RUTI 1 - Bibilia Kui Mdedie fo Kimochi

Elimeleki na kishari kyake wahenda Moabu

¹ Kyasia kiheri kya Wachili wamemaa idumbuo kya walya wawewaṟi, kukacha njaa ing'anyi kulya orukenyi. Kukakure mndu msoṟo umu o Bethlehemu ya Yuda, kahenda ikukaya oruka lo Moabu, o na mka oke na wana wake wawi.

² Na rina lya msoṟo ulya nelaho nyi Elimeleki, na rina lya mka oke nyi Noemi, na marina ha wana walya wake wawi Maloni na Kilionyi, Waefrata wa Betilehemu ya Yuda. Wakashika oruka lo Moabu wakakaapfo.

³ Kyasia Elimeleki, kapfa, ulya awei mii o Noemi; nao mka ulya kadeoho ai na wana walya wake wawi.

⁴ Wanake walya wakaalika waka wa Moabu; umu nyelaho nyi Aripa na ulya o kawi nyi Ruti. Wakakaapfo maka yahenda ikumi.

⁵ Ifurumiaho Maloni na Kilioni wakapfa; mka ulya kadeoho ai mkusu kipfa mii awemarisa ipfa numa wana wake wawawi wakawepfa.

Noemi na Ruti wawuya na Bethlehemu

⁶ Nalyo kakure, oo na walyi wake, kundu nakure kulya orukenyi lo Moabu; kipfa naleicho ai ipfo orukenyi lo Moabu ke Mndumii-Ruwa nalechea wandu wake kawainenga kando.

⁷ Nahong'u kakure alya hando awei na walyi walya wake wawi; wakawada njia itane orukenyi lo Yuda.

⁸ Kyasia Noemi kawia walyi walya wake wawi; Hendenyi wulalu muwuye orio mndu na ko mae. Nao Mndumii namuwutie shii shicha, chando nyo mulenjiwutia mecha hamu na walya walepfa.

⁹ Mndumii namuinenge sia orio umu kanyi koke na mii oke. Kawahekia momu kawachunguṟia nawo wakafihiṟa mnu na ṟu itane wandu waicho kilio kyawo.

¹⁰ Wakambia, o, chi wudopfo; lochihenda na iyo ko wandu wapfo.

¹¹ Noemi kawahaluo, Lanye wana wako, kuhendienyi; nki kitewe muoshane na inyi Mukusaṟie njiwodese wana wa kisoṟo wusunyi woko wawe wamii wanu ngesa.

¹² Lanye wana wako, kuhendienyi; kyamba inyi njii mku, njechiwonase miipfo. Kima mbechihamba, njikusirie; njialiko kio ki na ifee wana wa kisoṟo-le;

¹³ muwechiwaweda itane washitsa Muwechikaa mulaaliko kipfa kyawo Chi wudopfo wana wako, koko kii kilemeri kota konu, kipfa owoko lo Mndumii luwute huyako.

¹⁴ Nawo wakafihiṟase mnu lya kawi na maṟu hawo; Aripa kahekia mamii momu, indi Ruti kaoshana na Mamii oke.

¹⁵ Nao kahamba ambuya mkomii opfo nawuya na ko wandu wake na ko ruwa oke; wulalu wuya uoshane na mkomii opfo.

¹⁶ Nalyo Ruti kahamba, Ulanjiterewe njikude, Njilechioshana na iyo; Kipfa iyo hando ohenda njechihenda, Hando okaa, njechikukaya. Wandu wapfo wechiwa wandu wako, Ruwa opfo nao nechiwa Ruwaoko;

¹⁷ Handu opfiia na inyi njechipfiia-ho, nahondo njechiṟiko; Mndumii nanjiwutye ado na iengeṟa. Nyi opfu tupu lochiluletsana.

¹⁸ Kyasia ambona nakeri iengeṟa iwanza ioshana nao, kakutsia naladede nao.

¹⁹ Nyi wudong'u wakaoshana wa wawi wakashika Bethlehemu. Wekishika Bethlehemu, mṟi fose fukasambahada kipfa kyawo. Waka wa Mṟi fulya wakawesana, Ichu chi Noemi.

²⁰ Kawawia, “Mulanjilahe Noemi njilahenyi Mara; kipfa Mndumii-Ruwa nalenjiwutia shindo shiendie fowa ing'anyi mnu.

²¹ Inyi njilewuka kunu njiichuo, nao Mndumii kanjiwihiṟa njilawode kindo; nki kitewe munjilahe Noemi, kokoya Mndumii ameṟingishia kyako nao Mndumii-Ruwa kanjilisa wukiwa.”

²² Nahong'u Noemi kawuya kimu na Ruti Mmoabu malyi oke; walewuya wawuka orukenyi lo Moabu wakashika Bethlehemu mawokyonyi hesambuo Ngano.