SHILIO 1 - Bibilia Kui Mdedie fo Kimochi

Fowa ya Yerusalemu

¹ Ambuya nyi kiṟiha kya mṟi fuweichuo wandu, wulalu nyi fukeri wulya! Nyi mṟi fuwewode mng'ano kiidi kya wandu wa mkambo; indi wulalu nyi fukeri cha mndu mka mkusu. Kiidi kya mṟi ingi nyi fuwei cha mana o kika o mangi; kyaindi wulalu nyi fukeri isinga lya wandu wengi.

² Nyi wakeri ifihiṟa kio kyose mchenyeṟe ikeri ipusuka. Ambuya kuwode manya umu o wambuya wake akeri imsaṟiapfo. Mbuya tsake twose nyi tsilemṟiingia wose nyi walehaluka wakituwa wake.

³ Wandu wa Yuda nyi walehenda wusingenyi handu hamu na matuuro na wusinga wung'anyi. Ambuya wulalu nyi wakeri kiidi kya wandu wa mkambo, manya wawodese handu heonyonyiapfo. Iwa nyi walewaosha na iwawadia kiidi kya mawukiwa.

⁴ Njia tsilya tseida Sioni nyi tsiendie fowa; Kuwodese wandu waidapfo wechihenda se mfiri ii njinene pfo. Mongo yo ya Sioni nyi ikeri wulya; wakohanyi wake nyi waifihiṟa; wana wake wa kika nyi wawodo nyi fowa, na mṟi fo fuenyi nyi fumrohie.

⁵ Wakituwa wake nyiwo wafuikolonyie, nawo nyi waloṟie ing'ana. Kyamba Mndumii-Ruwa nyi alefukapa kipfa kya madeko hafo hafoi. Wana wa mṟifo nyi wawaduo wusingenyi kuleshe.

⁶ Kiṟumi kyose kya wandu wa Sioni nyi kilesia; Wanene wawo nyi walewa cha mando ha ngeṟenyi halawode kindo kelya. Ambuya pfinya ilewasia wakadicha watuuri wawo.

⁷ Ambuya wulalu nyi fui mrumatse piu, Yerusalemu nyi wakeri ikumbuo mng'ano fofo, Kiheri fuleoloka mawokonyi ha wakituwa wafo, kulakaeho manya umu mowaekia. Wawinzi wake nyi walewaseka chando waleoloka.

⁸ Yerusalemu nyi ulewuta wunyamaṟi sa wuwicho, fukokufanyitsa kipfa kya wunyamaṟi wofo. Wose wawefuṟumishie wakafumina, kyamba nyi walewona fui kitaṟe. Wakawesumukia na ikuṟika kipfa kya sonu.

⁹ Ngafu yake nyi ilewono na pata, indi wo walasaṟe kya mtsitsionyi fofo. Ioloka lyake nyi lyiweng'anyi mnu; kulakaepfo msa echiidima iwawihiṟiya moo. Wakahamba; “Keambuyawo wo hoi Mndumii-Ruwa maturo hako, kyamba mkituwa oko nyio awa mbinzi.”

¹⁰ Ambuya wakituwa wake nyi walehoṟuo mawoko hawo, kundu waduo shindo shake shose sha wuhuru. Ee, nyi ulewona wandu wa mkambo wechiida na hekalunyi, wandu sa Mndumii-Ruwa alawewainengie momu, fokaa kiidi kya wandu wake.

¹¹ Wandu wa Yerusalemu wose nyi wakeri iwalia kindo kelya; nyi wakeri iwuta shisa shawo kundu wawone kelya; waidimese iwihiṟa pfinya tsawo. Na mṟifo nyi fukeri ifihiṟa, “Kenjiambuya, hoi Mndumii-Ruwa, keambuya wo chando ngawa ngafu.”

¹² “A ngesa nyo mukuidia na njia musaṟawo kindo? Keambuyenyi! Kuwode mndu alemewado nyi fowa mrimenyi cha inyipfo, Mndumii-Ruwa alenjiendie, keambuya chandu njilewa indo lipiṟe.

¹³ “Keambuya nyi aleolotsa modo fuwuka huye, nafo fukanjikoṟa mafuo hako. Keambuya nyi alenjideha, na mdeho kanjiwada, nalyo kanjiwihiṟa numa, kanjida njii muumu mkahai, mfiri puti.

¹⁴ “Ambuya nyi aletala madeko hako hose, kahawumbia handu hamu; kahapfungia nzingonyi yako cha oṟo. Wulemeri woho wukanjisoka pfinya tsako, Mndumii-Ruwa nyi alenjiolotsa mawokonyi hawo, wandu njilawewode pfinya yelimbana nawo.

¹⁵ “Mndumii-Ruwa nyi aleleha mbahanyi tsiwenjiringa. Ambuya nyi alehamba kiheri kenjikapa, karumatsa wanake wako wa kisoṟo. Kawarumatsa kiidi kya wandu wako wa Yuda.

¹⁶ “Kipfa kya ikyo njikeri ifihiṟa, mchenyeṟe ikeri ipusuka, ambuya njiwode mndu ose monjiwihiṟia moo pfo; keambuya kuwode monjiwihiṟia moo pfo. Wana wako nyi waledeo ngueda, kyamba wakituwa wako nyi wanjiwinga.

¹⁷ “Ambuya njikeri iiriya mawoko hako huye, manya kuwode monjiwihiṟia moo pfo. Mndumii-Ruwa nyio alewuta wuwawaso ado kyako inyi Yakobo, wamṟasa wako wawe wakituwa wako, Ee, inyi Yerusalemu nyi ngawa kindo kidaa kowo.

¹⁸ “Ee ambuya Mndumii-Ruwa nyi awuta kya wusumhanyi, kyamba nyi njilemina idedo lyake, nyo wandu mose kenjiadanyienyi, ambuyenyi matuuro hako. Kyamba wana wako wa kika na wa kisoṟo, nyi waledao wusingenyi

¹⁹ “Ambuya nyi njilelaha wakunde wako, kyaindi wakanjilehia. Wakohanyi wako na wameku wako, nyi walepfiiya mṟinyi, wechipfula kelya, kundu kiwawihiṟiye moo.

²⁰ “Keambuya wo hoi Mndumii-Ruwa chando njii mrohie. Mumuyo foko nyi fofana, mrima foko fukasokio nyi fowa. Kyamba nyi njilelekana na iyo ili iwicho. Kyamba ipfo nja nyi kuichuo wuwahi, na kunu mba nyi opfu tupu.

²¹ “Keambuyawo chando njikeri isumukia; kulawoneke monjisaṟia. Wakituwa wako nyi waleicho mawukiwa hako. Wakachihiyo kipfa kya ili ulenjiidikia ngapo. Keawutsiawo kyasa uleteṟia mkonufo fushike, uwakape walye wukiwa cha inyi.

²² “Kewataewo kiṟache kipfa kya wuwicho wowo wose. Uwewawutiawo chandu ulenjiwutia inyi, kipfa kya madeko hako hose. Kyamba nyi njisumukia mnu kya mawawio hako, na mrima foko fukeriuma.”