SHILIO 5 - Bibilia Kui Mdedie fo Kimochi

Kiterewo kya osaṟio

¹ Kewekumbuowo hoi Mndumii-Ruwa ukewona wo shindo shileluhoya! Keluambuye wo uwone chandu lulewado nyi sonu.

² Oruka lodu nyi luleo nyi wandu wahenu; na mba tsadu nyi tsileo nyi wahenu.

³ Ambuya nyi luledeo ngoeda lulawode wandeadu, wamayadu wakadeo wai wakusu.

⁴ Ambuya nyi lukeri ihuṟa mṟinga fonyo, lukawehuṟa ngu tsekoṟa.

⁵ Lukaeri iṟunda cha nzoi ang'u ngamia, lukawina luwode momu fo siamoo pfo.

⁶ Ambuya, nyi lokehenda iterewa shelya ko Wamisri, na Waashuru kundu luidime iihutsa mbihu yadu.

⁷ Wafee wadu nyi waledeko na wulalu walemmaa ipfa. Kyaindi so nyi lulya wukiwa kipfa kya wunyamaṟi wowo.

⁸ Masinga nyiwo wakeri iluchilia. Manya kulawode mndu mo luashuo mawokonyi hawo.

⁹ Wawahi nyi waitengeta ipfo mademenyi, koikyo kelya kyadu luikilya ko wukiwa.

¹⁰ Shichong'u shadu nyi shikenga modo cha ili luwodo nyi iseng'u , kipfa kya njaa ikeri ilukoṟa.

¹¹ Ambuya nyi walelaa na waka wadu ko pfinya ipfo mṟinyi fo Sioni, na wana wadu wa kika ipfo shihongohu sha Yuda.

¹² Wakaweotsuo wanene wadu, na wameku wadu walawaindie.

¹³ Wanake wadu wakainengo iṟunda lyesa mso na maho, na wanake wadu wakadiko maṟio malemeri ha ngu.

¹⁴ Wameku wadu wekedamiase na wana wawo pfo, wanake waimba sepfo.

¹⁵ Luwodese se sia mrimenyi pfo; temo na maṟingi hadu shikahaluka shilio.

¹⁶ Shindo shose luwekekushela nasho nyi shilesia shose. Ochia lodu kyamba nyi lulewuta wunyamaṟi.

¹⁷ Mrima yadu nyi iluo kipfa kya mbonyi tso, na meso hadu halaidime iambuo kipfa kya mcheny'eṟe yadu.

¹⁸ Kyamba fumvu lya Sioni nyi liledeo lilawode kindo. Mapaaṟa nyiho haitemapfo.

¹⁹ Kyaindi iyo Mndumii-Ruwa, nyi nochiitoṟia mlungana, na wumangi wopfo nyi wochikaa ko marika hose.

²⁰ Nyi kili mandi olukumba kiheri kileshe kido? Ngesa na ochikaa ulukumbuose?

²¹ Keluwihiṟese hoi Mndumii, naso lukuwuye se, keluwihiṟiese kiṟumi kilya kyadu kya kacha.

²² A ngesa nyi oluleha piu? A ngesa nyi olusuya mnu?