NGUMBUO YA MAWAWASO 25 - Bibilia Kui Mdedie fo Kimochi

¹ “Ko koya wandu wawi waloyana wakaduo mondufo mengenyi ko wedumbuo mondu, umu kakooyo alawode mti na ungi kawingo,

² kokoya ulya awingo naanduyo ilato maliyo, modumbuo mondu nechimbawasa nalae wanda nalato maliyo hahianyi na idekolyo lyake.

³ Mowingo neidima ilato maliyo makumi haana (40) na chi ngoseṟa ya ihopfo. Mkaengeṟa ngoseṟa ya isho kechiwa nyi momiisalucha.

⁴ “Manya kulapfunge mmbe dumbu lyayo kiheri aihuombeke ang'u mboma.”

Chandu kiwaṟi mndu na mano mae apfiie

⁵ “Ko koya wana wa mka wakeri handu hamu na umuho kapfa naladeho mana o kisoṟo, mka o icho apfa nalaaliko nyi mndu o kishari kingi. Nkiwaṟi mano mae, ulya adeeoho naoṟe mka ulya mkusu.

⁶ Mana o kuwoka o kisoṟo echifeo nyiwo nechisendo ke nyio ulya apfiie kundu rina lyake lyisendo orukenyi lo Waisraeli.

⁷ Kyaindi kokoya mano mae o ulya apfiie alakundi ioṟa mkacho mkusu, kyasia mkacho nechihenda ko wameku wa mṟi nahambe, “Mano mae o Mii oko apfiie naleha injiinenga ikyo kinjiwaṟi, naleha iwonyia manomae luwa kunu kiidi kya Waisraeli.”

⁸ Numa wameku wa mṟi wechilaha msoṟocho wadede nao. Kokoya msoṟocho aengeṟa ileha imwoṟa,

⁹ mkacho mkusu nechimhendia ai oshangunyi lo wamekuwo wa mṟi, nechiwuta msoṟocho kyaadu kyake kimu na impuchia mada kyamunyi kyake na immbia, ‘Nyi wudi mndu aleha ioṟa mka o mano mae apfiie ekewutio.’

¹⁰ Na rina lya mba yake kiidi kya Waisraeli lyechilaho nyi, ‘Mmba ya mndu alewuto shadu shake.’”

Mawawaso hengi

¹¹ “Wasoṟo wawi wakakapana na mka o umuho katarama mii oke kui iwada wusoṟo wo ulya aikapana na mii oke,

¹² mochidumbuo kuwoko ko kulyo ko mkacho, mulamiichio wukiwa.

¹³ “Mulawade shindo sheheshia shiwi: kimu kilemeri-lemeri na kingi kiangu. Mulawade shindo sheheshia sha wulembi.

¹⁴ Manya mulawade mbaṟi tsiwi tsa shindo sheheshia, king'anyi na kitutu.

¹⁵ “Heshienyi na shindo sheheshia shiwode wulemeri wo lohi kundu muidime iwada moo mleshe iya orukenyi Mndumii-Ruwa, Ruwa onu aimuinenga.

¹⁶ Mndumii-Ruwa, Ruwa onu nasuo kya iwo wose wekewuta shindo shido sha wulembi.”

Iwawaso lyewaha Waamaleki

¹⁷ “Kumbuonyi kindo Waamaleki walemuwutia kiheri muwei kyaṟonyi kewuka Misri.

¹⁸ Kumbuonyi chandu walemupufukia kulya njienyi mui warohie wakamukapa. Waamaleki waleowuo Ruwapfo.

¹⁹ Ko ikyo ili Mndumii-Ruwa, Ruwa onu echimuinenga isia moo kipfa kya isaṟikio nyi wakituwa wanu wose wamuṟingichie ipfo orukenyi alemuinenga mukaepfo, kimuwaṟi murumatse Waamaleki wose.”