SHILIO 4 - Bibilia Kui Mdedie fo Kimochi

Yerusalemu yamenyamaṟo

¹ Keambuya chandu sahabu yadu ilesanjika, sahabu iwenjicha mnu ilenyamaṟika. Maho halya ha wuhuru wung'anyi nyi haleṟaṟanjo ipfo mtandarenyi.

² Wana wadu wa Sioni chandu wawewode kiṟumi kodu cha sahabu. Indi wulalu nyi wakeri iwumbo wumbo cha teri ya mosungusia shinungu.

³ Ambuya shisii nyi shekeonza wana washo, kyaindi wandu wako nyi wawalang'a, cha nyaha njinesi ko maalea hatso.

⁴ Ambuya wana wawo nyi wakeri ipfa ko njaa na nyoda, wana nyi wakeri ifihiṟia kelya kyaindi kuwode mowainenga pfo.

⁵ Wandu wawekelya necha ili mbooko, wulalu nyi waipfa njaa ipfo njienyi. Walya wawewatoṟishe ki-usuṟi wulalu nyi wakeri iirio kindo kelya mboshenyi.

⁶ Wandu wako nyi walekapo ngapo ing'anyi kota wandu wa Sodoma, walya waleoloka mawokonyi ha Mndumii-Ruwa walakusirie.

⁷ Wana wa Sioni wawewaheṟemtsu, wakaila kota manzaho. Mbihu yawo nyi iwenjiwanzi ikawada pfinya na poru.

⁸ Kyaindi wulalu mbihu yawo ileiwuo puti, wakaida njienyi walakimanyikese; shichong'u sha mbihu yawo shikauma soṟo, shikawadana na mafuo hawo.

⁹ Nyi nanga walya walepfia shidenyi wechikapana, kota iwo walepfa kyombuho kipfa kya njaa.

¹⁰ Ngapo iya ilechea wandu wako ilewakangaṟitsa, ma chandu waka wawode mrima fo isaṟia, nyi walekoṟa wana wawo wawenyi wakawalya kiheri kyo ngapo ing'anyi ilewakoya.

¹¹ Mndumii-Ruwa nyi alelekia nyashi yake ing'anyi, kaatsa modo fukakoṟa Sioni, mṟasa njomombonyi tsafo.

¹² Kyamba kuwode mndu ose, ang'u wamangi wa mkambo ya wandu waweidikie ke mkituwa nawechiidima iida mongonyi ya Yerusalemu pfo.

¹³ Ikyo nyi kilehendeka kido cha kipfa waikimbi nyi waledeko, na wakohanyi nyi walepusuo samu ya wandu walawode mti alya mṟinyi.

¹⁴ Wanene wawo nyi walerahanyika ipfo na ipfo njienyi cha shipfupfuṟe, kyamba nyi wawefanyi samu, kulakae manya mndu ose alekuwasha nawo.

¹⁵ “Hendenyi! Hendenyi!” Nyi wudo wandu walewafuna, “Nyo nyi mufanyi ngafu manya mulakuwashe naso. Wakakuṟahia ṟahia kiidi kya mkambo ya wandu kulakaepfo manya umu alewaambia.

¹⁶ Mndumii-Ruwa kawarahanyitsa oo amonyi; alakihendelie se wakohanyi na wanene wadu.

¹⁷ Lukaarohiyo ilaa dembo lochiweda moiluikanyia, lukalaa dembo lochiweda mkambo fo wandu wechicha ilukiṟa lulawone.

¹⁸ Wakituwa wadu wakaluosha, lulakiidimese manya iida njienyi, nalyo lukawona ke mfiri yadu nyi yasia na mtsitsionyi fodu nyi foshika.

¹⁹ Walya waweluosha wakaanguo kota owishi, wakalufuna ipfo mafumvuhu, wakawelutukia ipfo kundu ko nuka.

²⁰ Wakawada ulya luwemkusirie, Mangi ulya awemshimbuo nyi Mndumii-Ruwa, ulya ewekehamba ke nyi echiluringa na wakituwa wawekeri iluterengia.”

²¹ Nyo wa Edomu nyi mochiidima ikeseka wulalu, nanyo wa Uzi nyi mochiidima ichihiyo wulalu. Kyaindi kikombe ki kya sahabu nyi kechiwachea, nanyo nyi mochihenda ikinyo na inango, nanyo nyi mochichumia kiṟanguo.

²² Ngapo ya wunyamaṟi wopfo iyo Sioni nyi yaawukia, Mndumii-Ruwa echikuduose wusingenyipfo. Kyaindi iyo Edomu, Mndumii nechimukapa, na nyi echiloṟa wunyamaṟi wonu.