SEFANIA 1 - Bibilia Kui Mdedie fo Kimochi

¹ Idedo lya Mndumii lilechea Sefania, mana o Kushi, mana o Gedalia, mana o Amaria, mana o Isikia; mkonu ya Yosia, mana o Amonyi, mangi ya Yuda.

Mfiri fo Mndumii fo ianduo mondu

² Njechimamiṟa shindo shose, shilechiwono-se orukenyi, Mndumii ahamba.

³ Njechimamiṟa mndu o wandu na orio kikiwike kyose. Mando ha ngeṟenyi ndehe tserunduka; makunga ha mṟingenyi, hamu na wawicho; njechirumatsa mndu o wandu elechikaa nawono - Mndumii ahamba.

⁴ Njechihoṟwo owoko loko huya Yuda, na huya wandu wose wai Yerusalemu; na inyi njiarisye wandu mtsuhaṟo fo Baali, fulechiwonose iya, na rina lya Wakemari hamu na Wakohanyi;

⁵ na walya weindia kulya ruwehu wai kai ka mba na iwo weterewa, na ilya nyamu ya Mndumii na ilya nyamu ko Malkamu;

⁶ na iwo wawewuuye numa walakioshe Mndumii, na iwo walakeshiha Mndumii, manya iwesa kyake.

⁷ Tsia sau oshangunyi lo Mndumii-Ruwa; kipfa mkonu fo Ruwa fui hafui; Mndumii nyi ateseheṟie kidaso, Nyi ailyishiye wahenu wake.

⁸ Na kechiwa, mkonu fulya fo kidaso kya Mndumii, njechihoṟwo wanene wana wa Wamangi, na wandu wose waṟee nguwo njihenu.

⁹ Na kiidi kya mkonu fulya njechihoṟuwo iwo wose weitola mongo waichuṟie mba ya Mndumiii owo wukika na wulembi.

¹⁰ Na kiidi kya mkonu fulya, Mndumii ahamba, kochiwada kifihiṟo mongonyi fo makunga na ifuha ling'anyi kihongo kya kawi, na mtiṟi fung'anyi fuwukie fumvuhu.

¹¹ Wulalu fuhenyi nyo mose mokekaa Makteshi, kipfa walya wekapa mbucha wasaramaya; iwo wawode mkunja ya fesa wapfie.

¹² Numa ya maheri ho njechiweṟuwetsa Yerusalemu na kimui keaka; njechihoṟwo iwo wai makusaṟonyi hawo wehamba ipfo mhionyi yawo, Mndumii echiwuta mecha ang'u mawicho - pfo.

¹³ Na wusuṟi wowo wochidao wusingenyi, mba tsawo tsechiwa njisame, wechiwika mba indi walechikaapfo; wechiwaaya ndunda tsa msabibu indi wechinyo mvinyopfo.

¹⁴ Mkonu fo Mndumii fung'anyi fui hafui Nyi hafui, fuikambiṟa icha Ee, ṟu lya mkonu fo Mndumii, Mbahanyi nafihiṟa kewawio mnu,

¹⁵ Mkonu fulya nyi mkonu fo nyashi, mkonu fo kiwi, mkonu fo inyamaṟo na iliso wukiwa, mkonu fo meema rambatanyi, mkonu fo mapuchi na mema fushinge,

¹⁶ mkonu fo taṟumbeta na singiri Mṟi injiiṟihiye omombo, Iwode shitanga shileshe mnu.

¹⁷ Inyi njechiendie wandu wukiwa, wahende cha shipfupfuṟe, kipfa waletana wunyamaṟi;samu yawo yechipusuyo cha kiluli, na mnying'a yawo cha mbuṟo.

¹⁸ Fesa ma sahabu yawo yechiidima iwakiṟa mkonu fulyapfo, mkonu fo nyashi ya Mndumii, kipfa oruka lose lochikoṟo na modo fo nyashi yake; kipfa nechiwika mtsitsionyi fo wandu wose wai kiidi kya oruka, ee mtsitsionyi foṟihisha.