WACHILI 10 - Bibilia Kui Mdedie fo Kimochi

Tola

¹ Numa ya opfu lo Abimeleki, Tola mana o Pua mana o Dodo, o kisharinyi kya Isakari, kakuloṟa ikiṟa Waisraeli. Tola nalekaa Shamiri orukenyi lo mafumvu ha Efraimu.

² Nalewa mchili o Israelli ko maka makumi hawi na iṟaṟu (23), kapfa kaṟiko ipfo Shamiri.

Yairi

³ Numa ya Tola, Yairi mana o Gileadi kakuloṟa, kawa mchili o Waisraeli maka makumi hawi na iwi (22).

⁴ Yairi nawewode wana wa kisoṟo makumi haṟaṟu (30) wawewode mṟi makumi haṟaṟu (30) orukenyi lo Gileadi, mṟasa inu yekelaho Hawoth-yairi kimu cha ihamba shikongo sha Yairi.

⁵ Yairi kapfa kaṟiko ifo Kamoni.

Yeftha

⁶ Waisraeli wakawuta mawicho oshangunyi lo Mndumii-Ruwa wakasingia Mabaali, Maashtarothi na maruwa ha Shamu, ha Sidoni, ha Moabu, ha Amoni na ha Wafilisti. Wakada Mndumii-Ruwa ma walamwindie se.

⁷ Nyashi ya Mndumii-Ruwa ikaaka kipfa kya Waisraeli, kawawika mawokonyi ha Wafilisti na Waamoni.

⁸ Waisraeli wakaliso wukiwa maka ikumi na nyanya (18) wechituuro na ituruchuyo ipfo Gileadi na ko Waamoni wa ora lo ngamenyi lo meda fo Yordani mdemenyi.

⁹ Waamoni wakaambada meda fo Yordani ikapana na shishari sha Yuda, Benyameni na Efraimu. Waisraeli wakawona ngataṟa na wuale .

¹⁰ Kyasia wakafihiṟia Mndumii-Ruwa wechihamba, “Lulekunyamaṟia kipfa lulekuda iyo Ruwa odu lukasingia Maabali.”

¹¹ Mndumii-Ruwa kawawia, “Ale ngesa inyi njilemukiṟa ngamuwuta wusingenyi wo Misri, Waamoni, Waamori, Wafilisti?

¹² Wasidoni, Wameleki na Wamidiani walemtuura nanyo mukanjifihiṟia na inyi ngamuwuta mawokonyi hawo.

¹³ Manya kudo nyo mulenjida, mukasingia maruwa hengi. Koikyo njechimukiṟa sepfo.

¹⁴ Hendenyi mufihiṟie maruwa ho mulesambuṟa. Halekeni hamukiṟe kiidi kya wukiwa wonu!”

¹⁵ Kyaindi Waisraeli wakawia Mndumii-Ruwa, “Lowuta wunyamaṟi. Luwutiye chandu okunda, indi lokuterewa lukiṟe inu.”

¹⁶ Kiidima wakaṟukuta maruwa halya mahenu kuleshe, wakawuya isingia Mndumii-Ruwa menyi matorito. Mndumii-Ruwa nalaidime itirisia ngoseṟa iwona wukiwa wo wana wa Israeli wailiso.

¹⁷ Waamoni wakakusanza wakawika kiwaha kyawo ipfo Gileadi. Waisraeli nawo wakawika kiwaha kyawo ipfo Mispa.

¹⁸ Waisraeli na wasongoru wawo wakawesana, “Naacho echiwoka ikapana na Waamoni? Icho echiwika ado nechiwa msongoru o wandu wose wa Gileadi.”