TITO 3 - Bibilia Kui Mdedie fo Kimochi

¹ Uwatamuṟye ke wakae wakuwike shi ya wanene wai wenyi-menge wechiwaidikya. Wakae wakuteseheṟye orio ṟunda icha lyose.

² Walarumane na mndu, wakae walawode mondu, wawiṟie mndu owinyi, wawonesye wandu wose wuhoo wuwenyi.

³ Kyamba naso ili kacha luwei watahi, wandu wataicho wadetse, luweisingia wulang'a na lango tsa mbaṟi nliwe na nliwe luwehendekie lui na wumbafu na wunyenyi luwesukie lochisuana luwenyi na wenyi.

⁴ Matika na halya kulembonekaho woloṟu wo mkiṟi odu Ruwa na mkundie foke akunde nafo wandu aleluwonya okio.

⁵ Lulauwike na mawuto ha wuhoṟotsu so luwewuta, indi nyi lo osaṟio lulya loke kui kisambyo kya ifeo lya kawi na ilawuo nyi Mumuyo mwele.

⁶ Ichu alemlusumba echimfeṟa na mweke fo Yesu Kristo mkiṟi odu.

⁷ Kundu luwe waoṟi wa moo fo mlungana fuiwedyo lui wasumhantse kui wutonga woke.

⁸ Idedo lyeidikya lyo ilyo. Na njikundi utambahanye iṟingishya kyalyo shose, kundu iwa wai waidikishye Ruwa wawinye iwika-ho mawuto mecha. Ishi shachia wandu shiwaendie ngaya.

⁹ Kya indi mawesoweso ha wutondo na maitumano ha marika na mandeda na maloyo ha kiwuwawaso, ho uhadiche. Cha kipfa halai na mbucha, nyi ha maai.

¹⁰ Mndu mtindili, komaa imdedya limu na lya kawi, wuta-ho mdo.

¹¹ Nomanye mndu ai adi amekuṟuka echinyamaṟa amekuwonya owingo amonyi.

Madedo hefurumia

¹² Mandi njechikudumya Aritemanyi ang'u Tikiko uitike icha na koko ipfo Nikopoli, kyamba na hondo njilesambuṟa itsinda-ho kiheri kya kisie.

¹³ Senanyi, mlaanyi o wuwawaso, na Apolo, uwasame owinyi newasungusia walawuṟie kindo.

¹⁴ Na iwa wai wadu wakupfunde iwika-ho maṟunda mecha hewinya-ho shilya shilechiwa iwuṟo kundu walakae-ho wawake ikidi ilaikumbia.

¹⁵ Iwa wai kunu koko wakuiṟikiṟa wose. Iṟikiṟya walya walukundi kui wuidiki. Wutonga wukae nanyo mose.