NGUMBUO YA MAWAWASO 22 - Bibilia Kui Mdedie fo Kimochi

¹ “Kowona mmbe ang'u ichondi lya manomayo lidekie, kulade lideke, liwihiṟe na ko mano mayo.

² Kyaindi kokoya kanyi ko mnducho kuleshe, ang'u kokoya uichi menyi olyopfo, kyasia, duo kyumakyo kanyi kopfo, nakae kopfo mṟasa menyi acha, na iyo nommbihiṟie.

³ Na wudo ochiwuta kokoya nyi nzoi, maṟao, ang'u kindo kyose manomayo adetsie. Ma indi kulade kulammbihiṟia.”

⁴ “Kowona nzoi ang'u mmbe ya mano mayo ihoie njienyi, manya kulade imtarama; nochimtarama iira mmbeyo ang'u nzoiyo.”

⁵ “Waka walaṟae nguo tsa wasoṟo, na wasoṟo walaṟae nguo tsa waka. Mowuta ado nyi asukiṟa Mndumii-Ruwa, Ruwa onu.

⁶ “Kowona sungu ya kilehe mdihu ang'u njienyi, iwode maalea ang'u mapoṟe, na mae ashikie maaleaho ang'u mapoṟeho, kuladuo mae na maaleaho hake.

⁷ Nochilekia mae nakuhendie, kyaindi noidima iduo maaleaho. Kowuta kudo nochihuyo na iwada moo mleshe.

⁸ “Kiheri uiwika mba, wika omombo mbai ya ngeṟayo, kulashike iwonyio deko mndu kaoloka kuwukapfo, kapfa.

⁹ “Kuladonge msabibu yapfo handu hamu na shilimu shingi, shila wudo shilimusho shose shechiwa shilawaṟi, chi shilya kulewaaya tupupfo indi handu hamu na ndundatso tsa msabibu.

¹⁰ “Kulademe dema na mmbe handu hamu na nzoi.

¹¹ “Kulaṟae maṟao hamapfume na mberi tsa machondi na kitani.

¹² Pfunga mambo ndumbenyi tsiina tsa ṟao lyapfo.”

Wuindi ko mbonyi tsa mii na mka

¹³ “Kokoya mndumsoṟo aalika mndumka; ili numa kakunda ilekana nao,

¹⁴ kamkumba ke nawuta mbonyi tsa wusutsu, na imnyamaṟia kiṟumi kyake kechihamba ke awei mkeha kiheri alemwalikapfo,

¹⁵ kyasia kokoya kocha mondu fo mbaṟi ii, wafee wa manacho o waka wechiduo kiṟingishio kya wukeha wo mana cho; nguo iya yelaaya kitaṟenyi iwode fana ya samu ya mkonu fulya fo walyi yeṟingishia ke manacho nawei mkeha ko wameku alya kichuminyi kya mṟi na iwawia,

¹⁶ ‘Lulealikia manachu odu o waka ko mnduchu, kyaindi wulalu amkundisepfo,

¹⁷ na kyaṟihisha namkumba kamiria mbonyi tsa wusutsu na ihamba wai alemkoya ai mkeha kiheri alemwalikapfo. Ma kudo wuṟingishi wo wukeha wo manachu odu nyiiwu.’ Numa kataṟauo nguo iya iwode mapaṟi ha samu oshangunyi lo wameku wa mṟi.

¹⁸ Nlyondi wameku wa mṟi wechiira mndumsoṟocho na imlachuo na shiṟeta.

¹⁹ Wechitosase mndumsoṟocho njoko ya shilingi ihana; tsiinengyo ndeye o mndumkacho kyamba msoṟocho nanyamaṟa kiṟumi kya mana o waka o Waisraeli. Mndumkacho nechiwa mka oke kiheri kyose; manya echiidima imnenga paruo yemsamapfo.

²⁰ Kyaindi kokoya ngumbo iya iwei ya lohi, na kulawewode wuṟingishi wo wukeha woke,

²¹ wechimduo alya mongo fo mba ya ndeye, na wasoṟo wa mṟifo wamkape na maho mtano apfa, kipfa nawuta kindo kya wusutsu kiidi kya Waisraeli kawa mṟuhui ai kanyi ko ndeye. Nyi wudo mochitoromisha wuwichowo kiidi kyanu.

²² “Mndu katumkio wuṟuhui na mka o mndu ungi, wose wawawi, mndumsoṟo na mndumka, kiwaṟi wawoho. Nyi wudo mochitoromisha wuwichowo.

²³ “Mndumsoṟo kakoya mana o waka aikoso, kalaa nao,

²⁴ mochiwaduo wose wawawi nja ya mṟi na iwakapa na maho tane wapfa. Manacho o waka kiwaṟi nawoho kipfa kya ili alalefihiṟa kiherikyo alewado kundu nataramo kyamba nawei mṟinyi; na msoṟocho kiwaṟi nawoho cha kipfa naterefutsa tindi ya mndu o mṟasa oke. Nyi wudo mochitoromisha wuwichowo kiidi kyanu.

²⁵ “Kyaindi ko koya mndu msoṟo kakoyana na mana o waka aikoso kambada ko pfinya, kyasia, nyi msoṟocho tupu echiwooho.

²⁶ Mulawutie manacho o waka kindo kyose, o awode mti fumbaṟi nawohopfo. Ndenga ii nyi cha mndu alepufukia mndu ungi na imbaha,

²⁷ kipfa msoṟocho nalewada mana o waka ko pfinya ipfo ngeṟenyi, na manya ili manacho alefihiṟa alewona mndu momtaramapfo.

²⁸ “Mndumsoṟo kakoyana na mana o waka alaikoso, kambada ko pfinya, wakatumkio,

²⁹ mndumsoṟocho nechitaa ndeye o manacho shilingi makumi hatanu (50) kipfa kya ili aleterefutsa mana oke, na manacho o waka nechiwa mka oke na wechilekana ma indipfo.

³⁰ “Mndumsoṟo oose nalalae na mka o ndeye manyale.”