SHILIO 2 - Bibilia Kui Mdedie fo Kimochi

Ngapo ya Yerusalemu

¹ Ambuya nyashi ya Mndumii-Ruwa, nyi ilewika wandu wa Sioni memenyi. Kiṟumi kya Israeli nyi alekiolotsa wanda. Mkonu fulya fo nyashi yake nyi alewihitsa hekalu lilya lyake.

² Mndumii-Ruwa nyi alerumatsa kulawode isaṟia, mba tsose tsa wana wa Yakobo. Kyamba nyi alewunduo njomombo tsose tsa wandu wa Yuda ko nyashi yake. Kyamba nyi alewunduo wumangi wowo na wamangi wake. Kawuolotsa wanda ko sonu.

³ Pfinya yose ya Israeli nyi aleifunja ko nyashi. Manya alehoṟuo owoko loke lo osaṟia kiheri walekoyana na mesa pfo; Kyamba nyi aleakia wana wa Yakobo cha modo, karumatsa orio kindo.

⁴ Kyamba nyi alekuruo uda woke cha mesa, Kawewuṟeheṟa owokonyi loke lo kulyo, kawewaha wandu wose wanene kiidi kya mba tsadu wandu wa Sioni. Kaweluletsia nyashi yake cha modo.

⁵ Mndumii-Ruwa nyi alehaluka mkituwa, Kyamba nyi alerumatsa wandu wa Israeli; Kawewunduo mba tsake tsose, kawewunduo njotiṟiwa tsake, Kaweengeṟia wana wa Yuda kilio na shilio.

⁶ Hekalu lyake nyi aleliwunduo cha kitaṟa kya mdemi, mba yake nyi aleinyamaṟa. Kaweleha mfiri yake mnene na sabato ipfo Sioni, kaweleha mangi na wakohanyi ko nyashi yake.

⁷ Mndumii-Ruwa nyi alesalucha rasio lyake, kaweleha na hekalu lyake. Njomombo tsa mba tsawo mṟinyi kadea wakituwa watsiwunduo, wakarahiya ipfo mbenyi wechifihiṟia Mndumii-Ruwa, kifahiyo kyo kikawa cha kiheri kya mfiri mnene.

⁸ Mndumii-Ruwa nyi awekusirie iwunduo mṟi fulya fo Sioni, kawefuhesha kawona ke orio kindo nyi kyanyamaṟo, shose shikaoloka wanda handu hamu.

⁹ Mongo yatso ikaoloka wanda, makofuli hayo kawehanyamaṟa na ihafunjafunja. Mangi na wanene wawo nyi wakeri wusingenyi kiidi kya mkambo ya wandu. Wusongoru wo wuwawaso wulesia piu, Waikimbi wawo wakedambuyose mbonyi, tsiwuka ko Mndumii-Ruwapfo.

¹⁰ Wameku wa Sioni nyi wadamie wanda watsie sau, ambuya nyi wakushie kilulyi mdonyi yawo, na maṟao hawo nyi makunyia. Wana wa kika wa Yerusalemu nyi wakuinadie wakasotsia shamu wanda.

¹¹ Meso hako nyi hashimbi kipfa kya ifihiṟa, mumuyo foko nyi fufanyi. Mrima foko nyi fuwodo nyi fowa ing'anyi, kipfa kya ngapo ya wandu wako, kipfa shiwana shinangu nyi shipfia mtandarenyi ya mṟi.

¹² Wakeri ieṟeṟia wamayawo: Kelya nyi ku kikeri, mṟinga nyiku fui? Kunu nyi wakeri iuma, cha wandu wafaṟe kiidi kya mtandara ya mṟinyi, wakapfiia wamayawo ipfo mawokonyi hawo.

¹³ Njikuwieki iyo Yerusalemu? Njikufananyitse na kiki? Njikufananyitse na kindo kya mbaṟi ida kundu njiidime ikuwihiṟia moo, Iyo Sioni ui mcha? Ngapo tsapfo nyi tsing'anyi cha ipalyipalyi. Ngesa nyiu echiidima ikukiṟa?

¹⁴ Waikimbi wapfo nyi walekuendie wuikimbi wo kulemba, Kyamba walekutambaṟuya necha wuwicho wopfo kundu uidime ikualachapfo, kyaindi nyi walekuendie mbonyi tsa wongo na tsekudetsa.

¹⁵ Walya wose waweida na njia wakakusalucha na ikukapia mang'ang'o iyo Yerusalemu, wakadihintsa mdo yawo wakakumina wakahamba: Ngesa ifu nyi mṟi fulya fuwei mcha fudi? Mṟi fuwekeri sia ya wuyana wose?

¹⁶ Wakituwa wapfo nyi wakeri ikutaluo, wakakuselia mada, na ikuimadia maheho, wechihamba “Lomemmarisa!” Nyi kya lohi mkonu fulya luwefuwedia na macha, nyi fushikie naso lomefuwona.

¹⁷ Kyamba Mndumii-Ruwa nyi awuta kilya awekusirie, nyi aawutsia shilya awehambie, chando aweikusirie wokia mboko, cha kipfa nyaṟumatso kulawode osaṟio lose; nyi ainenga wakituwa wachihiyo kipfa kya ngapo yapfo, kyamba nyi aṟumisha ngohoda tsa wakituwa wapfo.

¹⁸ Njomombo tsapfo iyo mṟi fo Sioni fihiṟia Mndumii-Ruwa! Mcheny'eṟe yapfo ipusuke cha meda kio na mfiri! Fihiṟa na isumukia kulawode itsitsa.

¹⁹ Kio taṟaṟaa ukure ochifihiṟa. Tambaṟuya Mndumii-Ruwa kilya kikeri mrimenyi fopfo, uwemleshia mawoko hapfo ochiterewia wana wapfo, wana wapfo wakeri iuma handu hose ipfo mtandarenyi.

²⁰ Keambuyawo hoi Mndumii-Ruwa uwone! Ngesa na kuwodese mndu ulememmbutia ishi uleluwutia so? Handu waka walelya wana wawo? Na itane wakohanyi wahenda iwohiyo hekalunyi lyapfo?

²¹ Mnying'a ya wanake na wameku ilee terinyi ipfo njiehu, wana wako wa kika na wa kisoṟo nyi walewoho ko oshu; ambuya nyi ulewaha kulawode isaṟia mkonu fulya fo nyashi yapfo.

²² Kyamba nyi ulewalaha cha mfuhonyi, wakituwa wako walenjiowesha njora tsose. Mkonu fulya fo nyashi yapfo hoi Mndumii-Ruwa, kuwode sa aleidima idicha ang'u ikuashuo pfo, walya wose njilewafee na iwatoṟisha, wakituwa wako nyi walewarumatsa.