RUTI 3 - Bibilia Kui Mdedie fo Kimochi

Ruti aongoyo chila yewona mii

¹ Kyasia mkonu fumu Noemi ai mamii o Ruti kambesa, “Ngesa manoko, chi kiwechichia njikupfulie sia, kundu uwone, mechaṟ

² Akashika Boazi chu, chi ai o kishari kyadu, ichu uwei na wana wake wa kika. Ambuya, kio ki kya inu nyi akeri iela Ngano alya patehu.

³ Kyasia iyo samba kose, ukushie mafuda, uṟae nguwo tsapfo, nduma nohende alya patehu; kyaindi ulakuloṟe ko mnducho, mṟasa namarise ilya na inyo.

⁴ Kiheri kelaa kikashika, noambuye handu alaa, na iyo noide naho, ushukuo madende hake nokulaṟe-ho, nao nechikuwia kikuwaṟi iwuta.”

⁵ Kambia, “Isho shose ohamba njechishiwuta.”

⁶ Kyasia kasoka itane patehu; kawuta chando mamii oke alembawasa.

⁷ Boazi amemarisa ilya na inyo, na ngoo yake ikaheṟemka, kahenda ilaa mtsitsionyi fo nungu ya Ngano; na mndu mka ulya kacha kyomboho woowelia, kashukuo madende hake kalaa ho.

⁸ Ili kio makidi hawi mndu ulya kapang'nka kakuhalutsa, ate! Aichu mndu mka alee madendenyi hake.

⁹ Kawesa “Oṟa, iyo nyiu.” Kamhaluo, “Inyi nyi Ruti, kisinga kyapfo; kyeiria nguo yapfo noshikie kisinga kyapfo; kipfa iyo nyi o kishari kii kufui.”

¹⁰ Kambia, “Manoko, uwikio ona nyi Mndumii; noengeṟa iloṟa isaṟia lyapfo ifurumia kota mawookionyi, chando ulakundi iosha wanake, ma kokoya wawuṟie ang'u wawode wakiwa ang'u wasuṟi.

¹¹ Nahong'u manoko, kulaowuo, inyi njechikuwutia shose odeda; kipfa mṟi fose na wandu wako wose wakuichi ke nyi ui mndu mka mcha.

¹² Kingise na lohi ke inyi nyi o kishari kyapfo kya afui; kyaindi kuwode mndu ai o afui kota inyi.

¹³ Iyo tirima kio ki, nduma ngamenyi, kokoya aidikia ikuwutia cha o kishari kya kufui necha, nakuwutie; indi kokoya alakunda, inyi njechiwuta chando kiwaṟi mndu o kishari. So Ruwa menyi moo. Ukulaae mṟasa ngamenyi.”

¹⁴ Naho mndu mka ulya kalaa alya madendenyi mṟasa ngamenyi; ngamenyi kilawo kakure ma mndu alaidima iwona mndu namanye; kipfa Boazi nalehamba, “Kulamanyike ke mndu mka nawelee patehu.”

¹⁵ Ngoseṟa Boazi kambia, “Ende mtandio fo uṟee ufuwade,” nao kafuwada; kawikaho kiheo kya shikunja shiṟandaṟu sha ngano kamdika. Kyasia mndu mka-cho kawuya na mṟinyi.

¹⁶ Kyasia kekishika ko mamii oke kambesa, “Nyi uda kilewa manoko.” Kamwongoya shose msoṟo ulya alemutia.

¹⁷ Kambia na kiheo-ki kya shikunja shiṟandaṟu nanjiinenga, kipfa nanjiwia ulahende ko mamii opfo na mawoko ha wulya.

¹⁸ Nahong'u mamii oke kahamba, “Wulalu manoko, sia moo; mṟasa uwone chando mbonyitsi tsechihenda; kipfa mnduchu echichihiyo shile amarisa mbonyitsi inupfo.”