OBADIA 1 - Bibilia Kui Mdedie fo Kimochi

¹ Mbonyi tsilya Obadia aleloṟo na iwona. Nyi wudi Mndumii-Ruwa ahamba kya Edomu, Luleambiya mbonyi tsiwuka ko Mndumii, Kuwode mndu amdume kiidi kya mkambo fo wandu, Kechihamba, Wulalu, kurenying'u; Lukaure lukapane nao.

Mndumii-Ruwa nechihoṟwo Edomu

² Ambuya, njilekuhaluo mtutu kiidi kya mkambo fo wandu; Nyi uimmine mnu.

³ Orikiki lo mrima fopfo lulekulemba, Iyo okekaa njopangenyi tsa maho hang'anyi, Hando okekaa nyi huye mnu; Ekehamba mrimenyi foke, “Nyiu echinjisotsa inyi?”

⁴ Manya kowedo huye cha mbeṟo, Manya kokoya sungu yapfo iwei kiidi kya nyenyeri, Njechikusotsa uwuke ho; nyi wudo Mndumii ahamba.

⁵ Kokoya waiwi wawekuchea, na wasoki wakakuchea kio, ngesa! Waweiwa shiwashikie? Kokoya wehaa ndunda tsa msabibu wawekuchea, ngesa! Wawechida ndunda tsingi, tsedoduo?

⁶ Chando wandu wa Esau wakerishiho-shiho! Chando shisa shake shii shiṟike na iwesio-wesio!

⁷ Wandu wose muweidikianyi nawo, Walekufuna, itane mṟasenyi; walya walewada ofoṟo na iyo nyi ofoṟo walekulemba, na ikurohia; Walya wekelya mkate fopfo wawikie mdeho shiyapfo; Ma awode mahiyo ha isho kiidi kyakepfo.

⁸ Mkonu fo ngesa njechirumatsa wandu wawode wuṟango kiidi kya Edomu, na walya wenyi mahiyo kitoṟomosohu kya Esau? Mndumii ahamba.

⁹ Na ngohoda tsapfo, wa mbahanyi, Iyo Temani, wechidedema, kiwe ke orio mndu nafunyio kuleshe kya iwaaho kitoṟomosohu kya Esau.

Kitewe Edomu nahoṟoyo

¹⁰ Kipfa kya wukika manomayo alewutyo Yakobo, sonu tsechikushikia, na iyo nochidetso mlungana.

¹¹ Mkonu fulya ulehoṟoka kihadi, mkonu fulya wahenu waleduo masaa hake, na wandu wa mbaṟi tsingi waleida shichuminyi shake, na iwika kuṟu kuhya kya Yerusalemu, na iyo na uwei cha umu owo.

¹² Kyaindi kulaambuye mkonu fo manomayo, mkonu fo makusaṟo hake, manya ulaikereme wana wa Yuda mkonu fowo fo orumatso, manya uladede madedo ha orikiki kiheri kyawo kya kiwi.

¹³ Ulaide kichumi kya wandu wako, mkonu fowo fopfiio; yee, ulaambuye maturo hawo, mkonu fowo fopfiio; mawoko hapfo hakae kuleshe na masaa hawo mkonu fowo fopfiio.

¹⁴ Ambuya kulahoṟoke njienyi tsiitsahanyi, kundu nowahe walya wake waidicha; manya kulawone kochiwuta wandu walya wake waletsuhaa, mkonu fo kiwi.

Ruwa nechianduya wandu wa mkambo

¹⁵ Kipfa mkonu fo Mndumii fui hafui ko wandu wa mkambo wose; chando kulewuta, nyi wudo ochiwutio; wueri wopfo wochikuwuya wuche huya mdo fopfo iyo kumonyi.

¹⁶ Kipfa chando mulenyo huya fumvu lyako liele; nyi wudo wandu wa mkambo wose wechinyo kitsitsi; yee, wechinyo na itandawuka, nawo wechiwa cha ili walamewa male.

Waisraeli wechiwinga

¹⁷ Indi kiidi kya fumvu lya Sioni kochikaapfo sa wechikia, nalyo lyechiwa liele, na mba ya Yakobo wechiikolonyia wuikolonyi wowo.

¹⁸ Na mba ya Yakobo yechiwa modo, na mba ya Yosefu yechiwa olewo lo modo, na mba ya Esau yechiwa mashaku maumu, wo wechiaka kiidi kyawo, na iwarumatsa; manya kuwode mndu ma umu echitsuhaa kiidi kya mba ya Esau pfo; na isaramaye; nyi Mndumii ahamba isho.

¹⁹ Na wandu wa Negebu wechiikolonyia fumvu lya Esau; na wandu wa Shefela wechiitoṟia Wafilisti; nawo wechiitoṟia dema lya Efraimu, na dema lya Samaria, na Benyamenyi naitoṟie Gileadi.

²⁰ Na mamiingi fo wana wa Israeli walewado shidenyi, wai kiidi kya Wakaananyi; wechiitoṟia mṟasa Sarepta; na wandu wa Yerusalemu walewodo shidenyi, wai Sefaradi, wechiitoṟia mṟi ya Negebu.

²¹ Ngoseṟa wakiṟi wechidooya huya na mafumvu ha Sioni kundu waanduye fumvu lya Esau; na wamangiwo wechiwa kisa kya Mndumii.