. Kyaisa, Sihoni kasanyia wandu wake wose kawika kiṟaṟo ipfo Yahasa, kapufukia Waisraeli.

²¹ Nao Mndumii-Ruwa, Ruwa o Waisraeli, kawika Sihoni na wandu wake mawokonyi ha Waisraeli, wakawawinga. Waisraeli wakaduo oruka lose lo Waamori ipfo kundu wawekekaa.

²² Waleduo oruka lose lo Waamori wokia meda fo Arnoni mṟasa meda fo Yaboki na wuka nuka ya msanga ora lo ngamenyi mṟasa ora lo kiukanyi lo meda fo Yordani.

²³ Ko ikyo Mndumii-Ruwa, Ruwa o Israeli, kafuna Waamori oshangunyi lo Waisraeli. Ngesa, iyo nokundi ilusoka oruka lodu?

²⁴ Fuda na kilya ruwa opfo Kemoshi alekuinenga. Indi oruka lo lose Mndumii-Ruwa, Ruwa odu alefuna pfo wenyiwo, kaluinenga so ilo nyi oruka lodu.

²⁵ Ale, nokusaṟie iyo nowode pfinya kota Balaki mana o Zipora awei mangi o Moabu? O alelimbana na Waisraeli ma ikapana nawo pfo.

²⁶ Kiheri kyose Waisraeli wawei mṟinyi fo Heshboni na shihongo shayo, na mṟi fo Aroeri na shihongo shayo hamu na mṟi yose ikeri wambaṟa ya meda fo Amoni ko maka mahana haṟaṟu (300) kitewe uladuo oruka lo kiheri kyo nki?

²⁷ Inyi kuwode kindo ngadeko pfo nyi kyo kitewe udeko ilyi unjipufukia. Mndumii-Ruwa ichu ai mchili nechianduo inu tichi kiidi kya Waisraeli na wandu wa Amoni.”

²⁸ Indi mangi ya Amoni nalemina ndumi ii ya Yeftha.

²⁹ Nahong'u mumuyo fo Mndumii-Ruwa fukachea Yeftha, nao kakure kaida Gileadi na Manase, kawuya Mispa kiidi kya oruka lo Gileadi kahenda mṟasa Amoni.

³⁰ Yeftha kawia Mndumii-Ruwa kehamba, “Kokoya ochiwika Waamoni wa mawokonyi hako,

³¹ kyasia, icho oose echiwuka nja awuka kanyi koko icha injiambia njiwuka shidenyi ngamemaa iwinga Waamoni, icho nechiwa opfo iyo Mndumii-Ruwa. Icho njechimbuta nawe kidaso kemaya modonyi.”

³² Kyasia Yeftha kaambada meda kakapana na Waamoni, na Mndumii-Ruwa kawika Waamoni wo mawokonyi hake.

³³ Nao kakuwonyia ho wuwinzi wung'anyi, kawada mdeho shihongo makumi hawi sa shiwei kiidi kya Aroeri oruka luwetengetie Minithi na Abel-keramimu. Kyasia Waamoni wakawingo piu na Waisraeli.

³⁴ Yeftha kiheri awecha na kanyi koke ipfo Mispa, mana oke o kika kacha imwambia kechishina na ikapa shicheheṟe. Manachu o waka nawei kimumu kyake, awewode mana ungi o kisoṟo ma o kika se pfo.

³⁵ Yeftha kekimbona karanduo nguwo tsake amsokie nyi fowa kahamba, “Mana oko o kika! Nonjifunja mrima. Iyo nowa mawokioonyi hang'anyi ha matuuro hako. Ngamelyiia Mndumii-Ruwa nyamu na inyi njechiidima itehia nyamu yo pfo.”

³⁶ Nao kamhaluo, “Wande oko, kokoya omelyiia Mndumii-Ruwa nyamu, unjiwutie chandu uwikie kyasa, kipfa wulalu nakuidimisha itaa kiṟache ko wakituwa wapfo Waamoni.”

³⁷ Kiidima kawia ndeye, “Njikuterewa kindo kimu, njinenga handu ha meri iwi, njihende na mbuya tsako fumvuhu, njikapiepfo kilio kya ipfa lyako njilamwalike.”

³⁸ Ndeye kamnenga momu nahende pfo ko meri iwi. Nao kahenda kimu na mbuya tsake, wakakapa kilio kya ipfa lyake alamwaalike.

³⁹ Komeidaho meri iwi kawuya na kanyi; kiidima ndeye kambutia kiṟinganyi na kyasa kilya kyake. Mana chu o waka nawei mkeha. Kyasia, wokia maheri ho kikawa nyi sungusihu yewuta kudo kiidi kya Israeli.

⁴⁰ Orio maka waka wa Israeli wekehenda ikapa kilio ko mkonu ina kya opfu lo mana o kika o Yeftha o Gileadi.