NGUMBUO YA MAWAWASO 4 - Bibilia Kui Mdedie fo Kimochi

Ikuwada na mawawaso ha Ruwa

¹ Mose kaengeṟa ihamba, “Hendelienying'u na iosha mawawaso hose na shilya njilemulosha, kundu muidime ikaa na ichilia kulya orukenyi Mndumii-Ruwa, Ruwa o Wandeanu, aimuinenga.

² Mulaengeṟeho kindo manya kimu kiidi kya mawawasoho njimuinenga, manya mulaanguṟeho kindo; hendelienyi mawawaso ha Mndumii-Ruwa, Ruwa onu iha njimuinenga.

³ Nyo mulewona na meso hanu shindo Mndumii-Ruwa alewuta kya Baal-peori.

⁴ Kyaindi nyo muwei wahendeli ko Mndumii-Ruwa, Ruwa onu, mui na moo mṟasa inu.

⁵ “Kyasiang'u! Njimulosha mawawaso na shilya shose Mndumii-Ruwa, Ruwa oko alenjitutuma ke njiwute, kundu mushiwade ipfo orukenyi kundu muihenda ikaa.

⁶ Wadenyi na ihaawutsia mawawasoho kyamba mukawuta mudo wandu wa mkambo ingi ili wechimanya mawawasoho wechiwutaho imanya ke nyo muwode wuṟango na osaaṟe, wahambe, ‘Kya lohi wandu wa wa mkambofu wawode wuṟango na osaaṟe!’”

⁷ Kuipfo mkambo fungi fose manya fukang'ana fuda sa ruwa ofo ai afui nafo, chandu Mndumii-Ruwa, Ruwa odu ai kufui naso mandi lomemterewapfo.

⁸ Manya kuwode mkambo fungi fose ma fukang'ana fuda, fuwode mawawaso na wuikimbi wo lohi, cha ishi njikeri imulosha inupfo.

⁹ “Kyaindi muambuye necha na ikuṟisa mnu mulashike ihadima shindo shilya muleshiwona na meso hanu muwenyi. Kulashike ihoya manya limu kiidi kya moo yanu mbonyitso tsihadimo mrimenyi yanu. Ongoyenyi wana na wachuku wanu,

¹⁰ kya mkonu fulya mlehoṟoka oshangunyi lo Mndumii-Ruwa, Ruwa onu, kulya Horebu (Sinai), kiheri alenjiwia, ‘Sanyia wanduwo oshangunyi loko, njiwawie madedo hako kundu wakuloshe injiadapfuma inyi mfiri yose ya moo yawo, wawelosha na wana wawo iwuta wado.’”

¹¹ “Kyasiang'u, muletikiria mkahoṟoka wanda ya fumvu lilya lyiweaka modo kiherikyo sa fuleshika huye ruwehu fukarumbalala mema na ipuchi ling'anyi.

¹² Nahong'u Mndumii-Ruwa kadeda nanyo kuwuka makidi hawi ha modo fulya; muleicho madedo alehamba kyaindi mlembonapfo; mleicho ṟu lyake tupu.

¹³ Nalemuongoya mkundana foke kamuwawasa mufuwade, iindia mawawaso hake ikumi alehaṟehia huya maṟaṟo hawi ha maho.

¹⁴ Kiheri kyo Mndumii-Ruwa na nalenjiwawasa njimuloshe mawawasoho hose na isho shose shimuwaṟi iawutsia ipfo orukenyi kundu muihenda.”

Wuikimbi kya iindia sanamu

¹⁵ “Ko ikyo muambuye necha mulashike ihadima ke: Kiheri Mndumii-Ruwa alededa nanyo kulya fumvuhu lya Horebu kiidi kya modo mulemmbona kui fanapfo. Ko ikyo kuṟisenyi mnu,

¹⁶ Muladeko musungusie sanamu yo yose yepacha, ang'u ya fana, ang'u mfanano fo fose fo kisoṟo ang'u fo kika,

¹⁷ fo indo lyose lya wuyanenyi ang'u ilehe,

¹⁸ ang'u mfano fo indo lyekekukuruo wanda na ndeu ang'u ikunga lya mṟingenyi.

¹⁹ Kuṟisenyi kiheri muiambuya nyenyeri, na shindo shose sha ipfo ruwehu, mulashike ishiindia na ishiṟundia. Shindosho Mndumii-Ruwa nainengie wandu wengi washiindie.

²⁰ Kyaindi nyo nyi wandu Mndumii-Ruwa alemuashuo kuwuka Misri kulya nungu nyi ya menya. Nalemuwutapfo kundu muwe wandu wake chandu mukeri wulalu.

²¹ Kipfa kyanu Mndumii-Ruwa, Ruwa onu, nalenjisuo, kalya nyamu ke njechiambada meda fo Yordani njiide na kulya orukenyi lucha alemuinenga luwe masaa hanupfo.

²² Inyi njechipfiia kunu orukenyi manya njechiambada medapfo, kyaindi nyo motikiria iambada ihenda ichilia orukalo lucha.

²³ Kuṟisenyi mnu nakamu mulashike ihadima mkundana fulya Mndumii-Ruwa, Ruwa onu, alefuwika nanyo; mulakusungusie mfanano fopacha fo kindokyo kyose sa Mndumii-Ruwa, Ruwa onu, alemuima mulamhianyitse na kindo kingi kyose,

²⁴ cha kipfa Mndumii-Ruwa, Ruwa onu nyi modo fokekombetsa; o nyi Ruwa moṟisaṟisa.”

²⁵ “Ilyi mochikaa ipfo orukenyi, mukasumbo wana na wachuku, mukakuo, ko koya mowooka irendemka, mukakusungusia mfanano fo indo lyepacha lya mbaṟi yose, mkawuta mawicho oshangunyi lo Mndumii-Ruwa, Ruwa onu, mkamsukiṟa,

²⁶ kyasiang'u, inyi inu ngalaha ruwehu na wuyana shiṟingishie kyanu; ngamuwia napata ke mochirumara nakamu ipfo orukenyi kundu muihenda ichilia mataya ya meda fo Yordani. Mochikaapfo kiheri kileshe, mulakombetso nakamupfo.

²⁷ Mndumii-Ruwa nechimupaṟatsanyia mkambonyi ya wandu wengi; na nyi wandu wanu waangu wechitsuhaa ipfo kundo Mndumii-Ruwa echimufunyia.

²⁸ Ipfo kundu mochiṟundia maruwa ha wongo ha mashidi na maho hai masungusie na mawoko ha wandu; sa helekewona, helekeicho; helekelya manya ipfaamia.

²⁹ Numa mui ipfo-ipfo orukenyi mochimmbona kokoya mompfula na mrima fose na ngoo yose.

³⁰ Shindoshi shose ilyi shechimuhoya ipfo mkalya wukiwa, mochiwuuya Mndumii-Ruwa, na imuindia.

³¹ Mndumii-Ruwa, Ruwa onu, nyi Ruwa mosaṟia, echimudapfo, manya echimukombetsapfo, echihadima mkundana foke alewika na waku wanu kui ilya nyamupfo.”

³² “Kusaṟenyi mnu nakamu kya shindo shilya sha kacha, shindo shilewutika nyo mulamefeo, wokia mkonu fulya Ruwa alewumba mndu wuyanenyi. Wesenyi wuyanenyi kose wokia ora lumu tane lungi, kokoya kulemewutika ma iichio kindo kya kiṟiha cha iki.

³³ Ngesa wandu walemeicho ṟu lya Ruwa lyechideda lyiwuka kiidi kya modo chando mleicho, wakakia moo

³⁴ Kuwode Ruwa ungi oose aleheṟia manya indi ihenda ionduo mkambo foke kuwuka mkambonyi fungi, chando Mndumii-Ruwa, Ruwa onu, alewika, kulya Misri. Mesonyi hanu muwenyi, naleloṟa pfinya tsake tsing'anyi na wuidimi woke shihesho sha kiṟiha, na shida, kaende shindo shioweshie mesonyi hanu kulya Misri?

³⁵ Nyo mulesaṟio iwona isho, kundu muidime imanya ke Mndumii-Ruwa, nyio amonyi ai Ruwa manya kuwode ungipfo.

³⁶ Nalemuinenga iicho ṟu lyake liwuka ruwehu kundu naidime imulosha wuindi; na iya wuyana kamuinenga iwona modo foke fung'anyi na iicho madedo hake hawuka kiidi kya modo fulya.

³⁷ Kipfa kya ili awekundi waku wanu, o nalemusambuṟa nyo mui luwa lyawo kamuwuta o amonyi kuwuka orukenyi lo Misri kui pfinya yake ing'anyi.

³⁸ Kafuna oshangunyi lonu mkambo ing'anyi iwode pfinya kota nyo, kundu namuende na imuinenga oruka lowo luwe kioṟa kyanu, chandu kikeri wulalu!

³⁹ Kyasia, kumbuonyi inu na iwika mrimenyi yanu, ke Mndumii-Ruwa nyio Ruwa huye ruwehu na wanda orukenyi; kuwode ungipfo.

⁴⁰ Ko ikyo wadenyi mawawaso hake iha njimuinenga inu kundu muonyishio, nyo na luwa lyanu, na iwada moo mleshe kiidi kya orukalo Mndumii-Ruwa, Ruwa onu aimunenga luwe lonu mlungana.”

Mṟi yedichia ora lo ngamenyi lo Yordani

⁴¹ Nahongu Mose kasambuṟa mṟi iṟaṟu ora lo ngamenyi lo meda fo Yordani,

⁴² sa mndu echiidima idichia nakuowiepfo, kokoya awaaha mndu kui ndenga alai mkituwa. Mndu cha icho neidima idichia mṟinyi fumuho ya iyo nakiṟieho moo foke.

⁴³ Nalesambuṟa mṟi fo Beseri fui rendewelenyi ya nuka fuwe fo kishari kya Reubeni; na mṟi fo Ramothi fui orukenyi lo Gileadi fuwe fo kishari kya Gadi, na mṟi fo Golani fui orukenyi lo Bashani fuwe fo kishari kya Manase.

Kisongoe mawawaso ha Ruwa

⁴⁴ Iha nyiho mawawaso Mose aleinenga Waisraeli.

⁴⁵ Nalewainenga mdumbuye, mloshie na shitutumo sa Mose aleinenga Waisraeli mandi walewuka Misri,

⁴⁶ Wai mataya ya meda fo Yordani, pichinyi lii kufui na Beth-peori, orukenyi luwei lo mangi Sihoni o Waamori, alechilia wokia mṟinyi fo Heshboni msa Mose na Waisraeli walemmbinga kiheri walewuka Misri.

⁴⁷ Waleduo oruka loke na oruka lo mangi Ogu o Bashani. Wamangiwo wawi wa Waamori walechilia kulya mataya ya meda fo Yordani.

⁴⁸ Orukalo luwokie Aroeri wambaṟa ya meda fo Arnoni tane fumvu lya Sirioni (Hermoni),

⁴⁹ handu hamu na ora lose lo ngamenyi lo Yordani mṟasa ipalyipalyi lya Araba mtsitsionyi fo msaṟi ya fumvu lya Pisga.