OTAMBAHALUO LO YOHANE 3 - Bibilia Kui Mdedie fo Kimochi

¹ “Na msu ulya o siṟi ya Sarde ochimṟehya, ‘Aii ndumi ya ichu awode mumuyo iya mfungade ya Ruwa na nyenyeri tsilya mfungade, njiichi mawuto hapfo hose, ui-mhambe ke ui na moo ate nyi ukeri mpfu!

² Pang'uka, wanza na shilya shingi shiecha shitsuhae-ho shirie ihenda ipfa. Kipfa mṟasa wulalu nyilamekoya mawuto hapfo haawukye necha oshangunyi lo Ruwa oko.

³ Kyasia kumbuo necha shilya ulelosho na iadanyia ushihendelie. Wada kudi tapu ochidumbuya. Nahong'u koda kulalaa dembo njechicha Pereseng'u cha mwiiwi nolechimanya saa iya njechicha nyi tsinga.

⁴ Kya indi ipfo Sarde uwode marina maata halaweteṟefutsye mṟae yaho. Nawo wechichumia hamu na inyi weṟee maṟao maili kyamba iwasumhanye.

⁵ Wawinzi nyi wudo wechiṟiko nguwo njiili. Na marina hawo njechihaangatsa kitapunyi kya moopfo. Na inyi njechiwaṟingishia ke nyi wako oshangunyi lo Wande oko na oshangunyi lo wamalaika wake.’

⁶ Ichu awode-madu naadanyie iki Mumuyo aiwia siṟi tsi.”

Ndumi ya ko Wafiladelfia

⁷ “Na msu ulya o siṟi lya Filadelfia ochimṟehya;” Aii ndumi ichu ai Mwele Mokiilohi awode opfunguo lo Dawidi. Hando o apfunguo kwipfo sa echiidima ipfunga-pfo. Na hando o apfunga kwipfo sa echiidima ipfunguo-pfo.

⁸ Njiichi mawuto hapfo hose. Ambuya, ipfo oshangunyi lopfo njipfunguye-ho mongo fulawa ishingo nyi mndu. Finya uwode ii ntutu mnu indi na ulekutaamba na mawawaso hako koindia kulakana rina lyako.

⁹ Ambuya, njechiende wa siṟi ya Satana, nyi iwa wakuhamba wawenyi ke Wayuda nawo walai Wayuda indi wakutana wadi wongo. Ee daa, keweambuya-wo njechiwaende wache wapfire ndi wanda ipfo madendenyi hapfo wakuwutye-ho imanya ke nkya lohi njikukundi iyo.

¹⁰ Kyamba iyo uleringa na iwawaso lyako lya ikutirisia, na inyi njechikuiṟicha necha saa iya ya kihesho kilya kyechichea wuyanawu ihesha wandu waipfo kunu wuyanenyi.

¹¹ Nyi icha owinyi njikeri. Wada tapu iki uwode kundu kulawonekye-ho mndu echikusoka aambo lyo lyapfo, lya wuwinzi.

¹² Walya wechiwinza nyi njechiwamtana ngo tsa ipfo Hekalunyi lya Ruwa oko wechiwukapfo manyalepfo. Na inyi njechirehya huya yawo rina lya Ruwa oko na rina lya mṟi fo Ruwa oko, nyi Yerusalemu iya njihya yechisoka iwukye ipfo ruwehu ko Ruwa oko, Njechiṟehya-ho na rina lyako lilya lihya.

¹³ Ichu awode-madu naadanyie iki Mumuyo aiwia siṟi tsi!

Ndumi ya ko Walaodikia

¹⁴ “Na msu ulya o siṟi lya Laodikia ochimṟehya, ‘Aii ndumi iwukie ko ichu amhambe ai Amenyi, o nyi mṟingishi mhendeli mokilohi ai mawokioonyi ha shose Ruwa ashiwikye.

¹⁵ Njiichi mawuta hapfo hose. Kyaho uwode manya mrike manya mbeopfo. Nanga kokoya uwei ma mrike ang'u mbeo!

¹⁶ Indi ili upfuwae kudi, ulawode ma mrike ma mbeo njechikupucha dumbunyi lyako.’

¹⁷ Kyamba uhambye, ‘Inyi njii msuṟi njiwode shako sha mweena njilawuṟye ma kindo.’ Ate kulaichi ke ui mrohye, utoṟowae kudi, ui maliomba, ui mpfu meso, ui kitaṟe.

¹⁸ Ngakuikimba, kunda ihuṟa koko sahabu inlangishe-langishe modonyi kundu uwe msuṟi lohi. Nohuṟe, na mṟae iya mwiili, ukushikye nayo, kundu kulawono wusutsu wo kiṟanguo kyapfo. Huṟa-da na mafuda mecha heshiia meso hapfo kundu uhende yambuo.

¹⁹ Iwa njiwakundi nyi njekewatutuma na iwatoṟisha. Aka wulalu udumbuye, wanza mrima lekena na manyamaṟo hapfo.

²⁰ Ambuya, ngahahoṟoka aa mongo njiikapakapa mongo. Mndu kaicho ṟu lyako kapengeluo mlango, nyi ipfo koke njechiida naapfo njechilya kimu nao, nao nechilya kimu na inyi.”

²¹ “Walya wechiwinza njechiwadamiṟa hamu na inyi loṟikye loko lo wuitoṟi, chando nao inyi njilewinga ngadamia hamu na wande oko ipfo loṟikyehu loke lo wuitoṟi.

²² Ichu awode-madu naadanye iki Mumuyo aiwia siṟi tsi.”