NGUMBUO YA MAWAWASO 6 - Bibilia Kui Mdedie fo Kimochi

Iwawaso ling'anyi

¹ Iha nyiho mawawaso, Mndumii-Ruwa, Ruwa onu, alenjitutuma njimuloshe, kundu muhaawutsie kulya orukenyi kundo muihenda ikaa.

² Kiheri mui na moo kyose, kimuwaṟi iindia Mndumii-Ruwa, Ruwa onu, na iwada wuhendeli na mawawaso njimuinenga nyo na luwa lyanu kundu muidime ikaa na moo mleshe.

³ Ko ikyo lanye Waisraeli, wadenyi osaaṟe ihaawutsia kundu muwone mboṟa; na ipfumbuka mnu ipfo orukenyi luichuo maruwa na wuki chandu aleteṟia.

⁴ Kyasia, adanyienyi lanye Waisraeli! Mndumii-Ruwa, Ruwa odu, nyi Mndumii-Ruwa umu.

⁵ Kundenyi Mndumii-Ruwa, Ruwa onu na ngoo yanu yose, na mrima yanu yose na pfinya tsanu tsose.

⁶ Wikenyi mrimenyi yanu madedoho njimuwawasa inu

⁷ muwelosha wana wanu ko wuaria. Mochiwaongoya mui kanyi konu ang'u mui kyaṟonyi ang'u ili mulee ang'u ili muikure.

⁸ Hapfungenyi mawokonyi hanu na ihaṟaa shamunyi shanu hawe ngumbuo.

⁹ Haṟehienyi shiwangowangonyi sha mongo yanu na mamongonyi ha mṟi yanu.

Wuikimbi ko wandu wa orikiki

¹⁰ “Chandu Mndumii-Ruwa, Ruwa onu aleliia waku wanu nyamu, Abrahamu, Isaki na Yakobo, o nechimuinenga oruka luwode mṟi ing'anyi na njicha nyo mulaleiwika.

¹¹ Mmba tsiichuo shindo shicha sa mulaleshiwikapfo, kochiwada maṟungu ha mṟinga sa mulalehasuma nyo na madema ha msabibu na mashidi ha omafuda sa mulalehawaaya. Ili Mndumii-Ruwa echimuduo ipfo orukenyi handu mochiwonapfo shelya shose mochishikunda,

¹² manyenyi ke mochihadima Mndumii-Ruwa alemuwuta Misri kundu muwei masingapfo.

¹³ Mochiadapfuma Mndumii-Ruwa, Ruwa onu, mochimṟundia o amonyi tupu na iwika kyasa kui rina lyake amonyi tupu.

¹⁴ Mulaindie maruwa hengi, maruwa ha wandu wai mṟasenyi nanyo,

¹⁵ nyashi ya Mndumii-Ruwa ilashike huyanu, namrumatsie kuleshe wuyanenyi, kyamba Mndumii-Ruwa, Ruwa onu ai kiidi kyanu nyi Ruwa ai moṟisaṟisa.

¹⁶ “Mulaheshe Mndumii-Ruwa, Ruwa onu, chandu mulemhesha kulya Masa.

¹⁷ Ṟingishienyi ke moindia mawawaso ha Mndumii-Ruwa, Ruwa onu na mndumbuye yake alemuwawasa.

¹⁸ Wutenyi shilya shichihiṟie Mndumii-Ruwa kundu muonyisho. Mochiidima iwada oruka lulya lucha sa Mndumii-Ruwa alelya nyamu iinenga waku wanu,

¹⁹ na mochifunapfo wakituwa wanu chandu Mndumii-Ruwa aleteṟia.”

²⁰ Mfiri yechicha, wana wanu wakamuwesa, “Nki kitewe Mndumii-Ruwa, Ruwa odu aleluwawasa iindia mawawaso hake?

²¹ Wawienyi mudi: “So nyiluwei masinga ha Farao mangi ya Misri na Mndumii-Ruwa kaluashuopfo kui owoko loke luwode pfinya.

²² Lulewona na meso hadu kechiwutia Wamisri shichano na ṟiho na mbonyi tsioweshie na tsa kiṟiha, kawutia na mangi na wanjama wake.

²³ Naleluwuta Misri kaluende na iya na iluinenga orukalu, chandu alelya nyamu ke nechiinenga waku wadu.

²⁴ Kyasiang'u, Mndumii-Ruwa naleluwawasa iindia wuhendeliwu wose na imwadapfuma kui kipfa kya kiira kyaduso luwenyi; nawuteho iluringa kiheri kyose, cha inu kudi.

²⁵ Kokoya loindia orio kindo Mndumii-Ruwa aluwawasa kui wuhendeli, lochiitalo wandu wawode wuindi na wasumhanyi.”