NGUMBUO YA MAWAWASO 23 - Bibilia Kui Mdedie fo Kimochi

Iletsano na wandu wa Ruwa

¹ “Mndumsoṟo oose amtsane ang'u amdumbuo wusoṟowo woke, awode momu fokulungana kisanzio kya wandu wa Mndumii-Ruwapfo.

² “Mana oose amfee nja ya walyi, manya luwa lyake tane wufee wo ikumi awode momu fokulunga na kisanzio kya wandu wa Mndumii-Ruwapfo.

³ Mwamori oose angu Mmoabu oose, luwa lyawo lyose tane wufee wo ikumi wawode momu fo kulunga na kisanzio kya wandu wa Mndumii-Ruwapfo.

⁴ Cha kipfa waleleha imuinenga shelya na mṟinga mandi muwei njienyi kuwuka Misri, na walelaha Balaamu mana o Beori kuwuka Pethori kulya Mesopotamia imusesa.

⁵ Kya indi Mndumii-Ruwa, Ruwa onu, aleadanyia Balaamupfo; indi oseso lulya Mndumii-Ruwa kaluhaluo lukamuwiia mboṟa, cha kipfa Mndumii-Ruwa, Ruwa onu nawemukundi.

⁶ Ko ikyo mulawatarame wawone ofoṟo na ona.

⁷ “Mulasuo Waedomu; iwo nyi wana wa mayanu. Mulasuo Wamisri, kipfa mulekaa orukenyi lowo cha wahenu kiheri kimu.

⁸ Luwa lyawo wokia wufee wo kaṟaṟu, wawode momu fokulunga na kisanzio kya wandu wa Mndumii-Ruwa.”

Wuheṟemtsu wo mfiṟihenyi

⁹ “Mukahenda shidenyi, mkawika mfiṟiha orio umu onu nakuringe necha na kindo kiwicho kyose.

¹⁰ Ko koya kuwode mndu oose kiidi kyanu alelodia kio kapusuo mbeu tsake; mnducho nechikure nahende nja ya mfiṟiha echikaa kufui na mfiṟihapfo.

¹¹ Kyaindi kukashikia kyukanyi nechisamba kose, na mnengeṟi fukameolokia nechiidima ikuwuuya na mfiṟihenyi.

¹² “Kimuwaṟi iwada choṟo nja ya mfiṟiha.

¹³ Kiidi kya shihia shanu shose mochiwada ikumbi lyesuma shitengu na ikilia mbonona tsanu.

¹⁴ Kiwaṟi mfiṟiha fonu fuwe mwele kyamba Mndumii-Ruwa, Ruwa onu, naisenguda mfiṟiha fonu kundu namkiṟe, na iwika wakituwa wanu mawokonyi hanu. Ko ikyo mulalekie nawone kindo kyose kilawaṟi kiidi kyanu, sile wudo nechimuda.”

Mawawaso hengi

¹⁵ “Mndu isinga kadichia kopfo manya kulammbihiṟe na ko mndumii oke.

¹⁶ Nechikaa na iyo handu hamu echisambuṟa kiidi kya mṟi yapfo, handu kumchihiṟie. Manya kulampufukie.

¹⁷ “Mwisraeli oose, mndumsoṟo ang'u mndumka awode momu fowuta wuṟuhui ipfo hekalunyipfo.

¹⁸ Pesa tso tsose tsawukana na wuṟuhuiwo tsilawiko mwano fo kiteṟio ko Mndumii-Ruwa, Ruwa onu, ipfo hekalunyi; kyamba mndumsoṟo angu mndumka ai mṟuhui ipfo hekalunyi nyi kindo kisukiṟie Mndumii-Ruwa.

¹⁹ “Kulaakuye mana o mayo Mwisraeli wokapa mbucha, manya kulambese mashao ha pesa, kelya ang'u kindo kingi kyose sa wandu wekeakuya na iwesa mashao.

²⁰ Nochiidima iwesa mashao ili oakuya mndu mhenu; kyaindi ko manomayo Mwisraeli kulambese mashao nao Mndumii-Ruwa, Ruwa opfo nechikuwikia ona shindonyi shapfo shose ochiwuta ipfo orukenyi uihenda ikaa.

²¹ Kowika kiasa ko Mndumii-Ruwa, Ruwa opfo kulakeleo iawutsia, kyamba Mndumii-Ruwa, Ruwa opfo nechikuwesa, nakyo kechikuwiia deko.

²² Kyaindi koda kulawika kiasa ochiwada wunyamaṟipfo.

²³ Noambuye necha iawutsia kiasa kulesenda na dumbu lyapfo, kyamba nolewikia Mndumii-Ruwa, Ruwa opfo kui mrima fopfo.

²⁴ “Koida demenyi lya msabibu lya wamṟasa opfo noidima ikuliiaho msabibu chandu oidima, kyaindi kulatoweho msabibu nawike kikunjenyi kyapfo.

²⁵ Koida demenyi lya wamṟasa opfo lya Ngano noidima itufuo mahaa ko owoko nokuliie, kyaindi molawade kimndo nosambuo kilimukyo kyake.”