OTAMBAHALUO LO YOHANE 2 - Bibilia Kui Mdedie fo Kimochi

¹ “Msu chu o siṟi ya Efeso ochimṟehya,” Aiha madedo ha ichu ahambye arie nyenyeri tsilya mfungade owokonyi loke lo kulyo, ekyechumia kiidi kya shimnaṟa shilya mfungade sha taa sha sahabu.

² Kye njiichi mawuto hapfo hose. Na njiichi wupfuṟukanyi wopfo na ikukarisha lyapfo. Na njiichi ke okekutirisia wandu wawichopfo.

³ Iyo uwode wukukarishi uwekukamadie kimaduma kya rina lyako ma kulahutse macha.

⁴ Kya indi njikuwodye kindo kimu kyamba unjikundise wulalu cha lilya kuwokapfo.

⁵ Kumbuo-ho wulalu hando kuwei lilya kulawemerendemke, dumbuya manyamaṟo hapfo; kyewewuya mawuto halya hapfo ha kuwoka. Koda kuladumbuya njechicha na kopfo njiwuteho kimnaṟa kyo kyapfo.

⁶ Kya indi ngakuichika kya kindo kimu ukiwode kii kicha: Owa mosuo mawuto halya ha Wanyikolai chando inyi njihasuo.

⁷ Ichu awode madu naicho iki Mumuyo aiwia siṟi tsi. Sa wechiwinga njechiwaenenga wawe molya ndunda tsa ikidi lilya lyende moo likeri ipfo mhundenyi fo Ruwa.

Ndumi ya ko wa Simirina

⁸ “Na msu ulya o siṟi ya Simirina ochimṟehya;” Aii ndumi iwukie ko ichu ai Mboki na Mwawutsi nalepfa kawewuya iwada moo.

⁹ Njiichi matuuro hapfo na wukiwa wopfo, kya indi nyi ui msuṟi. Njiichi na shirumo walekuruma walya wakuhamba ke wai Wayuda nawo walai Wayuda kya indi wakeri siṟi ya Satana!

¹⁰ Ma kulaowuo manyale ishi shekuendie iwawyo. Ambuya! Mbicho ulya nakundi ikumba wanu-ho maata kipfungonyi kundu muhende ihesho. Nanyo mochihenda iliso wukiwa mfiri ikumi. Wenyi wahendeli mtaane mopfa na inyi njechimuinenga aambo lya moo.

¹¹ Ichu awode madu naicho iki Mumuyo aiwia siṟi tsi. Sa wechiwinga wechiwawiṟo nyi opfu lo kawipfo.

Ndumi ya ko Wapergamo

¹² “Na msu ulya o siṟi ya Pergamo ochimṟehya,” Aii ndumi ya ichu awode oshu lulya lo mmbeha kuwi.

¹³ Njiichi handu okekaa, nyi alya kidembonyi kya Satana. Kya indi iyo ukuwodie na rina lyako kowekaa kulawekana wuidiki wonjiidikya ma ilindi Antipa, mringishi oko sa mhendeli aleshika iwoho ipfo kidembonyi kya Satana.

¹⁴ Indi njikuwodie mondu kya shindo shiwe, kyamba ipfo konyu uwode wandu wawode njopfundo tsa Bileamu awekelosha Balaki iduo wana wa Israeli wutahachinyi wahende ilya nyama ndasye maruwa ha wongo na wuṟuhuinyi na wulala.

¹⁵ Nyi wudo kuipfo na wengi wekyeosha njopfundo tsa Wanyikolai.

¹⁶ Dumbuya wulalu. Indi chila wudo njechicha kopfo owinyi njiwaendie shida na oshu luwukye dumbunyi lyako.

¹⁷ “Ichu awode-madu naadanye iki Mumuyo aiwia siṟi tsi.” Sa wechiwinga njechiwainenga manna iya ii-njiṟike njiwewainenga na kiho kii kiili pang'a kii kiṟehyo rina lyihya. Ma kulaipfo alimanya chila walya weliambya.

Ndumi ya ko Watiatira

¹⁸ Na msu ulya o siṟi ya Tiatira ochimṟehya, Aii ndumi ya Mana o Ruwa awode meso haiakaaka cha olewo lo modo, na madende hake haiwaa hafananyi na menya ya aṟeṟa.

¹⁹ Njiichi mawuta hapfo hose na mkundie fopfo, na mwidikye na mpfuṟukanye na mkukarishie, fopfo. Njiweichi na mawuta hapfo ha wulalu hamecha kota halya ha kuwoka.

²⁰ Indi njikuwodie mondu, kyamba oidikiana na mka ulya Yezebeli ichu akuhamba amonyi ke mwikimbi o Ruwa kalosha echitusa masinga hako wawe waṟuhui wahende ilya na nyama ndasye maruwa ha wongo.

²¹ Na inyi njilemnengya mwaanya fodumbuya wunyamari woke ma alakundi idumbuya kya wulala woke.

²² Ambuya. Wulalu ngamkumba kitaṟenyi kya mbadiko kilya wawekyelaa na waṟuhui walya nao. Ngawakumbalya wahoye wufotsinyi wung'anyi kokoye welechidumbuya kya mawuta halya hawo mawicho.

²³ Na iwaha njechiwawaha wana wake. Na siṟi tsose tsechikuwutya-ho imanya ke nyio inyi njii-ho njechitiichia ngoo na mahio ha wandu. Njechienenga orio onu ose chandu kisumhanye mawuto hake.

²⁴ “Indi nyo wengi mui ipfo Tiatira mulakuwode na kiloshyo kya Yezebeli, mulalekulosha, ‘Mbonyi tsa Satana,’ makisenyi ha Satana wai, chando wo wekehamba, nyi ngambia ke njechimuwikya ṟio lingipfo.

²⁵ Kimuwaṟi muwade necha kilya mukiwode wulalu itane njechicha.

²⁶ Wawinzi; na walya wechikuwada na shilya njikundi itane mainutsyonyi nyi njechiwatana wanene wa wandu wa msaṟakambo. Ee da njechiwainenga pfinya iya iya ndeambia ko wande.

²⁷ Nao echiwalisiṟa na olio lo menya na iwapaṟapaṟa cha ili wawei nungu njiwumbe.

²⁸ Chando na inyi njileliambya njii-mwenengye nyi Wande oko. Na inyi njechimwenenga nyenyeri ya heṟa.

²⁹ Ichu awode madu naadanye iki, Mumuyo aiwia siṟi tsi.”