TITO 2 - Bibilia Kui Mdedie fo Kimochi

¹ Kake iyo udede kiidikyanyi na wupfundi wulya wochiṟa mrima.

² Ke wameku wakuachie, wawe wasanze wenyi osaṟe wachia kui wuidiki na kui mkundanyie na kui mkutirisie.

³ Na wudo wakeku wakae na orie lusumhanye waele, walahende iduo mndu sumu, walahende iṟahishyo nyi wukuwu wo wari, wawe wechilosha shindo shii shicha.

⁴ Kundu wapfudishe waka walya wakoho wakunde wamii wawo wawekunda wana.

⁵ Wakae na osaaṟe wenyi sonu njicha, wahidi wa kanyi, waleki, waidikie necha wamii wawo, kundu dedo lya Ruwa lilahende irumo.

⁶ Na wudo ututumye womi walya wakoho wakae na chile tsa shindo shose.

⁷ Henda ikuwika-ho kumonyi kichano kya mawuto mecha ui na wusalari wo ipfo wupfundinyi, na mkuachie,

⁸ na idedo liwe lyechiṟa mrima lilechiwa iwingo kundu ichu ai o ohambenyi lungi napfie sonu ili alakuwonya kii kiwicho kyadu kyeanduya kyakyo.

⁹ Masinga hakuwike shi ya wanene waho hakuwakundishye na shindo shose, halaambiṟane nawo.

¹⁰ Walaṟoṟokuo, kya indi wamanyishieho wuhendeli wucha wose, kundu wawikye wupfundi wo mkiṟi odu Ruwa kiṟumi kicha kui shindo shose.

¹¹ Kyamba kulemboneka-ho wutonga wo Ruwa wuendie wandu wose okiio.

¹² Wolutoṟisha so, kundu lulehane na mbaṟi ii ya imina Ruwa na lango tsilya tsa ki-wuyana, lupfudie lui na moo fo chile na wuhoṟotsu na wuindi mandi ha kiwulalu.

¹³ Lochiweda kiwedyo kilya kiende macha ngesa kya iwoneka lya wuitoṟi wo Ruwa ichu mnene amonyi nyio mkiṟi odu Kristo Yesu.

¹⁴ Nyio alekudambika amonyi hando hadu, kundu naluletse na msefu fo mrima fose nakuhaṟamishie mkambo fui foke amonyi fuiaaka iwuta mawuto mecha.

¹⁵ Kya ishi udede, uikimbe, ututume na wuitiki wose. Kulakae-pfo ekumina.