NGUMBUO YA MAWAWASO 9 - Bibilia Kui Mdedie fo Kimochi

Wutimbiri wo wandu

¹ “Adanyienyi lanye Waisraeli! Inu kudi motikiria iambada meda fo Yordani muambadie oruka lo mkambo ya wandu ing'anyi na iwode pfinya kota nyo. Mṟi yawo ing'anyi na iwode njomombo tsishikie mapuchinyi.

² Wanduwo wawaleshe wawode pfinya; nyi Waanaki sa chandu mlewio na imanya wandu wechihamba kyawo ‘Nyiu eidima iwasembelia?’”

³ Manyenyi inu tichi ke nyi Mndumii-Ruwa, Ruwa onu, ichu aimusongoya chandu modo fokombetsa mashidi. Nechiwawinga oshangunyi lonu na iwakombetsa, ko ikyo mochiwafuna na iwakombetsa oweṟe chandu Mndumii-Ruwa alemuteṟia.

⁴ “Mndumii-Ruwa, Ruwa onu, kamemaa ifuna wanduwo oshangunyi lonu, manya mulahambe mrimenyi yanu ke, “Kipfa kya wuhendeli wodu nkyo kimaduma Mndumii-Ruwa aleluende luchilie orukalu, kundu Mndumii-Ruwa afuna wanduwa oshangunyi lodu kipfa wai wanyamaṟi.

⁵ Chi mochiidima ichilia orukalu lowo kipfa kya ili mui wandu wecha ang'u muwode mrima njiheṟemtsupfo; kyaindi Mndumii-Ruwa, Ruwa onu naifuna wanduwo oshangunyi lonu kipfa kya wunyamaṟi wowo nao nakundi iwanza idedo lilya aleliia waku wanu nyamu, Abrahamu, Isaki na Yakobo.

⁶ Kyasiang'u manyenyi ke Mndumii-Ruwa, Ruwa onu, naimuinenga orukalu lucha muchiliepfo chi kipfa kya ili mui wechapfo, kyamba nyo nyi wandu wa orikiki.

⁷ “Kumbuonyi manya mulahadime chandu muledosa Mndumii-Ruwa, Ruwa onu nyashi kulya nuka. Wokia mkonu mulekure orukenyi lo Misri tane mkonu mulepfulutsa na mulewamonyamaṟia Mndumii-Ruwa.

⁸ Manya kulya fumvuhu lya Horebu muledosa Mndumii-Ruwa nyashi, nalesuo iki kiwicho nakamu, handu awekundi imurumatsa.

⁹ Kiheri njiledo na fumvuhu iambia maṟaṟo halya ha maho sa hawei maṟehie mma Mndumii-Ruwa awewikie nanyo, njilekaapfo mfiri makumi haana (40), mfiri na kio; njilelya ma inyo kindo kyosepfo.

¹⁰ Numa Mndumii-Ruwa nalenjiinengia maṟaṟo hawi ha maho hamaṟehie kui kimnyo kya Ruwa; hawei maṟehie madedo hose halya Mndumii-Ruwa alemuwia kulya fumvuhu kuwuka kiidi kya modo mkonu fulya fo kisanzio.

¹¹ “Ee! Da numa ya mfiriyo makumi haana (40), mfiri na kio, Mndumii-Ruwa nalenjiinengia maṟaṟoho hawi ha maho hawei maṟehie mkundana.

¹² Nahong'u Mndumii-Ruwa kanjiwia: ‘Kure, soka owinyi kuwuka kunu fumvuhu, kyamba wandu wapfo kulewawuta kulya Misri wameakia mbai. Oweṟe wamelekana na njia iya njilewawasa wanjioshe wakasungusia mfanano yetsana.’

¹³ “Mndumii-Ruwa kanjiwiase, ‘Ngawona wanduwa nyi wandu wa mtoolo nakamu;

¹⁴ leka njiwarumatse, njiangatsie kuleshe rina lyawo lya wuyanenyi; na inyi njikutane iyo nowe mkambo fung'anyi fuwode pfinya kotawo.’

¹⁵ “Kyasia, ngahaluka, ngasoka njiwuka kulya fumvuhu, njikudikie maṟaṟo halya hawi ha mkundana, na modo fuweaka kulya fumvuhu.

¹⁶ Ngaambuya, ngawona ke momenyamaṟia Mndumii-Ruwa, Ruwa onu; muwemesungusia mfanano fo ihache lyetsana lya aṟeṟa; oweṟe cha ili muwemelekana na njia ya Mndumii-Ruwa iya alemuwawasia.

¹⁷ Ko ikyo, njilewada maṟaṟo halya hawi ngahakumba wanda ngahafunja oshangunyi lonu.

¹⁸ Numa ngalaa wanda na ndeu oshangunyi lo Mndumii-Ruwa, cha lilya mawokioonyi, ko mkonu makumi haana kio na mfiri; njilelya kelya ma inyo mṟingapfo, kipfa kya wunyamaṟi wulya muwewutie. Mkawuta mawicho oshangunyi lo Mndumii-Ruwa mukamsukiṟa.

¹⁹ Njileowuo ke nyashi na tuuke ya Mndumii-Ruwa kipfa kyanu, iwemukombetsa; kyaindi Mndumii-Ruwa nalewenjiadanyiase kambali.

²⁰ Mndumii-Ruwa nalewesuose daa mnu nakamu kipfa kya Aroni, handu awekundi imkombetsa ko ikyo ngamterewia na Aroni kiheri na ikyo.

²¹ Kindo kilya kiwicho, ihache lilya mulekusungusia, njileliira, ngalirumatsia modonyi, ngalipochapocha na ilisa likawa cha kiluli kya kimamile; kiidima ngaokumba kilulyikyo kiidi kya kimeda kiwesokie kulya fumvuhu.

²² “Muledosase Mndumii-Ruwa, Ruwa onu, nyashi kulya Tabera, Masa na Kibroth-hataava.

²³ Na kiheri Mndumii-Ruwa alemuduma kuwuka Kadesho-barnea kechihamba, “Henda chilienyi kulya orukenyi njilemuinenga,” mulemmina; muleidikia manya iindia shilya alemuwiapfo.

²⁴ Nyo mulewa wapiṟi na wemina Mndumii-Ruwa wokia mkonu njilemumanya.

²⁵ “Ko ikyo, njilelaa na ndeu oshangunyi lo Mndumii-Ruwa mkonuyo makumi haana, kio na mfiri, kipfa Mndumii-Ruwa nawehambie ke nechikombetsa.

²⁶ Njileterewa Mndumii-Ruwa njechihamba. “Hoi Mndumii-Ruwa, kularumatse wanduwa wapfo na kioṟa kyapfo, wandu kulewatalaa na iwawuta orukenyi lo Misri kui wuidimi na pfinya yapfo ing'anyi.

²⁷ Kekumbuowo waṟundi wapfo, Abrahamu, Isaki na Yakobo, manya kulasaṟe kya orikiki, wuwicho na wunyamaṟi wo wanduwa.

²⁸ Wandu wa kulya kundu kuleluwuta walashike ihamba, Mndumii-Ruwa nalewawuta kunu kundu nawawahie kulya nuka kyamba nalelemo iwaduo kulya orukenyi alewateṟia kyamba nawewasuo.

²⁹ Cha kipfa, wanduwa nyi kioṟa kyapfo, wana kulewawuta kui pfinya na wuidimi wopfo wunene.”