RUTI 4 - Bibilia Kui Mdedie fo Kimochi

Boazi aalika Ruti

¹ Kyasia Boazi kado mṟasa kichuminyi, kadamia ho; ambuya mndu ulya o kishari kya afui ulya Boazi alededa kyake kaidaho. Kamlaha kambia, “Iyo kencho na iya hafui.” Nao kacha naho kadamia.

² Numa kalaha wandu ikumi kiidi kya wandu waku wa mṟinyi, kawawia, “Nanyo da damienyi alya.” Wakadamya.

³ Numa kawia mndu ulya, “Noemi chu alewuya awuka Moabu, nyi akundi ikumba kenga kya dema lilya lya manowamaodu, Elimeleki.

⁴ Inyi nkyo njirie ikumanyisha ulihuṟe oshangunyi lo wangochi wa wai oshangunyi lopfo na wameku wa kokoya ochilihuṟa, necha ulihuṟe; indi kokoya ulechilihuṟa, unjiwie njimanye kipfa kulawode mndu ungi o afui o kisharinyi shile nyi iyo na inyi.” Nao kambia, “Njilihuṟa.”

⁵ Boazi kambia, “Mkonufo ochilihuṟa mawokonyi ha Noemi, nawehuṟa na Ruti Mmoabu mka o manowama ulya apfiie umwooṟe nomwalutsie luwa.”

⁶ Nahong'u mndu ulya o kishari kekiicho kya Ruti kahamba, “Njechiidima ilihuṟa kui pfinya tsakopfo njilanyamaṟe kyooṟa kyako njimonyi; koikyo wusumhanyi woko wo ihuṟa kudaaye iyo kumonyi, kipfa inyi njechiidima ihuṟapfo.”

⁷ Kyasia kiwekeri mwichiwie fo kacha fo Waisraeli ko mbonyi tselaa na ialachana kundu wose wamanye, mndu nekewuta kyadu kyake kainenga mano mae. Ikyo nyikyo nyamu ya wokia kacha.

⁸ Nahong'u ulya o kishari kya afui kawia Boazi, “Iyo huṟa kumonyi.” Kawuta kyadu kamnengia.

⁹ Boazi kawia wameeku walya na wandu walya wose, “Inu tichi nyo mowa wangochi na waṟingishi ke inyi ngahuṟa shose shiwei sha manowama Elimeleki ulya alepfa na shose sha Kilioni na Mahloni mawokonyi ha Noemi.

¹⁰ Ngoseṟa Ruti chu Mmoabu mka o Mahloni ngamhuṟa nawe mka oko, kundu njiirie manowama kishari rina lyake lilawone lechideka nao nadumbuke; manya kichumi kyake kilasaramaye. Inyi inu ngawika kiṟingishio.”

¹¹ Wandu wose wawei alya kichuminyi na wameku wakahamba, “Ee so nyi waṟingishi. Mndumii nahaluo mkachu aida na ipfo mba kopfo cha Raheli na Lea, walya wawi walewika mba ya Israeli. Na iyo uwikio ona lo Efrata uwe ang'anyi kiidi kya Bethlehemu.

¹² Mba yapfo ifanane cha mba ya Peresi, ichu Yuda alefee na Tamari kui oshari Mndumii echikuinenga kiidi kya mndu mka chu.”

Boazi na oshari loke

¹³ Kyasia Boazi kaduo Ruti, kawa mka oke, Mndumii kasaṟia Ruti kakapika kafee mana o womi.

¹⁴ Na waka walya wakawia Noemi, “Mndumii naichiko, ichu alalekuda kulai na kishari kya afui, rina lya ichu ling'ane kiidi kya wandu wa mkambo fo Israeli.

¹⁵ Nao nyi echikuwihiṟia moo, na ikuambuya kiheri kya wuku wopfo; kyamba malyi chu opfo nakukundi, nao nakushikie kota wana mfungade ulewafee.”

¹⁶ Nahong'u Noemi kaduo mana ulya, kambika ndenyi tsake kawa meri oke.

¹⁷ Waka walya wawei wamṟasa wake wakamdumbuya rina wehamba, “Noemi amefeo mana;” wakamlaha rina lyake Obedi, nyio ndee o Yese ai ndee o Dawidi.

¹⁸ Ishi nsho shishari sha Peresi, Peresi nyalefee Hesroni;

¹⁹ na Hesroni kafee Ramu; na Ramu kafee Aminadabu;

²⁰ na Aminadabu kafee Nashoni; na Nashoni kafee Salmoni;

²¹ na Salmoni kafee Boazi; na Boazi kafee Obedi;

²² na Obedi kafee Yese; na Yese kafee Dawidi.