NGUMBUO YA MAWAWASO 3 - Bibilia Kui Mdedie fo Kimochi

Mangi ya Ogu awingo

¹ “Numa, lukahaluka, lukado wohenda Bashani. Mangi Ogu kakure na wandu wake wose kakapana naso kufui na mṟi fo Edrei.

² Kyaindi Mndumii-Ruwa nalenjiwia, ‘Manya kulaowuo, cha kipfa njikeri imdambikia mawokonyi hapfo handu hamu na wandu wake na oruka loke. Nochimmbutia kilya kulewutia Sihoni mangi ya Waamori ulya awekeri kulya Heshboni.’

³ “Kyasia Mndumii-Ruwa nalewika mangi Ogu o Bashani na wandu wake mawokonyi hadu, lukawakombetsa kombi manya kulatsuhae mndu oose.

⁴ Lukaaduo mṟi yake yose; kuwode mṟi ma fumu lulalefuduopfo. Luleduo mṟi makumi haṟandaṟu (60) ya ora lose lo Argobu sa luweluchilie nyi mangi Ogu o Bashani.

⁵ Mṟi ii yose iwewode njomombo njileshe, tsiwewode mamongo hawode mamenya. Kuwewodese na shihongo shifoi sa shilawei shiiṟihie na omombo.

⁶ Lulekombetsa orio kindo kiweipfo, lukanyamaṟa orio mṟi na iwaaha womi, waka na wana watutu chandu lulewuta mṟinyi ya mangi ya Heshbon.

⁷ Kyaindi shuma shose na masaa luleshiduo.

⁸ “Kiherikyo luleduo orukalo lo wamangi wawi wa Waamori wawekekaa mataya ya meda fo Yordani, makidi hawi ha meda fo Arnoni na fumvu lya Hermoni.

⁹ (Wasidoni wekelaha fumvulyo nyi Sirioni, na Waamori wekelilaha Seniri).

¹⁰ Luleduo mṟi yose ya ora lo mapichinyi ha shitoṟomoso, na ora lose lo Gileadi na Bashani tane Saleka na Edrei, mṟi ya mangi Ogu o Bashani.”

¹¹ (Mangi Ogu nyio amonyi awetsuhae kiidi kya Warefai. Kitaṟa (isanduku lyake lyeṟiko) kyake kiwei kisungusie na menya (angu maho), kiwewode wuleshe wo madende hawi na wulandari wo kufui madende hawi, kui shiheo sha kiherikyo. Kitaṟakyo kiipfo mṟasa wulalu mṟinyi fo Waamori fo Raba).

Mbaṟi tsa walya walekaa ora lo ngamenyi lo Yordani

¹² Loikiwada mṟi iya, njilehawia shishari sha Reubeni na Gadi ora luwookie mtsudu fo Aroeri kufui na Arnoni na kienga kya ora lo mafumvu ha Gileadi, handu hamu na mṟi yake;

¹³ Numa ngainenga kienga kya kishari kya Manase ora luletsuhaa lo Gileadi handu hamu na Bashani yose iwei wuchilyinyi wo Ogu, ora lose lo Argobu. (Oruka lose lo Bashani luwemanyikie kee nyi oruka lo Warefai).

¹⁴ Yairi, mndu o kisharinyi kya Manase, nalewada ora lose lo oruka lo Argobu, Bashani, tane mṟasenyi fo Geshuri na Maka. Shihongo shose kashidumbuya rina lyake, na mṟasa inu shimanyikie nyi shihongo sha Hawoth-yairi.

¹⁵ Wandu wa mbaṟi ya Makiri wa kishari kya Manase njilewainenga Gileadi,

¹⁶ na wandu wa shishari sha Reubeni na Gadi njilewainenga oruka lose kuwokia Gileadi mṟasa pichinyi lya Arnoni. Mṟasa fowo ora lo nuka fuwei makidi hawi ha meda fo Yaboki sa fuṟasanyi na oruka lo Waamori.

¹⁷ Ora lo kyukanyi oruka lowo lushikie medenyi fo Yordani, wokia nduwa ya Galilaya ora lo mtsudu, kosoka tane ipalyipalyi lya Araba, Ipalyipalyi lya monyo, na msaṟi ya Pisga, ora lo ngamenyi.

¹⁸ “Kiheri kilya njilewainenga mawawaso ha Mndumii-Ruwa, Ruwa onu nalemuinenga orukalu ora lo ngamenyi lo meda fo Yordani luwe masaa hanu. Wulalu nyo ngohoda kiidi kya wana wa mayanu, irenyi shisha muambade meda fo Yordani mui kusonguo ko wana wa mayanu Waisraeli.

¹⁹ Kyaindi waka wanu, wana wanu, na shuma shanu, njiichi muwode shuma shifoi, wechideo ipfo mṟinyi njilemuinenga.

²⁰ Taramenyi wana wa mayanu Waisraeli tane Mndumii-Ruwa echiwasaṟia wasie moo handu hawo chandu nanyo musiie moo, kundu nawo waikolonyie oruka lowo sa Mndumii-Ruwa, Ruwa onu aimuinenga kulya mataya ya Yordani. Numa ya isho, mochiidima ikuwuuya na orukenyi lonu ilu ngamuinenga luwe lonu.

²¹ “Numa ngawawasa Yosua, “Iyo nowona na meso hapfo, alewutia wamangiwa wawi: Sihoni na Ogu; kyasia, o na wudo echiwutia wamangi wa njorukatso tsose mochitsiidia.

²² Mulawaowuo kyamba Mndumii-Ruwa, Ruwa onu, nyio echikapana handu hanu.”

Mose aimo iida na Kanaani

²³ Kiherikyo njileterewa Mndumii-Ruwa njehamba,

²⁴ “Hoi Mndumii-Ruwa, Mndumii-Ruwa, njiichi nonjiloṟa inyi mṟundi opfo mawookionyi ha wunene wopfo na wuidimi wopfo. Cha kipfa, kuwode ruwa o mbaṟi njiki ipfo ruwehu ang'u kunu wuyana eidima iwuta shindo shinene na sha ṟiho chandu okewuta iyo?

²⁵ Ngakuterewa njiambade meda fo Yordani, njikewona orukalo lucha lo ora lo kyukanyi lo meda fo Yordani; ee-da oruka lucha luchihiṟie luwode mafumvu, handu hamu na mafumvu ha Lebanoni.

²⁶ “Kyaindi Mndumii-Ruwa nalenjisuo kipfa kyanu, kaleha injiadanyia. Kanjiwia, “Nahong'u kishikie! Kulahambese kindokyo.

²⁷ Do mṟasa kitoṟomoso kya fumvuhu lya Pisga, noambuye necha ora lo kyukanyi, lo mtsudu na lo ngamenyi nowone orukalo; kyaindi iyo ochiambada medafu fo Yordanipfo.

²⁸ Kyaindi inengia Yosua mawawaso, nombanze na imtumhaṟa, kyamba nyio echisongoya wanduwa itane mataya, iikolonyia orukalo ochiluwona.

²⁹ Kyasia lukadeeyo iya pichinyi lyiambuyanyi na Bethi-peori.”