WACHILI 1 - Bibilia Kui Mdedie fo Kimochi

Waisraeli Yoshua amepfa

¹ Yoshua amepfa, Waisraeli wakawesa Mndumii-Ruwa, “Mndumii-Ruwa nyi kishari kiha kyechiwoka ihenda ikapana na Wakanaani?”

² Mndumii-Ruwa kawawia, “Kishari kya Yuda nyi kyo kyechiwoka ihenda ikapana nawo kyamba orukalo njiluwikie mawokonyi hawo.”

³ Wandu wa kishari kya Yuda wakawia wana wa mayawo wa kishari kya Simeoni, “Kulungenyi naso mandi luihenda iwada orukalo loinengo.” Naso daa, lochilunga nanyo ihenda iwada oruka sa mochiinengo. Koikyo kishari kya Simeoni kikaidikia ikulunga nawo.

⁴ Kyasia, wandu wa kishari kya Yuda wakaamtsa shida na Wakanaani; Mndumii-Ruwa kawika Wakanaani na Waperizi mawokonyi hawo, wakawaha wandu shiku ikumi (10,000) shidenyi kulya Bezeki.

⁵ Ipfo mṟinyi walekoyapfo mangi Adoni-bezeki, wakakapana nao wakawinga Wakanaani na Waperizi.

⁶ Adoni-bezeki kadicha, kyaindi wakambingia, wakambada, wakamdumbuo shimnyo shing'anyi sha mawoko na sha madende.

⁷ Adoni-bezeki kahamba, “Wamangi makumi mfungade (70) sa wawewadumbuo shimnyo shing'anyi sha mawoko na madende waledoduo mtsuhaṟo fo shelya shi ya mesa yako yeliia. Wulalu amenjitaa kiṟache kya shilya inyi njilewuta.” Wakamduo Yerusalemu, kapfiiyapfo.

Kishari kya Yuda kyawada Yerusalemu na Hebroni

⁸ Wandu wa kishari kya Yuda walesaṟikia mṟi fo Yerusalemu wakafuwada. Walewaha wandu wa mṟifo ko oshu na irumatsa mṟifo ko modo.

⁹ Kiidima, wandu wa kishari kya Yuda walehenda ikapana na Wakanaani wawekyekaa orukenyi lo mafumvu, Negebu na kulya orukenyi lo rendewele.

¹⁰ Walewesaṟikiase Wakanaani wawekyekaa mṟinyi fo Hebroni sa fuwemlahe nyi Kiriath-arba ili mawokioonyi; wakawinga wandu shishari sha Sheshai, Himani na Talmai.

Othnieli awada mṟi fo Debiri

¹¹ Kuwuka ipfo kishari kya Yuda kikasaṟikia mṟi fo Debiri; ili kuwoka fuwemlahe nyi Kiriath-seferi.

¹² Kalebi kahamba: “Mnducho oose echiidima iwada mṟi fo Kiriath-seferi, njechimwalikia mana oko o waka Aksa.”

¹³ Kyasia, Othnieli, mana o Kenazi manawo o Kalebi kawada mṟi fulya, nao Kalebi kalekia Aksa mana oke o waka naaliko nyi Othnieli.

¹⁴ Aksa kekishika ko Othnieli, Othinieli kawia Aksa naterewe ndeye Kalebi namnenge dema. Aksa nawedoe huya nzoi nao kekisokia wanda ndeye kambesa, “Nki ki ukundi njikuinenge?”

¹⁵ Kamhaluo kambia, “Ngakuterewa nonjiinenge soka tsa mṟinga kipfa ora lulya kulenjiinenga kulya ora lo nuka luwode mṟingapfo.” Kalebi kamnenga soka tsa ora lo huye na tsa ora lo seri.

Wuwinzi wo shishari sha Yuda na Benyamini

¹⁶ Luwa lya Keni, ndeye o mka o Mose; walekulunga na wandu wa kishari kya Yuda kuwokia alya mṟinyi fo Makangachi, mṟi fo Yeriko mṟasa nuka ya Yuda kufui na Aradi wakaapfo handu hamu na wandu wa Yuda.

¹⁷ Wandu wa Yuda walekulunga na wana wa mayawo, wandu wa Simeoni, wakawinga Wakanaani wawekyekaa Sefati. Walerumatsa mṟifo nakamu, wakahaluo rina lyafo lyikawa nyi Horma. Horma kimu cha ili ohamba “Orumaro.”

¹⁸ Wandu wa kishari kya Yuda walewadase mṟi ya Gaza na ora lofo; Ashkeloni na ora lofo; na Ekroni na ora lofo.

¹⁹ Mndumii-Ruwa nawei na wandu wa kishari kya Yuda, nawo wakawada mṟi ya mafumvu. Kyaindi walaidime iwinga wandu wa oruka lo rendewele kipfa magari hawo ha shida hawei ha menya.

²⁰ Mṟi fo Hebroni fukadambikio Kalebi chandu Mose awewawasie. Kalebi kafunapfo shishari shiṟaru sha Anaki.

²¹ Kyaindi wandu wa kishari kya Benyamini walefuna Wayebusi wawekyekaa mṟinyi fo Yerusalemupfo; nkyo kitewe Wayebusi wakeri handu hamu na wandu wa kishari kya Benyamini kulya Yerusalemu mṟasa inu.

Shishari sha Efraimu na Manase wawada Betheli

²² Wandu wa kishari kya Yosefu wakasaṟikia mṟi fo Betheli, nao Mndumii-Ruwa nawei nawo.

²³ Wawedumie wandu kuwooka wahende ifutiichia mṟifo fo Betheli. Ilyi mawookionyi fuwemlahe nyi Luzu.

²⁴ Wandu walya wetiichia walewona mndu umu kechiwuka kulya mṟinyi, wakambia, “Hoi kyeluloṟe njia yeida na ipfo mṟinyi, naso lochikuwutia mecha.”

²⁵ Kawaloṟa njia yeida na kulya mṟinyi. Kyasia, wakaida napfo na ikombetsa orio mndu aweipfo. Kyaindi mndu ulya alewaloṟa njia wakamda na kipuo, o na wa mba yake.

²⁶ Mnducho kasamia orukenyi lo Wahiti, kawikapfo mṟi kafudumbuya rina nyi Luzu; nyi wudo mṟifo fokelaho mṟasa inu.

²⁷ Wandu wa kishari kya Manase walefuna wenyi mṟi ya Bethsheani na shihongo shafo, Taanaki na shihongo shafo, Dori na shihongo shafo, Ibleamu na shihongo shafo, na Megido na shihongo shafo. Wakanaani walewekaapfo.

²⁸ Manya chandu Waisraeli wawewode pfinya walefuna Wakanaanipfo indi walewainenga maṟunda ha wusinga.

²⁹ Wandu wa kishari kya Efraimu walefuna Wakanaani wawekyekaa kulya Gezeripfo, nawo walewekaapfo handu hamu na wandu wa Efraimu.

³⁰ Wandu wa kishari kya Zebloni walefuna wandu wawekyekaa mṟinyi fo Kitronipfo, manya walya wa mṟinyi fo Nahalalipfo, walewekukayapfo handu hamu wechiwaṟundia marunda ha wusinga.

³¹ Wandu wa kishari kya Aseri walefuna wandu wa mṟinyi ya Ako, Sidoni, Alabu, Akzibu, Helba, Afeka na Rehobupfo.

³² Wandu wa kishari kya Aseri walekaa handu hamu na Wakanaani wenyi orukalo kyamba walewafunapfo.

³³ Wandu wa kishari kya Naftali walefuna wandu wa mṟinyi fo Beth-shemeshipfo, manya wa Beth-anathipfo, kyaindi walekaa handu hamu nawo. Manya kudo wenyi wa mṟiyo waleitiko iṟundia Waisraeli maṟunda ha wusinga.

³⁴ Waamori walefunyia wandu wa kishari kya Dani mafumvunyi. Walewainenga momu wachekaa orukenyi lo rendewelepfo.

³⁵ Waamori wakakaa mṟinyi iwei fumvunyi lya Heresi, Aiyaloni na Shaalbimu. Kyaindi wandu wa shishari sha Manase na Efraimu walechilia Waamori na iwatana waṟunde maṟunda ha wusinga.

³⁶ Mṟasa fo Waamori fuweidie mtsudu fo Sela, woidia njia ya Akarimu.