OTAMBAHALUO LO YOHANE 8 - Bibilia Kui Mdedie fo Kimochi

¹ Na lilyandi kidahina kilefunja mhuri fo mfungade kukaho olele ipfo ruwehu owere lokenga kya saa.

² Numa ngawewona wasu walya waele mfungade wahoṟoki oshangunyi lo Ruwa wakaenengo membe mfungade.

³ Kukacha Msu mwele ungi kahoṟoka ipfo rasionyi arie nungu ya sahabu yeatsa-ho makaa hedosa mtsu fo opuo. Nao kaenengo makaa ha-opuo hafoi kundu echihadambikya rasionyi-hu lya sahabu likeri sumuhana na loṟika lulya handu hamu na shiterewo sha wandu wa Ruwa wose.

⁴ Kukado huye mtsu fo makaenyi ha ipfo owokonyi lo msu chu fodosa opuo sumuhana na Ruwa hamu na shiterwo sha wandu wa Ruwa.

⁵ Na Msu chu mwele kawada nungu iya yedosa opuo kaiichuṟa modo fo ipfo rasionyi-hu kaikumba wayanenyi. Kukaamka-ho makuṟuṟuma na maṟu hededa na nguwa na idihina-shi kiding'ashi.

Taṟumbeta

⁶ Na wasu walya waele mfungade wawode membe tsilya mfungade wakakuteseheṟa ikapa ole.

⁷ Na ichu o kuwoka kakapa ombe. Kukawa mvuo ya manzaho hang'anyi na modo iwei-nlongyelongye samu ikaolyo wanda ii. Na wanda i yose kyenga kyayo kya kaṟaṟu kikahya na mashidi na maṟa mawishi hakawehya hose.

⁸ Na msu ulya mwele o kawi kakapa ombe loke. Mawowo cha fumvu ling'anyi liaakye modo lyikakumbo ipfo ipalyipalyinyi. Na mṟinga fose kyenga kyafo kya kaṟaṟu kikawa samu.

⁹ Na shiwumbe shose shikeri mṟingenyi shii na moo kyenga kyasho kishitsye kya kaṟaṟu shikapfa na mangalawa hose kyenga kyaho kya kaṟaṟu kikashika irumatso.

¹⁰ Na msu ulya mwele o kaṟaṟu kakapa ombe loke. Na nyenyeri inganyi ikaoloka iwuka ruwehu ikaaka cha ipapong'u. Nayo ikahoya meda yose kyenga kyayo kya kaṟaṟu ikawehoya soka tsa mṟinga. (

¹¹ Na rina lya nyenyeri ii nyi “mawawio.”) Na mṟinga fo meda yose kyenga kyayo kya kaṟaṟu fukasakia. Na wandu wafoi wakapfa kipfa wakatewo nyi mṟinga fulya fuwesakia.

¹² Na msu ulya mwele o kaana kakapa ombe loke. Kukakapo-ho mnengeṟi kyenga kyafo kya kaṟaṟu, meri na nyenyeri kyenga kyatso kya kaṟaṟu, kundu kyenga kyasho kilya kya kaṟaṟu kikaei kiruwye nruwe ya meema, na mkonu fo mfiri fulawae kyenga kilya kyafo kya kaṟaṟu na fo kio na wudo.

¹³ Ngaambuya, ngaicho mtonyi fumu furundukye-ho ipfo huye mapuchinyi ha ruwehu fochideda na ṟu ling'anyi; Ochia, ochia, ochia lo walya walee ipfo masangenyi kya msinango iya itsuhae ya membe tsa wasu walya waṟaṟu ilyi wechikapase.