SHILIO 3 - Bibilia Kui Mdedie fo Kimochi

Ngapo, idumbuya na mkusirie

¹ Inyi nyi mndu njilewona ngapo, kui iṟipo lya nyashi ya Mndumii-Ruwa.

² Kyamba nyi alenjiwada kawenjiduo, Kundu kuwode mema kulawode saa.

³ Kyamba nyi alenjihoṟoya owoko loke inyi tupu, kawenjikapa kapa mfiri puti.

⁴ Kawekuṟa kichong'u kyako na nyama tsako, kawefunja mafuo hako.

⁵ Kyamba nalenjitengetia, kanjiṟinjawia ko fowa na shituuro.

⁶ Kanjidamiṟa meemenyi cha wandu wapfie kacha.

⁷ Kawenjiṟingichia na omombo kundu njiladiche, kanjipfunga na mshe njilemeri.

⁸ Ma chandu njiweilaha na imfihiṟia nanjiikanyie nyi aleleha kiterewo kyako kilamshikie.

⁹ Kaweshinga njia tsako na maho sa hang'anyi, kawerahanyitsa shi njia shilya shako shisise.

¹⁰ Oo nyi cha rumu likeri injiowelia; kawewa cha miiso ikuṟikie.

¹¹ Kanjifuna njienyi tsako, kanjihaluo kiriteko na mkiwa, Nyi alenjifuna ipfo njienyi, Kanjifunjafunja kanjida njii mkiwa.

¹² Ambuya nyi alekuruo uda woke kanjiṟunga na mfi foke.

¹³ Kawenjilasa na mfi yake, kiidi kya mbihu foko iwuka wudenyi woke.

¹⁴ Wandu wakanjiseka mfiri puti, ngawewa mndu mosalucho nyi wandu wose;

¹⁵ Kanjiichuṟa mawawio, kawenjiihutsa na msumukio.

¹⁶ Nyi aleturunja kyamu kyako terinyi, na maheho hako kahasea mahonyi.

¹⁷ Mrima foke fuichise kindo kelaho nyi ofoṟo pfo, na shikawa kindo kihenu koko.

¹⁸ Njilekusaṟa, “Ngapfio nyi mdo, na mkusirie foko ko Mndumii-Ruwa fukasia piu.”

¹⁹ Ngakumbuo mawukiwa hako na chandu njileṟahaṟaha, kukanjiinenga isumukia ling'anyi mnu.

²⁰ Njekekusaṟa isho orio mfiri na ngoo yako ikaichuo msumukio tupu.

²¹ Koikyo nyi njikumburie kindo kimu, na inyi nyi njiwode mkusirie.

²² Ikunda lyinganyi lya Mndumii-Ruwa lyeketsitsapfo, Isaṟia lyake liwode mtsitsionyipfo.

²³ Kyamba orio ngamenyi nyi injihya mnu, wusumhanyi woke nyi wung'anyi mnu.

²⁴ Mndumii-Ruwa nyio ai kisa kyako, Koikyo nyi njimkusiriao tupu.

²⁵ Mndumii-Ruwa nyi akeri mcha ko walya wose wakumsirie, kawekuwia mhoo ko walya wose wakeri impfula.

²⁶ Nyi kindo kicha mnu ko mndu iwedia okiṟo luwukie ko Mndumii-Ruwa.

²⁷ Kyamba nyi kindo kicha mnu mndu ikulosha iwedia, kuwokia ai manake.

²⁸ Ili indi lowawio nyi ki luwaṟi idamia na itsia sau, lochikarishia.

²⁹ Kyamba nyi kiwaṟi ikuhutsa wanda lochikunyiiṟa, Kyamba nyi kuwode mkusirie.

³⁰ Kokoya lokapo na irumo, nyi kiwaṟi lushiambie shose.

³¹ Mndumii-Ruwa mosaṟia echiidima ilukumba mlunganapfo.

³² Kokoya aluendie fowa, ikunda lyake na woloru woke shechisia kodupfo.

³³ Mndumii-Ruwa ekechihiyo iluendie fowa na wukiwapfo.

³⁴ Mndumii nyi aichi ili mandi mrima fumsokie nyi fowa njii kipfungonyi.

³⁵ Mndumii nyi aweichi chandu luwaime wusumhanyi wulya aluinengie.

³⁶ Mndumii-Ruwa nyi awewonyi chando wulohi wokeembeṟutso ipfo mengenyi.

³⁷ Nyiu echiidima ihamba kindo kiwutike kidi, ko shile Mndumii-Ruwa ahamba kiwutike kido?

³⁸ Shicha na shiwicho nyi shekewutika kokoya o awawasa.

³⁹ A nyi wuda mndu echinunuwa, kokoya nyi akapo kipfa kya wunyamaṟi woke?

⁴⁰ Lukauheshe lochiambuya mchumie yadu, luhende iwuuya Mndumii-Ruwa.

⁴¹ Lupfunguo mrima yadu ko Mndumii-Ruwa, ipfo Ruwehu lochimterewa.

⁴² Nyi lulekunyamaṟia na ikudicha, hoi Mndumii-Ruwa, kyaindi iyo omeluhoṟiepfo.

⁴³ Nyi ulewado nyi nyashi koluosha, koluwaha kulawode osaṟio.

⁴⁴ Kokushikia ipuchinyi ling'anyi, shiterewo shadu shilaidime ikushikia.

⁴⁵ Nyi uleluhaluo nyi mbosha na ngafu, kiidi kya mkambo ya wandu.

⁴⁶ Wakituwa wadu wose nyi wailusalucha na ilukapia mang'aang'o.

⁴⁷ Shindo shioweshie na wuowu nyi shioshanyi naso, lukohoyo nyi ngapo na irumatso.

⁴⁸ Meso hako nyi hailetsa meda ya mchenyeṟe, kipfa kya ngapo ya wandu wako.

⁴⁹ Meso hako nyi hailetsa mchenyeṟe ilawode isia.

⁵⁰ Na itane ili mandi Mndumii-Ruwa echiluambuya awuka ruwehu naluwone kunu wanda.

⁵¹ Mrima foko nyi fuwodo nyi fowa mnu kipfa kya shilya shilewutikia waka wa mṟi fulya.

⁵² Ambuya nyi njiledeho cha kilehe na wandu walya wanjisuo njilawode kitewe.

⁵³ Wakanjikumba ṟungunyi njii na moo, wakaweshinga mongo fo ṟungulyo na iho.

⁵⁴ Mṟinga fukanjisokia mdonyi, na inyi ngawona iki nyi opfu loko.

⁵⁵ Njikeri kulya wanda ya ṟungu lilya, ngakufihiṟia hoi Mndumii oko.

⁵⁶ Kiheri njilekueṟeṟia ke unjiadanyie kilio kyako konjiadanyia.

⁵⁷ Konjiadanyia konjiwia manya njilaowuo.

⁵⁸ Kowecha injiashuo Mndumii, konjikiṟa moo foko.

⁵⁹ Konjianduya ko injikundia, kyamba nuweichi mawicho njilewutiyo.

⁶⁰ Kyamba nyi uichi chandu wakituwa wako wanjisuo, na chando walenjitengetia ko mtambo.

⁶¹ Kyamba nyi uleicho shirumo shawo hoi Mndumii-Ruwa, na kyama kyawo kenjimarisa.

⁶² Madedo na makusaṟo ha wakituwa wako mfiri puti nyi chandu wechinjimarisa.

⁶³ Kiheri kyose wadamie nyi inyi tupu wainjisalucha na injikapa mang'ang'o.

⁶⁴ Kewatae kiṟache hoi Mndumii, kya shilya shose walewuta.

⁶⁵ Kewasese na mrima yawo uihaluo matondo.

⁶⁶ Wasokie ko nyashi yapfo, uwarumatse piu kunu orukenyi.