NGUMBUO YA MAWAWASO 7 - Bibilia Kui Mdedie fo Kimochi

Mkambo msambuṟe fo Mndumii-Ruwa

¹ “Mndumii-Ruwa Ruwa onu, nechimushitsa orukenyi handu mochiwikapfo handu hekaa nao nechifunapfo mkambo ifoi iwukepfo. Kiheri mochiida napfo, nechifunapfo oshangunyi lonu mkambo ingi mfungade ing'anyi na iwode pfinya kota nyo: Wahiti, Wagirgashi, Waamori, Wakanaani, Waperizi, Wahivi, na Wayebusi.

² Mndumii-Ruwa, Ruwa onu kamemaa iwika mkamboyo ingi mawokonyi hanu, mukamewinga wanduwo na iwarumatsa nakamu, manya mulawike mkundana fose nawo, manya mulawaichio wukiwa.

³ Mulaalikane nawo, wana wanu walaaliko kowo ang'u wanake wanu walaalike wana wawo wa kika.

⁴ Mkawuta mudo wo wechitondosha wana wanu walechiosha Mndumii-Ruwa, wawetewa wana wanu waindie maruwa hengi, na nyashi ya Mndumii-Ruwa yechicha huye yanu, naho oweṟe lumu namurumatse.

⁵ Kyaindi nyi wudi mochiwawutia: Mochifunja rasio tsawo na iwunduo ngo tsawo. Na mfanano ya Ashera mochitsifunjia kuleshe, na mfanano yawo yepacha mochitsikoṟa na modo.

⁶ Wutenyi mudo kyamba nyo muiwashimbuo ko Mndumii-Ruwa, Ruwa onu. Kiidi kya wandu wose wa wuyanenyi nalemusambuṟa nyo kundu muwe mkambo foke o amonyi.

⁷ “Mndumii-Ruwa alemukunda nyo na imusambuṟa kipfa kya ili mufoi kota wandu wengipfo; nyo muwei waangu kota mkambo ingi wuyanenyi.

⁸ Kyaindi nkipfa kya ili Mndumii-Ruwa amukundi kawewada nyamu iya aleliia waku wanu, nkyo kitewe alemukiṟa kui pfinya tsake tsing'anyi na imuashuo kuwuka wusingenyi, kuwuka mawokonyi ha Farao mangi ya Wamisri.

⁹ Ko ikyo, manyenying'u ke Mndumii-Ruwa, Ruwa onu, nyio Ruwa; nyi Ruwa mhendelyi ekewada mkundano foke; na iloṟa woloru woke ko wana wafoi wa wandu walya wekeindia mawawaso hake.

¹⁰ Kyaindi echida alakapa iwo wamsuopfo.

¹¹ Ko ikyo muhendelyie iawutsia mawawaso, shitutumo na mndumbuye njikeri imuwawasa inu.”

Mboṟa ko iwo wemwindia

¹² “Mukaadanyia mawawasoha na ihawada na ihaawutsia, Mndumii-Ruwa, Ruwa onu, nechiwada mma foke nanyo; na nechimuloṟa woloru woke chandu aleteṟia waku wanu.

¹³ Nechimukunda na imuinenga ona, nanyo mochiengeṟeka muwe luwa lyifoi; nechiwikia madema hanu mboṟa muwone shilimu, mvinyo na mafuda; nechionyisha na imuinenga mmbe na machondi hafoi ipfo orukenyi kundu aleteṟia waku wanu ke nechiwainenga.

¹⁴ Mochiwikio mboṟa kota wandu wengi wose iya wuyanenyi. Kiidi kyanu kochikaapfo wasoṟo ang'u waka wahumbapfo.

¹⁵ Mndumii-Ruwa nechiwuta ndaaṟe tsose ipfo konu; mochiwado nyi ndaaṟe yose ioweshie chandu tsilemuwada kulya Misripfo, kyaindi nechidika ndaaṟetso ko wakituwa wanu.

¹⁶ Kombetsenyi orio mkambofo fose Mndumii-Ruwa, Ruwa onu echifuwika mawokonyi hanu, manya mulafusaṟie. Mulaindie maruwa hawo, kipfa kindo kya mbaṟi ii kechimuwia mdeho mmbicho.

¹⁷ “Manya mulahie mrimenyi yanu ke ‘Wanduwa wafoi kota so, nyi wuda lochiidima iwafuna kunu orukenyi?’

¹⁸ Mulawaowuo, kumbuonyi chando Mndumii-Ruwa, Ruwa onu alewutia Farao na oruka lose lo Misri.

¹⁹ Kumbuo ndaaṟe njiwicho muletsiwona na meso hanu, shichano na ṟiho na pfinya tsing'anyi na wuidimi wunene, shilya Mndumii-Ruwa, Ruwa onu, aleshidika kundu namukiṟe; nyi wudo echiwutia wanduwo muwaowuo.

²⁰ Na kya ngoseṟa, Mndumii-Ruwa, Ruwa onu, nechiwakangaṟitsa na irumatsa iwo wose wechidicha wahende iowa.

²¹ Kyasiang'u manya mulawaowuo, cha kipfa Mndumii-Ruwa, Ruwa onu, nai kiidi kyanu. O nyi Ruwa ang'anyi na naoweshie.

²² Mndumii-Ruwa, Ruwa onu, nechifuna mkamboi ya wandu chandu mochiwasembelia kitutu kitutu. Mochiidima iwakombetsa wose oweṟe lumupfo, cha kipfa mukawuta mudo mando ha ngeṟenyi hechiengeṟeka na imuwiia kindo kioweshie.

²³ Mndumii-Ruwa, Ruwa onu, nechiwika wakituwa wanu mawokonyi hanu na iwainenga wuowu na iwakangaṟitsa mtano wasaramae.

²⁴ Nechidambika wamangi wawo mawokonyi hanu. Mochiwawaaha nawo wahadimo. Kuipfo mndu oose echiidima imuimapfo; mṟasa muwarumatse.

²⁵ Rumatsenyi na modo maruwaho ha mfanano yepacha. Mulalange pesa manya sahabu tsawo, manya mulaiire na isuṟuma iwe kisa kyanu. Mukawuta mudo nyi mdeho konu nyi kindo kisukiṟie Mndumii-Ruwa, Ruwa onu.

²⁶ Muladuo mfanano fo mbaṟi yose kanyi konu, chila wudo mochiseso cha mfananoyo. Kimuwaṟi muisuo na iipiṟa kipfa nyi shindo shisese.”