NGUMBUO YA MAWAWASO 5 - Bibilia Kui Mdedie fo Kimochi

Mawawaso ikumi

¹ Mose nalelaha Waisraeli handu hamu wose, kawawia: “Lanye Waisraeli, adanyienyi mawawaso na shiteṟio njikeri ihamba oshangunyi lonu inu. Kuloshenyi na ihaawutsia kui wuhendeli.

² Mndumii-Ruwa, Ruwa odu, nalewika mkundano naso fumvuhu lya Horebu.

³ Alewika mkundanofo na wameku wadupfo, kya indi nalewika naso lose lui na moo inu kudi.

⁴ Mndumii-Ruwa nalededa nanyo dumbu kui dumbu ipfo fumvuhu kiidi kya modo.

⁵ Kiherikyo inyi njilehoṟoka makidi hawi hanu na Mndumii-Ruwa, ngamuongoya shilya alehamba, kyamba nyo muleowuo modo fulya na manya muledo na kulya fumvuhupfo. Mndumii-Ruwa nalehamba adi,

⁶ ‘Inyi nyi Mndumii-Ruwa, Ruwa opfo njilekuwuta orukenyi lo Misri, kundu kuwei isinga.

⁷ Kulawade maruwa hengi shile na inyi.

⁸ “Kulasungusie mfanano ya maruwa hepacha, manya ofano fo kindo kyose kii huye ruwehu, manya kii wanda wuyanenyi, manya kii mṟingenyi wanda ya teri.

⁹ Manya kulashiindie ang'u ishiṟundia; kyamba inyi Mndumii-Ruwa, Ruwa opfo, nyi Ruwa moṟisaṟisa. Njekewuwuya njonyamaṟo tsa wandee wa wandu ipfo ko wana wawo tane wachuku na njukuṟi ko iwo wanjisuo.

¹⁰ Kyaindi iwo shiku na shiku wanjikundi wakaweinutsia mawawasoho hako njechiwawikia ona.

¹¹ “Kulasende rina lyako kya mai inyi Mndumii-Ruwa, Ruwa opfo; kyamba inyi nyi Mndumii-Ruwa njechida njilakapa icho oose mowuta adopfo.

¹² Manya mkonu fo Ruwa nofutane mwele, chandu inyi Mndumii-Ruwa, Ruwa opfo, njilekuwawasa.

¹³ Mfiri iṟandaṟu ṟunda maṟunda na iachikia shindo shapfo shose,

¹⁴ kyaindi mfiri fo mfungade nyi mfiri fumsambuṟe kipfa kyako. Mfirifo iyo kulaṟunde iṟunda lyo lyose, manya mana opfo, manya mana opfo o kika, manya isinga lyapfo lya kisoṟo ang'u lya kika, manya mmbe yapfo manya nzoi yapfo, manya indo lyingi lyapfo lyose, manya mhenu ai ipfo kopfo; Kundu masinga hapfo wasie moo cha iyo.

¹⁵ Kulahadime ke iyo nowei isinga kulya orukenyi lo Misri, na inyi Mndumii-Ruwa, Ruwa opfo, ngakuwutapfo kui owoko luwode pfinya na wuidimi. Nkyo kimaduma inyi Mndumii-Ruwa, Ruwa opfo ngakuwawasa noindie mfiri fo mfungade.

¹⁶ “India ndeo na mayo, chandu inyi Mndumii-Ruwa, Ruwa opfo njikuwawasa; wuta kudo kundu nowade moo mleshe na mboṟa kunu orukenyi njikuinenga.

¹⁷ “Kulawaahe.

¹⁸ “Kulaṟuhuye kulaṟuhuyo.

¹⁹ “Kulaiwe.

²⁰ “Kulahambeho sha wongo kundu nowonyie odoo owingo.

²¹ “Kulalange mka o odoo; manya kulalange mba yake, manya dema lyake, manya isinga lyake lya kisoṟo ang'u lya kika, manya mmbe yake, manya nzoi yake, manya orio kindo kii kyake kyose.

²² “Iha nyiho mawawaso Mndumii-Ruwa alemuinenga nyo mose kui ṟu lying'anyi lyiwuka kiidi kya modo na ipuchi lying'anyi na meema fuputikanyi puti. Nalemuwia mandi muwekuwumbie kulya fumvuhu, manya aleengeṟiaho mawawaso hengipfo. Nahong'u kahaṟehia maṟaṟonyi hawi ha maho, kanjiinengia.”

Mose msu o Ruwa

²³ “Kiheri muleicho ṟulyo liwuka kiidi kya meema fulya, kulya fumvuhu liwei iaka modo, wasongoru wose wa shishari shanu na wameku walecha na koko

²⁴ wakahamba, “Adanyia! Mndumii-Ruwa, Ruwa odu, amelutambaṟuya kiṟumi na mng'ano foke; loicho ṟu lyake liwuka kiidi kya modo fulya. Inu tichi lowona Ruwa kechideda na mndu o wandu, nao mndu o wandu handu aweipfa kawada moo!

²⁵ Kyaindi kitewe nki ki ikukumba kiidi kya ndenga ya opfu kui ikombetso nyi modo fulya fung'anyi? Lukaoichose ṟu lya Mndumii-Ruwa, Ruwa odu lochipfa!

²⁶ Ngesa! Nyi mndu o mbaṟi njiki alemeicho Ruwa menyi moo kechideda kuwuka kiidi kya modo chando so loicho numa kawekaa na moo?

²⁷ Nanga iyo Mose otikiria kufui, noadanyie shose Mndumii-Ruwa, Ruwa odu aihamba numa nocheiluwia mbonyitso tsose echikuwia. So lochitsiicho na itsiawutsia.

²⁸ “Mndumii-Ruwa naleicho madedoho hanu, kanjiwia, ‘Ngameicho madedo wanduwa wakuwia; shose wahamba shishicha.

²⁹ Kima kiheri kyose waweiwada mahiyo cha iha wakanjiindia na iwada mawawaso hako! Mbonyi tsawo tsiwewawiia necha kiheri kyose; wo wawenyi na luwa lyawo mlungana.

³⁰ Henda wawiye wawuye na mahemenyi hawo.

³¹ Kyaindi iyo Mose hoṟoka iya kufui na inyi; inyi njechikuwia mawawaso hako hose na wuikimbi wose na shitutumo sa ochiwalosha, kundu orukalo njechiwainenga luwe lowo!’”

³² Nyo ambuyenyi necha muwute chandu Mndumii-Ruwa aimututuma awutsienyi necha orio kindo. Mulatehie mawawaso hake manya lyimuho.

³³ Haindienyi hose chando Mndumii-Ruwa, Ruwa onu, amuwawasa kundu mbonyi tsanu tsimuhendie necha nanyo muidime ikaa na moo mleshe ipfo orukenyi muihenda luwe masaa hanu.